Kulovoka 24:1-18
24 Kalunga ambile kuli Mose ngwenyi: “Ove naAlone, naNdatane, naAvihu,+ navakulwane vavaIsalele 70, kandukenu kuli ami Yehova mulifukwile hahasuku.
2 Mose aswenye uka wenyi kwakamwihi nayami Yehova, oloze vakwavo kanda vaswenya kwakamwihiko. Kaha nawa vatu vosena kanda vakanduka hamwe naikiyeko.”+
3 Mose ejile nakwambulila vatu vyuma vyosena ahanjikile Yehova, namazu akuyula osena.+ Kaha vatu vosena vakumbulwile nalizu limwe ngwavo: “Mazu osena nahanjika Yehova natuwalinganga.”+
4 Ngocho Mose asonekele mazu aYehova osena.+ Kaha ahindukile chimenemene nakutunga lijiko lyakulumbila kushina yapili nakutunga nawa jipanda 12 jakwimanyinako miyachi yavaIsalele 12.
5 Kufumaho atumine vakweze vamalunga vavaIsalele vakahane Yehova mawana akulumba, nakuhana nawa vangombe kupwa mawana akusolola kuunda.+
6 Mose ambachile chimbwa chamanyinga nakuwahingunwina mumbashiya, kaha asapwilile chimbwa chikwavo chamanyinga halijiko lyakulumbila.
7 Jino Mose ambachile mukanda walushiko nakuutangila helu kuvatu.+ Kaha vatu vambile ngwavo: “Vyuma vyosena vize nahanjika Yehova natuvilinganga, kaha nawa natumwononokanga.”+
8 Ngocho Mose ambachile manyinga nakuwasapwila vatu+ nakwamba ngwenyi: “Awa akiko manyinga alushiko luze Yehova nalishiki nayenu hamazu osena awa.”+
9 Mose naAlone, naNatave, naAvihu navakulwane vavaIsalele 70 vakandukile kupili,
10 kaha vamwene Kalunga kaIsalele.+ Mwishi yavilyachilo vyenyi mwapwile vyuma vimwe vyapwile nakusoloka nge malolwa akwala asafwila, kaha apwile nakuvyakuma kwijiva nge melu.+
11 Kalunga kanongesele vaze vakulwane vavaIsaleleko.+ Vamwene chakuvamwenesa chaKalunga wamuchano omu vapwile nakulya nakunwa.
12 Jino Yehova ambile kuli Mose ngwenyi: “Kanduka kuno kupili kuli ami utwameko. Nangukuhana malolwa akuya muuhanda aze ali najishimbi navyuma vyeka ngunasonekaho mangana vatu vavikavangizenga.”+
13 Ngocho Mose naYoshuwa muka-kumukafwako+ vakatukile nakuya, kaha Mose akandukile kupili yaKalunga wamuchano.+
14 Oloze shimbu kanda vayenga, Mose ambile kuli vaze vakulwane ngwenyi: “Enu tuvandaminenu hano palanga nomu natukinduluka.+ Munasale naAlone naHule.+ Weshowo ali nachihande chenyi ayenga kuli vakiko vamukafwe.”+
15 Mose akandukile kupili oku livwi lili nakufwika yize pili.+
16 Upahu waYehova+ wapwile haPili yaShinai,+ kaha lize livwi lyafwikile yize pili hamakumbi 6. Jino halikumbi lyakusokesa 7, Kalunga asanyikile Mose nalizu lyakufuma mulivwi.
17 VaIsalele vaze vasalile vamwene upahu waYehova uli nakusoloka nge kakahya kali nakwepuka helu lyapili.
18 Ngocho Mose engilile muze mulivwi nakukanduka hapili.+ Kaha atwamine kuze kupili makumbi 40 namusana naufuku.+
