Kulovoka 25:1-40
25 Yehova ambile jino kuli Mose ngwenyi:
2 “Lweza vaIsalele vahane wana kuli ami. Mutambula wana kuli mutu himutu kweseka nomu najinyi mumuchima wenyi.+
3 Ou ukiko wana namutambula kuli vakiko: ulu,+ napalata,+ naunengu,+
4 nawanda ulauluka, nawou waungonyi,* nawou uchila, nalihina lyamwaza, namangona avapembe,
5 namalambu avizamba jamikoko akulomba muulombo uchila, namalambu avambau, namitondo yamikesha,+
6 namaji amumanongo,+ namaji ambalasamu akuwavisa,+ navyuma vyalivumba lyamwaza,+
7 namalolwa ajinyishe, namalolwa eka akulamika halipunu+ nahachipwiko chahatulo.+
8 Vangutungile tavanaku, kaha nangutwamanga muli vakiko.+
9 Hakutunga tavanaku navyuma vyosena navipwamo, kavangizenu munona munona vyuma vyosena vize nangukulweza.+
10 “Vasonge chikasha chamutondo wamukesha, muusuku chipwenga jikuvite* jivali nachimbwa, muwihi kuvite yimwe nachimbwa, kaha mukujindama helu kuvite yimwe nachimbwa.+
11 Ukachishila ulu wamwaza+ mukachi nahaweluka. Kaha kusongo ukajingulwisako mungilingili waulu.+
12 Ukatunga makulu aulu awana nakuwalamika kwishi yachikasha kwakamwihi namahinji acho, makulu avali kusali yimwe, makulu avali kusali yikwavo.
13 Kaha ukasonga myalachi yamutondo wamukesha nakuyishila ulu.+
14 Yize myalachi ukayingisa mumakulu aze unahake kuChikasha mangana vakakulikenga kanawa Chikasha.
15 Yize myalachi yikapwe lika muze mumakulu achize Chikasha, kanda mukayisomonamoko.+
16 Muze muChikasha ukahakemo Malolwa aUnjiho akuya muuhanda aze nangukakuhana.+
17 “Ukatunga chifwiko chaulu wamwaza, muusuku chikapwe jikuvite jivali nachimbwa, muwihi kuvite yimwe nachimbwa.+
18 Ukafula vakeluve vaulu vavali namalitelo vakulamika kujisongo jivali jachifwiko.+
19 Omu mukakumisa kufula vaze vakeluve, ukavalamika kujisongo jivali jaChikasha, umwe kusongo yimwe, umwe kusongo yikwavo.
20 Mavava akeluve hikeluve akapwe akutanduuka kuya helu nakuliwana nawaze amukwavo mangana akafwike chize chifwiko.+ Kaha vakeluve vakalitale oku vananongamina hachifwiko.
21 Ukambata chize chifwiko+ nakuchifwika kuChikasha, kaha muze muChikasha ukahakamo Malolwa aUnjiho akuya muuhanda aze nangukakuhana.
22 Nangukahanjika nove nalizu lyakufuma helu lyachifwiko.+ Vyuma vyosena vize naukalweza vaIsalele nangukakulwezavyo nalizu lyakufuminyina hakachi kavakeluve vavali vaze navakapwa helu lyachikasha chaUnjiho.
23 “Ukasonga nawa mesa+ yamutondo wamukesha, muusuku yikapwe jikuvite jivali, muwihi kuvite yimwe, kaha mukujindama helu kuvite yimwe nachimbwa.+
24 Kaha ukayishila ulu wamwaza. Kusongo yamesa ukajingulwisako mingilingili yivali yaulu, mungilingili umwe helu, ukwavo mwishi.
25 Muze mukachi kamingilingili ukalamikamo liliva lyakutohwa kweseka hamwe nachikapa chalivoko.*
26 Ukatunga makulu aulu awana nakuwapachika kujisongo jamahinji amesa mujimbango jayo jiwana.
27 Aze makulu akapwile kwakamwihi naliliva lize naukalamika mukachi kamingilingili. Mumakulu kana mukiko navakasomekanga myalachi yakukulikisa yize mesa.
28 Ukasonga myalachi yamutondo wamukesha nakuyishila ulu. Myalachi kana yikiko navakakulikisanga yize mesa.
29 “Ukafula nawa malonga, najipasa, namilondo, naviloso vize navakahingunwisanga wana wavinyo. Vyuma kana vikapwe vyaulu wamwaza.+
30 Kaha hamesa ukahakengaho jimbolo jakutumbika kumeso ami lwola lwosena.+
31 “Ukatenga chitumbikilo chamanongo chaulu wamwaza.+ Chitumbikilo kana chikapwe chakufula namalitelo. Litanda lyacho, namukota wacho, namitango yacho, najipasa jacho, namaundu acho, najitemo jacho vikalinungasane.+
32 Chize chitumbikilo chamanongo chikapwe namitango 6, mitango yitatu kusali yimwe, mitango yitatu kusali yikwavo.
33 Mutango himutango kusali yimwe ukapwe najipasa jitatu jakufwana nge jitemo jamumonde, namaundu, najitemo vyakulisowasana, kaha kusali yikwavo nawa mutango himutango ukapwe najipasa jitatu jakufwana nge jitemo jamumonde, namaundu, najitemo vyakulisowasana. Omu mukiko nayikapwa eyi mitango 6 kuchitumbikilo chamanongo.
34 Hamukota wachitumbikilo chamanongo hakapwe jipasa jiwana jakufwana nge jitemo jamumonde, namaundu, najitemo vyakulisowasana.
35 Kaha liundu limwe likapwe mwishi yamitango yakulivanga yivali yakuchitumbikilo chamanongo, liundu likwavo nawa mwishi yamitango yivali yinashishimo, kaha liundu lyeka nawa mwishi yamitango yivali yamakumishilo. Mitango yosena 6 nayikafuma hamukota.
36 Maundu, namitango, nachitumbikilo chamanongo chosena, vikapwe vyakufula namalitelo vyakuulu wamwaza.+
37 Echi chitumbikilo chamanongo ukachitengela manongo 7. Kahomu namukamunyika aze manongo, akamunyikile kulutwe lwacho.+
38 Jimanya, natumalonga twakukwachila kakahya vikapwe vyaulu wamwaza.+
39 Echi chitumbikilo chamanongo navinoma kanevi vikapwe vyaulu wamwaza wakuheta mutalende* yimwe.
40 Nyingilila kanawa ukatunge vyumevi nge kutesa nomu ngunakulwekesavyo kupili.+
Kwinyikila Chamwishi
^ Chipwe “uchiluluka.”
^ Kuvite yimwe yapwile jisendimita 44.5. Tala Chihande B14.
^ Kafwe jisendimita 7.4. Tala Chihande B14.
^ Talende yimwe yapwile jikilongalamu 34.2. Tala Chihande B14.
