Kulovoka 26:1-37
26 “Ukatunga tavanaku+ kuzachisa mahina amwaza 10 awanda wakuhosa kanawa, ulauluka, nawou waungonyi, nawou uchila. Kaha haze hamahina ukatongelaho+ vakeluve.+
2 Lihina hilihina likapwe jikuvite* 28 muusuku, kaha jikuvite jiwana muwihi. Mahina osena 10 akateseke hamwe.+
3 Mahina atanu ukawanungila akapwe lihina limwe, kaha mahina akwavo atanu nawa ukawanungila akapwe lihina limwe.
4 Ukatongela makulu awanda ulauluka kusongo yalihina kuze mukanungila lihina likwavo, kaha ukalinga mwomumwe nakusongo yalihina likwavo.
5 Ukatongela makulu 50 kusongo yalihina limwe kuze mukanungila lihina likwavo, kaha makulu 50 kusongo yalihina likwavo. Makulu akapwe akulitalasana.
6 Ukafula jifwenete jaulu 50, ukanungasane aze mahina mangana tavanaku yikapwe nalihina limwe lyalisuku.+
7 “Ukatunga nawa mahina amangona avapembe,+ ukawahake helu lyatavanaku. Mahina kana akapwe 11.+
8 Lihina hilihina likapwe jikuvite 30 muusuku, kaha jikuvite jiwana muwihi. Mahina osena 11 akateseke hamwe.
9 Ukanungila mahina atanu, nakunungila nawa mahina akwavo 6. Kaha ukakoneka lihina lyakusokesa 6 kulutwe lwatavanaku.
10 Ukatongela makulu 50 kusongo yalihina kuze mukanungila lihina likwavo, kaha ukalinga mwomumwe nakulihina likwavo.
11 Ukafula jifwenete jaunengu 50 nakujingisa mumakulu, ukanungasane aze mahina mangana likapwe lihina limwe.
12 Chihanda chalihina chize nachikasalaho chikazezalale. Chimbwa chalihina kana chikazezalale kunyima yatavanaku.
13 Kaha lihina lyasalangaho likazezalale kuvite yimwe kuluhachi lumwe, kuvite yimwe kuluhachi lukwavo mangana likafwike hatavanaku.
14 “Ukatunga chiwuva chamalambu avizamba jamikoko nakuchilomba muulombo uchila, kaha helu lyacho ukahakaho chiwuva chamalambu avambau.+
15 “Ukasonga vipamba+ vyatavanaku vyamutondo wamukesha, vyakwimika.+
16 Chipamba hichipamba chikapwe jikuvite 10 muusuku, kaha kuvite yimwe nachimbwa muwihi.
17 Kaha nawa chikapwe navana vavali vakulinunga. Omu mukiko naukasonga vipamba vyatavanaku vyosena.
18 Ukasonga vipamba 20 vyakumutamba wakusulo yatavanaku.
19 “Ukafula manevo vapalata 40+ muze naukasomeka evi vipamba 20. Mwishi yachipamba hichipamba mukapwe manevo vavali muze naukasomeka vaze vana vavali.+
20 Kaha kumutamba ukwavo wakunote yatavanaku ukasongelako vipamba 20,
21 namanevo vapalata 40. Mwishi yachipamba hichipamba mukapwe manevo vavali.
22 Kunyima yatavanaku kumutamba wakumulauko ukasongelako vipamba 6.+
23 Ukasonga vipamba vivali vyamujimbango jivali jakunyima yatavanaku.
24 Vipamba vyamujimbango kana vikapwe vivali kufuma kwishi nakuliwanyina kwilu muchinunga chakulivanga. Omu mukiko naukalinga mujimbango josena jivali.
25 Kaha kukapwe vipamba 8 namanevo vapalata 16. Mwishi yachipamba hichipamba mukapwe manevo vavali.
26 “Ukasonga myalachi yamutondo wamukesha, myalachi yitanu yavipamba kuluhachi lumwe lwatavanaku,+
27 myalachi yikwavo yitanu yavipamba kuluhachi lukwavo lwatavanaku, myalachi yikwavo nawa yitanu yavipamba kunyima yatavanaku kumutamba wakumulauko.
28 Hakachi kavipamba ukahakaho mwalachi uze naukaheta kusongo nakusongo.
29 “Vize vipamba ukavishila ulu,+ kaha ukavitungila makulu aulu mangana mukengile yize myalachi. Yize myalachi nawa ukayishila ulu.
30 Ukatunga tavanaku kweseka nomu ngunakulweze kupili.+
31 “Ukatunga lihina lyakuvatasana+ lyawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa. Kaha haze halihina ukatongelaho vakeluve.
32 Ukasukika lize lihina kujipanda jiwana jamutondo wamukesha jakushila ulu. Malovo akusukikako lize lihina akapwe aulu. Kaha jize jipanda ukajisomeka mumanevo vapalata vawana.
33 Ukasukika lize lihina lyakuvatasana kujifwenete, nakwingisa chikasha chaUnjiho+ mukachi. Lize lihina nalikahandununa muze Mwajila+ namuze Mwajila Chikuma.+
34 Ukafwika chifwiko helu lyachikasha chaUnjiho chili muze Mwajila Chikuma.
35 “Kusali yikwavo yalize lihina lyakuvatasana, kumutamba wakunote yatavanaku ukahakako mesa, kaha kulutwe lwayize mesa kumutamba wakusulo ukahakako chitumbikilo chamanongo+ kwakulitalasana nayize mesa.
36 Kaha kuchikolo chambalaka ukahakako chivamba* chakutunga nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa,+ wakuliselasana.
37 Ukasonga jipanda jitanu jamutondo wamukesha nakujishila ulu, ukasukikeko chize chivamba.* Malovo akuze kujipanda akapwe aulu, kaha ukasomeka jize jipanda mumanevo vaunengu vatanu.
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Chipwe “lihina lyakuvatasana.”
^ Chipwe “lihina lyakuvatasana.”
