Kulovoka 27:1-21
27 “Ukatunga lijiko lyakulumbila lyamutondo wamukesha,+ muusuku likapwe jikuvite* jitanu, muwihi nawa jikuvite jitanu. Likeseke hamwe muusuku namuwihi, kaha mukujindama helu likapwe jikuvite jitatu.+
2 Ukasonga jimbinga+ mujimbango jiwana jalize lijiko lyakulumbila, kaha ukajishila unengu.+
3 Ukafula jimbekete jakukombela uto,* najifwosholo, naviloso, najingalafwa, natumalonga twakukwachila kakahya. Vinoma vyosenevi vikapwe vyaunengu.+
4 Ukafula vikungo vyaunengu nakuviselasana ngana muze lyapwa lyoji, kaha ukavihaka kulijiko lyakulumbila. Mujimbango jiwana javize vikungo ukahakamo makulu awana aunengu.
5 Kahevi vikungo vyakuliselasana ukavingisa mwishi yamungilingili walijiko lyakulumbila kwakamwihi nahakachi kalijiko.
6 Ukasonga myalachi yamutondo wamukesha yakulijiko lyakulumbila nakuyishila unengu.
7 Yize myalachi ukayingise mumakulu yikapwe kujihachi jivali jalijiko lyakulumbila omu navakalimbata.+
8 Lijiko lyakulumbila ukalisonga likapwe lyakukunama. Ukalitunga ngana omu vakulwezanga kupili.+
9 “Ukatunga chipango+ chakutavanaku. Kumutamba umwe wakusulo yachipango ukasukikako mahina amwaza awanda wakuhosa kanawa, mukusuhwa akapwe jikuvite 100.+
10 Chipango kana chikapwe najipanda 20, namanevo vaunengu 20. Kaha malovo akujipanda namakulu ajo vikapwe vyapalata.
11 Kumutamba wakunote ukasukikako mahina akusuhwa jikuvite 100, najipanda 20, namanevo vaunengu 20, namalovo namakulu akujipanda vyapalata.
12 Kaha muwihi wachipango kumutamba wakumulauko ukasukikamo mahina akusuhwa jikuvite 50, najipanda 10, namanevo 10.
13 Chize chipango chikapwe jikuvite 50 muwihi, kumutamba wakumututuko.
14 Kusali yimwe ukasukikako mahina akusuhwa jikuvite 15, najipanda jitatu, namanevo+ vatatu.
15 Kaha kusali yikwavo nawa ukasukikako mahina akusuhwa jikuvite 15, najipanda jitatu, namanevo vatatu.
16 “Kuwingililo wachipango kukapwe chivamba* chajikuvite 20 muusuku, chakutungisa wanda ulauluka, nawou waungonyi, nawou uchila, nalihina lyamwaza lyawanda wakuhosa kanawa,+ wakutongela hamwe, najipanda jiwana, namanevo+ vawana.
17 Jipanda josena jakuchipango jikapwe namakulu namalovo apalata, oloze manevo ajo vakapwe vaunengu.+
18 Echi chipango chikapwe jikuvite 100 muusuku,+ muwihi jikuvite 50, mukujindama helu jikuvite jitanu. Ukachitungisa mahina amwaza awanda wakuhosa kanawa, chikapwe nawa namanevo vaunengu.
19 Vinoma vyosena navyuma vyeka vyakuzachisa kumilimo yakutavanaku, najimbambo jakumbalaka najimbambo jakuchipango vikapwe vyaunengu.+
20 “Ukalweza vaIsalele vakanehe maji amwaza akutwa nakuyenga kanawa akumunyikisa mangana manongo akamunyikenga lika.+
21 Alone navana venyi vamalunga vakawahisenga manongo amumbalaka yakuliwanyina aze ali kusali yalihina lyakuvatasana lize lili kwakamwihi nachikasha chaUnjiho,+ mangana aze manongo akamunyikenga lika kumeso aYehova+ kuputuka nachingoloshi swi nakuchimene. Elu lukiko lushimbi navakakavangizanga vaIsalele myaka namyaka muvisemunwino vyavo vyosena.+
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Chipwe “uto wamaji,” kulumbununa uto uze wazovele namaji avimuna vakuvatula.
^ Chipwe “lihina lyakuvatasana.”
