Kulovoka 28:1-43
28 “Hali vaIsalele ukasakulaho ndumbwove Alone+ navana venyi vamalunga,+ Natave, naAvihu,+ naEleyaza, naItamale,+ mangana vakanguzachilenga+ mulimo waupilishitu.
2 Ukatungila ndumbwove Alone uvwalo wajila mangana uze uvwalo ukamulingise kupwa naupahu naluvaji.+
3 Ukalweza vosena vaze vatwama nauhashi* vaze ngunahane mangana,+ vakatungile Alone uvwalo mangana vamujilike anguzachilenga mulimo waupilishitu.
4 “Ou ukiko uvwalo navakatunga: chipwiko chahatulo,+ nalipunu,+ nandeleji yakuzeneka mavoko,+ nachikuto chamapwatamapwata, nalihina lyakujinga kumutwe,+ namuhya wamumbunda.+ Vakatungile Alone navana venyi ou uvwalo wajila mangana vakanguzachilenga mulimo waupilishitu.
5 Vakazachisa ulu, nawanda ulauluka, nawou waungonyi, nawou uchila, nalihina lyamwaza.
6 “Vakatunga lipunu lyaulu, nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa, kaha lize lipunu vakalitonge kanawa.+
7 Havifwiji vyalipunu vakatongeleho kalihina kakwavo.
8 Muhya+ uze vanatongela halipunu mangana ukwate kanawa ukapwe waulu, nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa.
9 “Ukambata malolwa avali ajinyishe,+ ukasonekeho majina avana vaIsalele.+
10 Ukasoneka majina 6 halilolwa limwe, majina 6 halilolwa likwavo, kweseka nomu valikavangijila mukusemuka.
11 Muka-kusoneka halilolwa akasoneke majina avana vaIsalele hamalolwa awa avali ngana muze veji kusonekanga hakatachikijilo.+ Kaha aze malolwa alunyishe ukawengisa mutuvikwachilo twaulu.
12 Ukahaka aze malolwa avali havifwiji vyalipunu mangana akapwe akwanukilaho kuli vana vaIsalele.+ Kahomu Alone mwakasolokanga kumeso aYehova, akambate majina avo havifwiji vyenyi kupwa akwanukilangaho.
13 Ukafula tuvikwachilo twaulu,
14 nakutunga malenge avali aulu wamwaza akuvinda nge lungoji.+ Kaha aze malenge ukawakashilila kuze kutuvikwachilo twaulu.+
15 “Ukapwa namuka-kwola mangana akatunge chipwiko chakusopesa chahatulo.+ Akachitunge ngana mwalipunu, chikapwe chaulu, nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa.+
16 Chikateseke hamwe muusuku namuwihi hakuchikoneka. Muusuku namuwihi chikateseke hamwe nachikapa vanatanduula minwe.*
17 Hachipwiko chahatulo ukahakaho tumalolwa tuze natukapwa mumikana yiwana. Mumukana wakulivanga ukalamikamo tumalolwa twaluve, natopaze, nalimelate.
18 Mumukana wamuchivali ukalamikamo tumalolwa twatukuse, nasafwila, nayashipili.
19 Mumukana wamuchitatu ukalamikamo tumalolwa twalyalesheme, nalyangate, nalimetusuto.
20 Kaha mumukana wamuchiwana ukalamikamo tumalolwa twakulusolite, nalunyishe, nayate. Tuze tumalolwa ukatwingise mutuvikwachilo twaulu.
21 Tumalolwa kana tukapwe 12 kweseka namajina 12 avana vaIsalele. Halilolwa hililolwa ukasonekeho lijina limwe nge kutesa namiyachi 12, nge muze veji kusonekanga hakatachikijilo.
22 “Kuze kuchipwiko chahatulo ukatungilako malenge akufwana nge lungoji lwaulu wamwaza.+
23 Ukafula makulu avali aulu nakuwahaka mujimbango jivali jahelu jachize chipwiko chahatulo.
24 Kaha ukengisa aze malenge aulu mumakulu aze avali amuze mujimbango jachipwiko chahatulo.
25 Jisongo jivali jawaze malenge ukajingisa mutumena tuli kutuvikwachilo twaulu tuze tuli havifwiji vyalipunu.
26 Ukafula cheka makulu aulu avali nakuwahaka mujimbango jivali kwishi yachipwiko chahatulo mukachi, oku anakwate halipunu.+
27 Ukafula makulu akwavo aulu avali nakuwahaka kulutwe lwalipunu mwishi yatumahina twahavifwiji, helu lyamuhya haze vanakashila lipunu.+
28 Kaha chize chipwiko chahatulo ukachikase lungoji lulauluka luze lunafumu mumakulu akulipunu. Echi nachikalingisa chipwiko chahatulo chikapwe hakachi kalipunu, helu lyamuhya.
29 “Alone akavwalenga chipwiko chakusopesa hatulo yenyi chize chili namajina avana vaIsalele omu mwakengilanga muze Mwajila mangana chikapwe chakwanukilangaho kumeso aYehova.
30 Ukahaka Ulime naTumime*+ mukachi kachipwiko chakusopesa mangana vikapwe hatulo yaAlone omu mwakezanga kumeso aYehova. Alone akambatenga jishimbi hatulo yenyi jakusopeselaho vaIsalele omu mwakezanga kumeso aYehova.
31 “Ukatunga ndeleji yakuzeneka mavoko, yosena yawanda ulauluka. Helu lyayeyi ndeleji hakiko nahakapwanga lipunu.+
32 Eyi ndeleji yikapwe nashingo. Kaha kuze kushingo ukahichiseko mungundo wakungunda kuli muka-kutunga kanawa mahina. Yize shingo yikapwe ngana mwashingo yakukahuma kachikungo kuchina nayikapulika.
33 Kwishi yayeyi ndeleji ukatungilako jiloma* jamalengeso jawanda ulauluka, nawou waungonyi, nawou uchila, jize najikalisowasana najingezo jaulu.
34 Ukajisowasana omu ngezo yaulu omu loma yamalengeso, omu ngezo yaulu omu loma yamalengeso, kwishi yandeleji yosena jingulwishi.
35 Alone akavwalenga eyi ndeleji hakunguzachila, kaha chivumo chajingezo jakuze kundeleji chikevwakane omu mwakengilanga muchihela chajila kumeso aYehova nomu mwakalovokangamo, kuchina mwakafwa.+
36 “Ukafula kalilata kaulu kakuvyakuma kakuya muupalasese nakusonekaho ngwove, ‘Kujila chapwa chaYehova.’+
37 Kaha kaze kalilata ukakakasa nalungoji lulauluka haluholo, halihina lyakujinga kumutwe.+
38 Kakapwenga haluholo lwaAlone, kaha Alone ikiye mwakapwa namulonga kachi nge mutu mwapihisa vyuma vyajila+ vize vaIsalele navajilika omu navavihana kupwa wana wajila. Kaze kalilata kakapwenga haluholo lwenyi lwola lwosena mangana Yehova akevwilenga vaIsalele uselewa.
39 “Ukatonga chikuto chamapwatamapwata chalihina lyamwaza, nalihina lyawanda wamwaza lyakujinga kumutwe, namuhya.+
40 “Ukatonga nawa vikuto, namihya, namatepa avana vaAlone vamalunga+ mangana vakapwe vaupahu naluvaji.+
41 Ukavwika ndumbwove Alone navana venyi mahina kana, nakuvawavisa,+ nakuvaswanyisa,*+ nakuvajilika, kaha vakanguzachile milimo yaupilishitu.
42 Ukavatongela nawa jiputula* jamahina vakavwale.+ Jiputula kana jikasuhwe kufuma mumbunda nakuheta hajitungi.
43 Alone navana venyi vakavwalenga eji jiputula nge navengila mumbalaka yakuliwanyina chipwe nge navapandama kulijiko lyakulumbila nakunguzachila muchihela chajila, kuchina navavulumuna mulonga nakufwa. Elu lukiko lushimbi mwakakavangizanga Alone navaka-tanga* yenyi vaze navakeza hanyima.
Kwinyikila Chamwishi
^ Hepe., “vakwechi muchima wamangana.”
^ Kafwe jisendimita 22.2. Tala Chihande B14.
^ Tala Mukana waMazu.
^ Jiloma japwa himuyachi umwe wamihako.
^ Hepe., “nakuzalisa mavoko avo.”
^ Chipwe “uvwalo wakwishi.”
^ Hepe., “nambuto.”
