Kulovoka 29:1-46
29 “Evi vikiko vyuma naukalinga mangana ukavajilike vakanguzachilenga milimo yaupilishitu: Ukambata mwanangombe wakuji, navizamba jamikoko vavali vakuzeneka katenga,+
2 nambolo yakuzeneka chimbalwila, najimbolo jakuzeneka chimbalwila jamujingulule jili nawina hakachi jakuchingasana namaji, najimbolo jajilelu chikuma jakuzeneka chimbalwila jakukwita maji.+ Eji jimbolo jikapwe jaunga wamwaza watiliku.
3 Ukajihaka mumutonga nakujihanyina muze vene mumutonga.+ Ukajihanyina kumwe nangombe wakuji, navizamba jamikoko vavali.
4 “Ukaneha Alone navana venyi vamalunga kuchikolo chambalaka yakuliwanyina+ nakuvalweza vakasane meya.+
5 Kaha ukambata uvwalo+ nakuvwika Alone. Ukamuvwika chikuto, nandeleji yakuzeneka mavoko, nalipunu, nachipwiko chahatulo, nakumukasa muhya walipunu mumbunda yenyi.+
6 Ukamujinga lihina kumutwe,+ kaha halihina kana haluholo ukahakaho katachikijilo kajila kakulihana.*
7 Ukambata maji akuwavisa+ nakuwahingunwina hamutwe wenyi ukamuwavise.+
8 “Kufumaho, ukaneha vana venyi nakuvavwika vikuto.+
9 Ukavakasa mihya mujimbunda javo, hamwe kaha naAlone, nakuvajinga mahina kumitwe. Kaha mulimo waupilishitu naukapwanga wavo myaka namyaka.+ Omu mukiko naukatongola Alone navana venyi mangana vakazatenga milimo yaupilishitu.*+
10 “Ukaneha jino ngombe wakuji kumbalaka yakuliwanyina, kaha Alone navana venyi vakanangike mavoko avo hamutwe wayauze ngombe.+
11 Ukajiha uze ngombe kumeso aYehova kuchikolo chambalaka yakuliwanyina.+
12 Ukambata manyinga amwe ayauze ngombe kumunwe wove ukawashile kujimbinga jalijiko lyakulumbila,+ kaha manyinga aze nawakasalaho ukawahingunwina kushina yalijiko lyakulumbila.+
13 Ukambata maji akumijingwa osena,+ nachiwuva chamaji akulisuli, najiso jivali namaji ajo, ukavilumbe halijiko lyakulumbila mangana vikakakumuke wishi.+
14 Oloze nyama yayauze ngombe wakuji, nalilambu lyenyi, natuji twenyi ukavilumbila kusali yachilombo. Vinapu wana wahashili.
15 “Ukambata chizamba chamukoko umwe, kaha Alone navana venyi vakanangike mavoko avo hamutwe wayauze mukoko.+
16 Ukajiha uze chizamba chamukoko, nakumbata manyinga enyi ukawasapwile kujihachi jalijiko lyakulumbila+ josena.
17 Ukateta uze chizamba chamukoko muvipuka, kaha ukakosa mijingwa+ namikono yenyi, nakuvilumbika hamwe namutwe wenyi.
18 Ukalumbe uze chizamba chamukoko wosena mangana akakakumuke wishi halijiko lyakulumbila. Unapu wana wakulumba walivumba lyalupengopengo*+ kuli Yehova. Unapu hiwana wakwocha hakakahya wakuhana Yehova.
19 “Kufumaho, ukambata uze chizamba chamukoko mukwavo, kaha Alone navana venyi vakanangike mavoko avo hamutwe wayauze mukoko.+
20 Ukajiha uze chizamba chamukoko, nakumbata manyinga enyi amwe ukawashile kusongo yalitwitwi lyaAlone lyakuchilyo, nakusongo yamatwitwi akuchilyo avana venyi, nakuminwe yavo yashina yakumavoko avo achilyo, nakuminwe yavo yashina yakumahinji avo achilyo. Kaha ukasapwila manyinga kujihachi jalijiko lyakulumbila josena.
21 Ukambata manyinga amwe aze ali halijiko lyakulumbila, namaji akuwavisa+ nakuwasapwila hali Alone nahauvwalo wenyi, nahali vana venyi nahauvwalo wavo, mangana Alone nauvwalo wenyi, navana venyi nauvwalo wavo vikapwe vyajila.+
22 “Jino kuli uze chizamba chamukoko ukambatako maji, namukila wamaji, namaji akumijingwa, nachiwuva chamaji akulisuli, najiso jivali namaji ajo,+ nalihinji lyachilyo, mwomwo napu chizamba chamukoko wakuhakisa mutu haupilishitu.+
23 Kaha mumutonga uze uli kumeso aYehova muze muli jimbolo jakuzeneka chimbalwila, ukambatamo mbolo yamujingulule, nambolo yamujingulule yili nawina hakachi yakuchingasana namaji, nambolo yayilelu chikuma.
24 Ukavihaka mumavoko aAlone namumavoko avana venyi, nakuvihungisa noku noku kupwa wana wakuhungisa kumeso aYehova.
25 Ukavatambulavyo nakuvilumba halijiko lyakulumbila helu lyawana wakulumba kupwa wana walivumba lyalupengopengo* kuli Yehova. Unapu wana wakwocha hakakahya wakuhana Yehova.
26 “Jino ukambata pambo yachizamba chamukoko wakuhakisa mutu haupilishitu,+ uze vanahanyina Alone. Ukayihungisa noku noku kupwa wana wakuhungisa kumeso aYehova, kaha yikapwe chazano chove.
27 Ukajilika yize pambo yawana wakuhungisa, nalihinji lyamukoko lyachazano chajila vahungisanga, chize vafumisanga kuli uze chizamba chamukoko wakuhakisa+ Alone navana venyi haupilishitu.
28 Vyazano kanevi navakahananga vaIsalele navikapwa vyaAlone navana venyi myaka namyaka, mwomwo vinapu vyazano vyajila. Navikapwanga vyazano vyajila vize navakahananga vaIsalele.+ Vinapu vyazano vyavo vyajila vyakuhana Yehova vyakumawana avo akusolola kuunda.+
29 “Uvwalo wajila+ waAlone navakauvwalanga kuli vana venyi+ vaze navakamushisa nge vanavawavisa nakuvahaka haupilishitu.
30 Weshowo mwanenyi mwakamuswana kupwa kapilishitu uze mwakengilanga mumbalaka yakuliwanyina nakuzachila muchihela chajila, akavwalenga uvwalo kanou hamakumbi 7.+
31 “Ukambata uze chizamba chamukoko wakuhakisa mutu haupilishitu, nakumutelekela muchihela chajila.+
32 Kaha Alone navana venyi vakalile+ uze chizamba chamukoko nambolo yamuze mumutonga kuchikolo chambalaka yakuliwanyina.
33 Vakalye vyuma kanevi valingishile chakufwika hashili omu vavahakile haupilishitu* nakuvajilika. Oloze mutu uze kavetavisako* kanda akalya vyuma kanako mwomwo vinapu vyajila.+
34 Kachi nge nakukasala nyama yimwe yachizamba chamukoko wakuhakisa mutu haupilishitu chipwe mbolo kuheta nakuchimene, kaha ukavilumbe mukakahya.+ Kanda vakavilyako mwomwo vinapu vyajila.
35 “Omu mukiko naukalinga kuli Alone navana venyi kweseka navyuma vyosena ngunakulweze. Ou mulimo wakuvahaka haupilishitu* ukauzata hamakumbi 7.+
36 Kaha hakumbi hakumbi ukahanenga ngombe wakuji wawana wahashili mangana ukavalingile chakufwika hashili. Ukatomesa nawa lijiko lyakulumbila kushili hakulilingila chakufwika hashili, kaha ukaliwavisa nakulijilika.+
37 Lijiko lyakulumbila ukalilingila chakufwika hashili hamakumbi 7, kaha ukalijilika mangana likapwe lyajila chikuma.+ Mutu mwakakwata kulijiko kana kuvanga wajila.
38 “Ou ukiko wana naukalumba halijiko lyakulumbila: vizamba jamikoko vavali vamwaka umwe halikumbi halikumbi.+
39 Ukalumba ava vana vamikoko vavizamba, umwe nachimene, mukwavo hakajimbavenyi.*+
40 Mwanamukoko wachizamba wakulivanga ukamuhanyina kumwe nachimbwa chimwe chaunga wamwaza chakusokesa muvimbwa 10 vyalifwa.* Unga kana ukapwe wakuchingasana nachimbwa chimwe chamaji amwaza akutwa nakuyenga kanawa chakusokesa muvimbwa viwana vyahine,* nawana wavinyo wakuta muchimbwa chimwe chakusokesa muvimbwa viwana vyahine.
41 Ukahana mwanamukoko wachizamba wamuchivali hakajimbavenyi,* kaha ukamuhanyina kumwe nawana wamanona, nawana wavinyo, ngana muze walinganga chimene. Ukavihana kupwa wana walivumba lyalupengopengo* kuli Yehova wakwocha hakakahya.
42 Mukahanenga wana kanou wakulumba muvisemunwino vyenu vyosena. Mukauhanyinenga kuchikolo chambalaka yakuliwanyina kumeso ayami Yehova kuze nangukaliwanyinanga nayenu nakuhanjika nayenu.+
43 “Kuchihela kana kukiko nangukaliwanyinanga navaIsalele, kaha upahu wami+ naukalingisa chihela kana kupwa chajila.
44 Nangukajilika mbalaka yakuliwanyina, nalijiko lyakulumbila, nakujilika nawa Alone navana venyi+ mangana vakanguzachilenga milimo yaupilishitu.
45 Nangukapwanga muli vaIsalele, kaha nangukapwa nguKalunga kavo.+
46 Ngocho navakatachikiza chikupu ngwavo ami yami Yehova Kalunga kavo uze avalowele mulifuchi lyaEjipitu mangana ngutwamenga muli vakiko.+ Ami yami Yehova Kalunga kavo.
Kwinyikila Chamwishi
^ Chipwe “ukahakaho muchama wajila.”
^ Hepe., “Omu mukiko naukazalisa livoko lyaAlone namavoko avana venyi.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Hepe., “omu vavazalishile mavoko avo.”
^ Hepe., “mutu weka,” kulumbununa mutu uze kafuma kutanga yaAloneko.
^ Hepe., “wakuzalisa mavoko avo.”
^ Hepe., “mukachi kavingoloshi vivali.”
^ Lifwa limwe lyapwile kafwe jilita 22. Tala Chihande B14.
^ Hine yimwe yapwile jilita 3.67. Tala Chihande B14.
^ Hepe., “mukachi kavingoloshi vivali.”
^ Chipwe “lyakusuulwisa; lyakwivwisa kuwaha.”
