Kulovoka 30:1-38
30 “Ukatunga lijiko lyakulumbila vyuma vyalivumba lyamwaza.+ Ukalitunga namutondo wamukesha.+
2 Likateseka hamwe muwihi namuusuku. Likapwe kuvite* yimwe muusuku, kuvite yimwe muwihi, kaha jikuvite jivali mukujindama helu. Likapwe najimbinga mujimbango jalyo.+
3 Lyosena ukalishila ulu wamwaza, kujisongo jalyo nakujihachi jalyo, nakujimbinga jalyo. Kusongo yalyo ukajingulwisako mungilingili waulu.
4 Kujihachi jalyo jivali, mwishi yauze mungilingili, ukahakako makulu avali aulu, makulu avali kuluhachi lumwe, makulu avali kuluhachi lukwavo, mangana mukengilenga myalachi yakumbachila lize lijiko lyakulumbila.
5 Ukasonga myalachi yamutondo wamukesha nakuyishila ulu.
6 Lijiko lyakulumbila ukalitumbika kwakamwihi nalihina lize lili kwakamwihi nachikasha chaUnjiho+ nachifwiko chacho, kuze nangukaliwanyinanga nayove.+
7 “Alone+ akalumbe vyuma vyalivumba lyamwaza+ haze halijiko lyakulumbila,+ mangana vikakakumukenga wishi omu mwakawahisanga manongo+ chimene hichimene.
8 Kahomu mwakawikanga manongo hakajimbavenyi,* akalumbenga nawa vyuma vyalivumba lyamwaza. Ou unapu wana wavyuma vyalivumba lyamwaza kuli Yehova uze namukahananga muvisemunwino vyenu vyosena.
9 Halijiko kana kanda namukalumbilaho vyuma vyalivumba lyamwaza vize kavetavisako,+ chipwe wana wakulumba, chipwe wana wamanona. Kanda nawa namukamwangilaho wana wavinyoko.
10 Alone akalinge chakufwika hashili hakushila manyinga kujimbinga jakulijiko lyakulumbila kamwe hamwaka.+ Akambate manyinga amwe achimuna wawana wahashili nakulingila lijiko lyakulumbila chakufwika hashili+ kamwe hamwaka muvisemunwino vyenu vyosena. Lijiko kana linapu lyajila kuli Yehova.”
11 Jino Yehova ambile kuli Mose ngwenyi:
12 “Omu naukasoneka vana vaIsalele nakuvalava,+ mutu himutu akahane Yehova ndando yakusokola kuyoya* chenyi. Echi chikapwe ngocho mangana kuli vakiko kukazeneke kwiza musongo omu naukavasoneka.
13 Evi vikiko vyuma navakahana vaze naukasoneka: chimbwa chashekele* kweseka nakulema chashekele yamuchihela chajila.*+ Shekele yimwe yinapu jingela* 20. Chimbwa chashekele chinapu wana wakuhana Yehova.+
14 Mutu himutu wamyaka yakusemuka 20 uze naukasoneka akahane wana kana kuli Yehova.+
15 Omu namukahananga wana kuli Yehova wakumilingila chakufwika hashili, muka-luheto kanda akahana wana wauvulu wakuhambakana hachimbwa chashekele* yimweko. Muka-kuhutwa nawa kanda akahana wana waundende wakuzeneka kuheta hachimbwa chashekele yimweko.
16 Ukatambula jimbongo japalata kuli vaIsalele jakuvalingila chakufwika hashili, ukajihane vakajizachise kumulimo wakumbalaka yakuliwanyina, mangana jikapwe jakwanukilangaho vaIsalele kumeso aYehova. Jikapwe jakumilingila chakufwika hashili.”
17 Yehova ahanjikile cheka kuli Mose ngwenyi:
18 “Ukafula mbashiya yaunengu yakusanyina+ nachitumbikilo chayo. Kaha ukayitumbika hakachi kambalaka yakuliwanyina nalijiko lyakulumbila, nakuhakamo meya.+
19 Alone navana venyi vakasanenga kumavoko nakuvilyachilo vyavo kuze kumbashiya.+
20 Omu navakengilanga mumbalaka yakuliwanyina, chipwe omu navakayanga nakuzachila kulijiko lyakulumbila nakuhana Yehova wana wakulumba hakakahya wakukakumuka wishi, vakasanenga meya kuchina navakafwa.
21 Vakasanenga kumavoko avo nakuvilyachilo vyavo kuchina navakafwa. Alone navaka-tanga yenyi vakakavangizenga lushimbi kanelu muvisemunwino vyavo vyosena.”+
22 Yehova ahanjikile cheka kuli Mose ngwenyi:
23 “Evi vikiko vyuma vyalivumba lyamwaza chikuma naukambata: mila yaliundu yakuheta mujishekele 500, nakinamone yiyekemena yakuheta mujishekele 250, chimbwa chaseteko yamila, nakalamu yiyekemena yakuheta mujishekele 250,
24 najikasha jajishekele 500, kweseka nakulema chashekele yamuchihela chajila,*+ namaji amulive akweseka muhine* yimwe.
25 Kaha kuvyumevi ukasungako maji ajila akuwavisa. Ukavisunga kanawa*+ vikapwe maji ajila akuwavisa.
26 “Ukazachisa maji kana hakuwavisa mbalaka yakuliwanyina+ nachikasha chaUnjiho,
27 namesa navinoma vyayo vyosena, nachitumbikilo chamanongo navinoma vyacho, nalijiko lyakulumbila vyuma vyalivumba lyamwaza,
28 nalijiko lyakulumbila wana wakulumba navinoma vyalyo vyosena, nambashiya nachitumbikilo chayo.
29 Ukavijilika mangana vikapwe vyajila chikuma.+ Mutu mwakavikwata kuvanga wajila.+
30 Ukawavisa nawa Alone+ navana venyi,+ ukavajilika mangana vakanguzachilenga milimo yaupilishitu.+
31 “Kaha ukahanjika kuli vaIsalele ngwove, ‘Awa maji apwenganga lika maji ami ajila akuwavisa muvisemunwino vyenu vyosena.+
32 Kanda mukawakwita hamujimba wamutuko. Kanda mukasunga maji eka akulifwana namaji kanako, mwomwo anapu ajila. Apwenganga lika ajila kuli enu.
33 Weshowo mwakayenga maji akulifwana namaji kana, chipwe kuwakwita mutu uze kavetavisako* vakamujihe.’”+
34 Kufumaho, Yehova ambile kuli Mose ngwenyi: “Mbata vyuma vino vyalivumba lyamwaza vyakuteseka hamwe:+ satakate, nalunyika, nangalavanu, nalavona.
35 Kaha uvisunga kanawa* vipwenga vyalivumba lyamwaza,+ vyakuhaka mungwa,+ vyamwenemwene, vyajila.
36 Vimwe uvitwe vipwenga unga, kaha uhake unga umwe kwakamwihi nachikasha chaUnjiho chamumbalaka yakuliwanyina muze nanguliwanyinanga nayove. Vipwenga vyajila chikuma kuli enu.
37 Evi vyuma vyalivumba lyamwaza naukasunga kanda ukavizachisa kumilimo yoveko.+ Ukavimona kupwa vyajila kuli Yehova.
38 Weshowo mwakasunga vyakulifwana navyuma kana mangana akalivwise kuwaha livumba lyavyo lyamwaza vakamujihe.”
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Hepe., “mukachi kavingoloshi vivali.”
^ Chipwe “mwono.”
^ Shekele yimwe yapwile jingalamu 11.4. Tala Chihande B14.
^ Chipwe “kweseka nashekele yajila.”
^ Ngela yimwe yapwile jingalamu 0.57. Tala Chihande B14.
^ Shekele yimwe yapwile jingalamu 11.4. Tala Chihande B14.
^ Chipwe “kweseka nashekele yajila.”
^ Hine yimwe yapwile jilita 3.67. Tala Chihande B14.
^ Chipwe “Ukavisunga nge muze eji kulinganga muka-kuyenga maji.”
^ Hepe., “mutu weka,” kulumbununa mutu uze kafuma kutanga yaAloneko.
^ Chipwe “uvisunga nge muze eji kulinganga muka-kuyenga maji.”
