Kulovoka 31:1-18
31 Yehova ahanjikile lika kuli Mose ngwenyi:
2 “Tala, ngunasakula* Mbezalele+ mwanaUli, Uli mwanaHule wakumuyachi waYuta.+
3 Nangumuzalisa nashipilitu yayami Kalunga, nakumuhana mangana, nakunangakana, nachinyingi mumilimo yosena yautotombwe,
4 mangana azate milimo yakutunga, nakusonga, nakufula ulu, napalata, naunengu,
5 nakwola malolwa,+ nakusonga maliva akulisezaseza.+
6 Ngunatongola nawa muka-kumukafwa Oholyave+ mwanaAhisamake wakumuyachi waNdane. Nanguhana nawa mangana kuli vosena vaze vatwama nauhashi* wakuzata milimo mangana vatunge vyuma vyosena evi ngunakulweze:+
7 mbalaka yakuliwanyina,+ nachikasha chaUnjiho+ nachifwiko chacho,+ navinoma vyosena vyakuzachisa mumbalaka,
8 namesa+ navinoma vyayo, nachitumbikilo chamanongo chaulu wamwaza navinoma vyacho vyosena,+ nalijiko lyakulumbila vyuma vyalivumba lyamwaza,+
9 nalijiko lyakulumbila wana wakulumba+ navinoma vyalyo vyosena, nambashiya nachitumbikilo chayo,+
10 nauvwalo wakutonga kanawa, nauvwalo wajila wakapilishitu Alone, nauvwalo wavana venyi wakuzachisa milimo yaupilishitu,+
11 namaji akuwavisa, navyuma vyalivumba lyamwaza vyakuchihela chajila.+ Navakalinga vyuma vyosena evi ngunakulweze.”
12 Yehova ambile cheka kuli Mose ngwenyi:
13 “Ulweza vaIsalele ngwove, ‘Lamenunga jisambata jami,+ mwomwo jinapu chinjikizo kuli ami nayenu mangana muvisemunwino vyenu vyosena mukatachikize ngwenu ami yami Yehova muka-kumijilika.
14 Mulamenga Sambata mwomwo yinapu yajila kuli enu.+ Weshowo mwakasaula Sambata vakamujihe. Weshowo mwakazata mulimo halikumbi kana, vakamujihe.+
15 Mukazatenga milimo hamakumbi 6, oloze likumbi lyakusokesa 7 nalikapwa kunoka chasambata.+ Likumbi kana linapu lyajila kuli Yehova. Weshowo mwakazata milimo halikumbi lyaSambata vakamujihe.
16 VaIsalele valamenga Sambata, kaha valingenga ngocho muvisemunwino vyavo vyosena. Elu lunapu lushiko lwamyaka namyaka.
17 Sambata yinapu chinjikizo chamyaka yosena kuli ami navaIsalele,+ mwomwo ami Yehova ngwatengele melu namavu hamakumbi 6, kaha halikumbi lyakusokesa 7 ngwanokele.’”+
18 Omu Kalunga akumishile kuhanjika naMose haPili yaShinai, ahanyine Mose malolwa aUnjiho+ avali akuya muuhanda. Haze hamalolwa hapwile mazu aze asonekele Kalunga namunwe wenyi.+
