Kulovoka 32:1-35
32 Jino vaIsalele vamwene ngwavo Mose nashimbula chikuma kuze kupili ayile.+ Ngocho valikungulwilile kuli Alone nakumwamba ngwavo: “Tutengele kalunga uze mwatutwaminyina,+ mwomwo katwatachikijile vyuma vinasoloka kuli Mose, lunga uze atulowele mulifuchi lyaEjipituko.”
2 Kaha Alone ambile kuli vakiko ngwenyi: “Zulenu vimbilingwa vyaulu vize vili kumatwitwi+ amapwevo jenu, nakumatwitwi avana venu muvinehe kuli ami.”
3 Ngocho vaIsalele vosena vazulile vimbilingwa vyapwile kumatwitwi avo nakuvineha kuli Alone.
4 Jino Alone ambachile vize vimbilingwa vyaulu, avizuzulwile nakutenga mwanangombe.*+ Kaha vaIsalele vambile ngwavo: “Ove Isalele, ou ikiye Kalunga kove uze akulowele mulifuchi lyaEjipitu.”+
5 Omu Alone amwene chuma kana, atungile lijiko lyakulumbila kulutwe lwayou mwanangombe. Kahomu akumishile, atambakanyine ngwenyi: “Hamene natukalingila Yehova chiwanyino.”
6 Jino lichako, vahindukile chimenemene nakuhana mawana akulumba namawana akusolola kuunda. Vatu vatwamine hamavu nakulya nakunwa. Kaha vakatukile nakuputuka kulisamba.+
7 Jino Yehova ambile kuli Mose ngwenyi: “Shikumuka hamavu, mwomwo vatu jove vaze walowele mulifuchi lyaEjipitu vanalingi vyuma vyavipi.+
8 Vanaseuka lyehi mujila yize ngwavalwezele kutambuka.+ Vanalitengela mwanangombe,* kaha vali nakulifukula kuli ikiye, nakumuhana mawana, nakwamba ngwavo, ‘Ove Isalele, ou ikiye Kalunga kove uze akulowele mulifuchi lyaEjipitu.’”
9 Yehova ambile cheka kuli Mose ngwenyi: “Ngunamono ngwami vatu kana vavakalu michima.*+
10 Shikaho mana nguvazangamise. Nanguvanongesa nautenu wami, kaha nangukulingisa ove kupwa umuyachi waunene.”+
11 Oloze Mose alembelelele Kalunga kenyi Yehova+ ngwenyi: “Mwomwo ika Ove Yehova mukwachila utenu vatu jove vaze walowele mulifuchi lyaEjipitu nalivoko lyove lyangolo?+
12 Ikaze mulingishila vaEjipitu vambenga ngwavo, ‘Kalunga apwile navishinganyeka vyavipi hakulovola vaIsalele mulifuchi lino, asakile kukavajihila mujipili nakuvanongesa vafume hano hamavu’?+ Unjisa utenu wove nakwalumuna vishinganyeka vyove vyakusaka kunehela lupi vatu jove.
13 Anuka muze walishingile kuli ngamba yove Apalahama, naIsaka, naIsalele ngwove, ‘Nangukavulisa vaka-tanga* yenu nge vatanganyika vamwilu,+ nakuvahana lifuchi lyosena eli ngunasakula mangana likapwenga lifuchi lyavo haya myaka yosena.’”+
14 Ngocho Yehova alumwine vishinganyeka vyenyi vyakusaka kunehela lupi vatu jenyi.+
15 Mose afumine jino haze hapili nakushikumuka hamavu oku nambate malolwa aUnjiho+ avali akuya muuhanda mumavoko enyi.+ Aze malolwa apwile akusoneka kujisali josena jivali.
16 Malolwa kana vawolele kuli Kalunga, kaha mazu apwileho nawa ikiye awasonekeleho.+
17 Omu Yoshuwa evwile vyema vyavaIsalele vaze vapwile nakutambakana, alwezele Mose ngwenyi: “Nguli nakwivwa vyema vyajita muchilombo.”
18 Oloze Mose ambile ngwenyi:“Keshi vyema vyavatu vali nakwimba mwomwo yakufungulula jitako,*Chipwe vyema vyamiteto yakuvafungululako,Oloze nguli nakwivwa vyema vyakwimba cheka.”
19 Kahomu Mose ahetele kwakamwihi nachilombo nakumona mwanangombe,+ nomu vapwile nakukina vaIsalele, apihililile nakumbila hamavu aze malolwa akuya muuhanda apwile mumavoko enyi, kaha osena achikikile chikichiki.+
20 Kaha Mose ambachile uze mwanangombe, amwochele nakumuchika wosena chikichiki.+ Kaha amumbilile mumeya nakulweza vaIsalele vanwenga aze meya.+
21 Kufumaho, Mose ehwile Alone ngwenyi: “Uno vatu kanava vakuhungumwisanga ngachilihi numba uvalingise valinge shili yayinene ngana?”
22 Alone akumbulwile Mose ngwenyi: “Ove mwata wami kanda upihililako. Ove watachikiza kanawa ngwove vatu kana vafwila kulinga vyuma vyavipi.+
23 Kaha vangulwezanga ngwavo, ‘Tutengele kalunga uze mwatutwaminyina, mwomwo katwatachikijile vyuma vinasoloka kuli Mose, lunga uze atulowele mulifuchi lyaEjipituko.’+
24 Ngocho ngwavalwezanga ngwami, ‘Weshowo ali naulu atela kuuneha kuli ami.’ Kaha ngwambatanga uze ulu, ngwaumbilanga mukakahya nakutenga ou mwanangombe.”
25 Mose amwene ngwenyi vatu kana vapwile vavakalu michima, kaha nawa Alone avechelelele vakaluhwise michima yavo mangana vavatoleke kuli vaka-kole javo.
26 Jino Mose emanyine muchikolo chachilombo nakuhanjika ngwenyi: “Weshowo ali kusali yaYehova ezenga kuno kuli ami.”+ Kaha vaLevi vosena valikungulwilile kuli ikiye.
27 Ngocho Mose ambile kuli vakiko ngwenyi: “Yehova Kalunga kaIsalele nambe ngwenyi, ‘Muvosena mutu himutu ambate poko yenyi yamukwale nakuvatasana muchilombo kufuma kuchikolo chimwe nakuheta kuchikolo chikwavo, mangana ajihe ndumbwenyi, namukwavo muvatungila, nasepa lyenyi.’”+
28 VaLevi valingile ngana muze avalwezele Mose. Ngocho halikumbi lize malunga 3,000 vafwile.
29 Jino Mose ambile ngwenyi: “Lelo lijilikenu* mangana muzachilenga Yehova, mwomwo mutu himutu hali enu najihi mwanenyi nandumbwenyi.+ Likumbi lyalelo Kalunga mwamikisula.”+
30 Kaha likumbi lyakavangijileho, Mose ambile kuli vaIsalele ngwenyi: “Mwalinganga shili yayinene chikuma, shikaho nanguya kuli Yehova ngukamihanjikileko pamo mwamikonekela shili yenu.”+
31 Ngocho Mose akindulukile kuli Yehova nakumulweza ngwenyi: “Ava vatu vanalingi shili yayinene chikuma. Valitengelanga kalunga waulu.+
32 Nge unasake, kaha vakonekele shili yavo,+ nge chiku kaha ngujime vene ami mumukanda wove unasoneka.”+
33 Oloze Yehova ambile kuli Mose ngwenyi: “Weshowo nalingi shili kuli ami nangumujima mumukanda wami.
34 Shikaho yako utwaminyine vatu kuchihela chize ngunakulweze. Tala! Kangelo kami mwakutwaminyina,+ kaha likumbi lize nangukavasopesa, likiko vene nangukavazangamisa mwomwo yashili yavo.”
35 Ngocho Yehova anehele musongo havatu mwomwo yamwanangombe uze valwezele Alone avatengele.
Kwinyikila Chamwishi
^ Chipwe “likombelo lyakuzuzulula.”
^ Chipwe “likombelo lyakuzuzulula.”
^ Hepe., “vakukakama jishingo.”
^ Hepe., “mbuto.”
^ Chipwe “yakulinga vyuma vyavineneko.”
^ Hepe., “zalisenu mavoko enu.”
