Kulovoka 33:1-23
33 Yehova ambile cheka kuli Mose ngwenyi: “Fuma kuno, hohamwe navatu vaze walowele mulifuchi lyaEjipitu, uyenga kulifuchi lize ngwalishingile kuli Apalahama, naIsaka, naYakova, ngwami, ‘Nanguhana eli lifuchi kuli vaka-tanga* yove.’+
2 Nangutuma kangelo kulutwe lwove+ mangana akahange vaKanane, navaAmole, navaHete, navaPeliji, navaHivi, navaYevuse mulifuchi kana.+
3 Yakonga kulifuchi lyakumbwambumuka mavele nauchi.+ Oloze ami kangweshi kuya nayenuko, mwomwo muvatu vavakalu michima,*+ kaha ngunahase kumijihila mujila.”+
4 Omu vaIsalele vevwile awa mazu autenu, valishonene, kaha kakwapwile mutu numba umwe avwalile vimbilingwako.
5 Kaha Yehova ambile kuli Mose ngwenyi: “Lweza vaIsalele ngwove, ‘Enu muvatu vavakalu michima.*+ Kalinwaha ngwizenga muli enu nakuminongesa.+ Shikaho, zulenu vimbilingwa vyenu shimbu nguchili nakushinganyeka mwakumilingila.’”
6 Ngocho, kufuma vene halwola vapwile kuPili yaHoleve, vaIsalele kavavwalilenga cheka* vimbilingwa vyavoko.
7 Jino Mose ambachile mbalaka yenyi nakuyilemena hahasuku kusali yachilombo, kaha ayilukile ngwenyi mbalaka yakuliwanyina. Weshowo asakile kuhulisa Yehova,+ ayilenga kuze kumbalaka yakuliwanyina kusali yachilombo.
8 Omu alingilenga Mose himwaya kuze kumbalaka yakuliwanyina, vaIsalele vosena vemanyinenga kuvikolo vyajimbalaka javo nakutala omu Mose apwilenga nakuya, palanga nomu engililenga muze mumbalaka yakuliwanyina.
9 Omu Mose engililenga muze mumbalaka yakuliwanyina, yize panda yalivwi+ yejilenga nakwimana muchikolo chayize mbalaka yakuliwanyina oku Kalunga ali nakuhanjika naMose.+
10 Kahomu vaIsalele vosena vamwenenga yize panda yalivwi yinemana muchikolo chayize mbalaka yakuliwanyina, mutu himutu afukaminenga hamavu nakulifukwila muchikolo chambalaka yenyi.
11 Yehova ahanjikile naMose meso nameso+ ngana muze mutu mwahanjika namukwavo. Omu Mose akindulukile muze muchilombo, ngamba yenyi Yoshuwa+ mwanaNune uze apwile muka-kumuzachila,+ kalovokelenga mumbalaka yenyiko.
12 Mose ambile jino kuli Yehova ngwenyi: “Tala, uli nakungwamba ngwove, ‘Twaminyina ava vatu,’ oloze kawangulwezele mutu uze nanguya nenyiko. Kaha unambe nawa ngwove, ‘Ngunakutachikiza halijina lyove,* kaha nawa unawane uselewa kumeso ami.’
13 Shikaho, nge ngunawane uselewa kumeso ove, kaha ngulweze jijila jove,+ mangana ngukutachikize nakupwa lika nauselewa kumeso ove. Anuka nawa ngwove ava vanapu vatu jove.”+
14 Ngocho Kalunga amwambile ngwenyi: “Ami* nanguya nayove,+ kaha nangukakulingisa ukatwame mukuunda.”+
15 Mose ambile kuli Kalunga ngwenyi: “Nge kaweshi* kuya nayami hamweko, kaha kanda utufumisa hanoko.
16 Ami navatu jove natutachikiza ngachilihi ngwetu tunawane uselewa kumeso ove? Ami navatu jove natukapwa vakuhandula kuvatu veka vahamavu+ mwomwo uli nakutambuka nayetu.”+
17 Yehova ahanjikile lika kuli Mose ngwenyi: “Nangulinga nawa chuma kanechi unalombo mwomwo unawane uselewa kumeso ami, kaha nawa ngunakutachikiza halijina lyove.”
18 Kaha Mose ambile ngwenyi: “Achingusolwele upahu wove.”
19 Kalunga ambile ngwenyi: “Nangukakulingisa ukamone kuwaha chami, kaha nawa nangukavilika lijina lyami lyaYehova kuli ove.+ Nangukevwila uselewa weshowo nangukasaka kwivwila uselewa, nangukatetela nawa weshowo nangukasaka kutetela.”+
20 Kalunga ahanjikile cheka ngwenyi: “Kaweshi kuhasa kumona kumeso amiko, mwomwo kakweshi mutu mwamona kumeso ami nakuyoyako.”
21 Kaha Yehova ahanjikile cheka ngwenyi: “Kuno kwakamwihi nayami kuli chihela. Shikaho imana halilolwa lili kuchihela kana.
22 Omu nauhita upahu wami, nangukuhaka mumwaji walilolwa nakukukinga nalivoko lyami palanga nomu nanguhita.
23 Kufumaho nangukufumisa livoko lyami, kaha naumona kunyima yami. Oloze kumeso aminyi kaweshi kumonako.”+
Kwinyikila Chamwishi
^ Hepe., “mbuto.”
^ Hepe., “vakukakama jishingo.”
^ Hepe., “vakukakama jishingo.”
^ Hepe., “vaIsalele vazulile.”
^ Chipwe “Ngunakusakula.”
^ Hepe., “Chihanga chami.”
^ Hepe., “Nge chihanga chove kacheshi.”
