Kulovoka 35:1-35
35 Kufumaho, Mose akungulwile lizavu lyavaIsalele lyosena nakuvalweza ngwenyi: “Yehova nambe ngwenyi mulingenga vyuma vino:+
2 Muzatenga milimo hamakumbi 6, oloze likumbi lyakusokesa 7 nalikapwa likumbi lyajila kuli enu, hikunoka chasambata yaYehova.+ Weshowo mwakazata milimo halikumbi kana vakamujihe.+
3 Halikumbi lyaSambata kamwatela kukawika kakahya kweshokwo kuchihela namukatwamangako.”
4 Mose ahanjikile kulizavu lyavaIsalele lyosena ngwenyi: “Yehova nambe ngwenyi,
5 ‘Nehenu mawana kuli Yehova.+ Mutu himutu uze mwalisuula namuchima wenyi wosena+ atela kuneha wana uno kuli Yehova: ulu, napalata, naunengu,
6 nawanda ulauluka, nawou waungonyi, nawou uchila, nalihina lyamwaza, namangona avapembe,+
7 namalambu avizamba jamikoko akulomba muulombo uchila, namalambu avambau, namitondo yamikesha,
8 namaji amumanongo, namaji ambalasamu akuwavisa, navyuma vyalivumba lyamwaza,+
9 namalolwa ajinyishe, namalolwa eka akulamika halipunu+ nahachipwiko chahatulo.+
10 “‘Lweza vosena vaze vatwama nauhashi*+ wakutunga nakusonga mangana vezenga vatunge vyuma vyosena vize nahanjika Yehova.
11 Vyuma kana shina tavanaku nambalaka yayo, nachiwuva chayo, najifwenete jayo, navipamba vyayo, namyalachi yayo, najipanda jayo, namanevo ayo,
12 naChikasha+ namyalachi yacho,+ nachifwiko chacho,+ nalihina lyakuvatasana+ lyakujikinyina Chikasha,
13 namesa,+ namyalachi yayo, navyuma vyayo vyosena, najimbolo jakuhana Kalunga,+
14 nachitumbikilo chamanongo+ navyuma vyacho, namanongo acho, namaji akumunyikisa,+
15 nalijiko lyakulumbila vyuma vyalivumba lyamwaza,+ namyalachi yalyo, namaji akuwavisa, navyuma vyalivumba lyamwaza,+ nachivamba* chahachikolo chatavanaku,
16 nalijiko lyakulumbila wana wakulumba,+ navikungo vyalyo vyaunengu vyakuliselasana ngana muze lyapwa lyoji, namyalachi yalyo, navyuma vyosena vyakuzachisa kuze kulijiko, nambashiya nachitumbikilo chayo,+
17 namahina akusukika kuchipango,+ najipanda jacho namanevo ajo, nachivamba* chakuwingililo wachipango,
18 najimbambo jatavanaku, najeji jakuchipango, najisambo jajo,+
19 nauvwalo wakutonga kanawa+ wakuzachisa muchihela chajila, nauvwalo wajila wakapilishitu Alone,+ nauvwalo wavana venyi wakuzachisa milimo yaupilishitu.’”
20 Ngocho lizavu lyavaIsalele lyosena lyalimwangile nakufuma kuli Mose.
21 Kaha vosena vaze valisuwile namichima yavo yosena+ vanehele wana wavo kuli Yehova mangana vauzachise kumbalaka yakuliwanyina, nakumilimo yosena yakumbalaka, nakuuvwalo wajila.
22 Malunga namapwevo vosena vaze vapwile namichima yakulisuula vanehelenga tuzeya, navimbilingwa vyeka, navyuma vyosena vyaulu. Vosena vanehelenga mawana* avo aulu kuli Yehova.+
23 Kaha vosena vaze vapwile nawanda ulauluka, nawou waungonyi, nawou uchila, nalihina lyamwaza, namangona avapembe, namalambu avizamba jamikoko akulomba ulombo uchila, namalambu avambau vavinehele.
24 Vosena vaze vakungulwile mawana apalata namawana aunengu vawanehele kuli Yehova, kaha nawa vosena vaze vapwile namitondo yamikesha yakuzachisa kumilimo yosena yakutavanaku vayinehele.
25 Mapwevo vosena vaze vapwile nauhashi wakuhosa,+ vahosele wanda namavoko avo, kaha vanehele wanda wavo: wanda ulauluka, nawou waungonyi, nawou uchila, nalihina lyawanda wamwaza.
26 Kaha nawa mapwevo vosena vamichima yakulisuula vaze vapwile nauhashi wakutonga vahosele mangona avapembe.
27 Kaha nawa vamyata vanehele malolwa ajinyishe namalolwa eka akulamika halipunu nahachipwiko chahatulo,+
28 namaji ambalasamu, namaji amumanongo, namaji akuwavisa,+ navyuma vyalivumba lyamwaza.+
29 Malunga namapwevo vosena vaze vapwile namichima yakulisuula vanehele vyuma vyakuzachisa kumilimo yize Yehova alwezele Mose. VaIsalele vanehele vyuma kana kuli Yehova kupwa wana wakulisakila.+
30 Jino Mose ambile kuli vaIsalele ngwenyi: “Talenu, Yehova nasakula Mbezalele mwanaUli, Uli mwanaHule wakumuyachi waYuta.+
31 Namuzalisa nashipilitu yaKalunga, nakumuhana mangana, nakunangakana, nachinyingi mumilimo yosena yautotombwe
32 mangana azate milimo yakutunga, nakusonga, nakufula ulu, napalata, naunengu,
33 nakwola malolwa, nakusonga maliva akulisezaseza.
34 Kaha nahane Mbezalele naOholyave+ mwanaAhisamake wakumuyachi waNdane uhashi wakunangula.
35 Navahane nawa uhashi*+ wakuzata milimo yavitotombwe yosena, nayakwola, nayeyi yakutunga kuzachisa wanda ulauluka, nawou waungonyi, nawou uchila, nalihina lyawanda wamwaza, nakuzata nawa milimo yakungunda mahina, nge muze veji kulinganga vaka-kutunga kanawa mahina. Ava malunga navakazata milimo yosena nakuwahisa mwakutongela mahina.
Kwinyikila Chamwishi
^ Hepe., “namuchima wamangana.”
^ Chipwe “nalihina lyakuvatasana.”
^ Chipwe “nalihina lyakuvatasana.”
^ Chipwe “mawana akuhungisa.”
^ Hepe., “muchima wamangana.”
