Kulovoka 36:1-38
36 “Mbezalele mwakazachila hamwe naOholyave namalunga vosena vauhashi* wakuzata milimo vaze Yehova nahane mangana nakunangakana, mangana vazate kanawa mulimo wajila ngana muze nambe Yehova.”+
2 Mose asanyikile Mbezalele naOholyave namalunga vosena vauhashi wakuzata milimo vaze Yehova ahanyine mangana,+ navosena vaze valisuwile namichima yavo kuzata mulimo kana.+
3 Kaha vambachile mawana osena+ akuzachisa kumulimo wajila aze vanehele vaIsalele kuli Mose. Oloze vaIsalele vanehelenga lika mawana akulisakila chimene hichimene.
4 Omu vaputukile kuzata uze mulimo wajila, vosena vaze vapwile nauhashi wakuzata milimo vejilenga umwe naumwe
5 kuli Mose nakumulweza ngwavo: “VaIsalele vali nakuneha mawana amavulu akuhambakana hamawana aze tuli nakusaka kuzachisa kumulimo uze Yehova natulweze kuzata.”
6 Ngocho Mose alwezele vatu vavilike muchilombo chosena ngwavo: “Enu malunga namapwevo, kanda namuneha cheka mawana ajilako.” Kaha vaIsalele kavanehele cheka mawanako.
7 Mawana aze vanehele atelemo kuzachisa kumilimo yosena, kaha ahambakanyine namuseteko.
8 Shikaho vosena vaze vapwile nauhashi wakuzata milimo,+ vatungile tavanaku+ kuzachisa mahina amwaza 10. Kaha Mbezalele azachishile lihina lyawanda wamwaza wakuhosa kanawa, ulauluka, nawou waungonyi, nawou uchila, nakutongelaho vakeluve.+
9 Lihina hilihina lyapwile najikuvite* 28 muusuku, najikuvite jiwana muwihi. Mahina osena atesekele hamwe.
10 Kaha anungasanyine hamwe mahina atanu, nakunungasana nawa hamwe aze mahina akwavo atanu.
11 Kufumaho atongele makulu awanda ulauluka kusongo yalihina kuze anungililenga lihina likwavo. Kaha alingile mwomumwe nakusongo yalihina likwavo kwakulitalasana namakulu akuze kulihina likwavo.
12 Atongele makulu 50 kusongo yalihina limwe kuze anungililile lihina likwavo, kaha makulu 50 kusongo yalihina likwavo mangana aze makulu alitalasane.
13 Atungile jifwenete jaulu 50 nakunungasana aze mahina, kaha tavanaku yapwile jino nalihina limwe lyalisuku.
14 Kaha atungile mahina amangona avapembe nakuwahaka helu lyatavanaku. Mahina kana apwile 11.+
15 Lihina hilihina lyapwile najikuvite 30 muusuku, kaha muwihi jikuvite jiwana. Mahina osena 11 atesekele hamwe.
16 Kaha anungile hamwe mahina atanu, nakunungila nawa hamwe mahina akwavo 6.
17 Kufumaho, atongele makulu 50 kusongo yalihina kuze anungilile lihina likwavo, kaha nawa alingile mwomumwe nakulihina likwavo.
18 Kaha atungile nawa jifwenete jaunengu 50 nakujisomeka mumakulu, nakunungasana hamwe aze mahina mangana lipwenga lihina limwe lyalisuku.
19 Atungile chiwuva chamalambu avizamba jamikoko nakuchilomba muulombo uchila, kaha helu lyacho ahakileho chiwuva chamalambu avambau.+
20 Kufumaho, asongele vipamba vyamitondo yamikesha+ vyakutungisa tavanaku, kaha avijikile.+
21 Chipamba hichipamba chapwile jikuvite 10 muusuku, nakuvite yimwe nachimbwa muwihi.
22 Kaha chipamba hichipamba chapwile navana vavali vakulinunga. Omu mukiko asongele vipamba vyatavanaku vyosena.
23 Ngocho, asongele vipamba vyatavanaku, vipamba 20 kumutamba wakusulo.
24 Kaha afulile manevo vapalata 40 muze asomekele vize vipamba 20. Mwishi yachipamba hichipamba mwapwile manevo vavali vakusomekamo vaze vana vavali.+
25 Kaha kumutamba ukwavo wakunote yatavanaku asongeleleleko vipamba 20,
26 namanevo vapalata 40. Mwishi yachipamba hichipamba mwapwile manevo vavali.
27 Kunyima yatavanaku kumutamba wakumulauko asongeleleleko vipamba 6.+
28 Asongele nawa vipamba vivali nakuvijika mujimbango jivali jakunyima yatavanaku.
29 Vipamba vyamujimbango kana vyapwile vivali kufuma kwishi nakuliwanyina kwilu muchinunga chakulivanga. Omu mukiko alingile mujimbango josena jivali.
30 Kaha kwapwile vipamba 8 namanevo vapalata 16. Mwishi yachipamba hichipamba mwapwile manevo vavali.
31 Asongele myalachi yamutondo wamukesha, myalachi yitanu yavipamba kuluhachi lumwe lwatavanaku,+
32 myalachi yikwavo yitanu yavipamba kuluhachi lukwavo lwatavanaku, myalachi yikwavo nawa yitanu yavipamba kunyima yatavanaku kumutamba wakumulauko.
33 Kaha hakachi kavipamba ahakileho mwalachi uze wahetele kusongo nakusongo.
34 Vize vipamba avishilile ulu, kaha atungililileho makulu aulu akwingisamo yize myalachi. Yize myalachi nawa ayishilile ulu.+
35 Atungile lihina lyakuvatasana+ lyawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa. Kaha haze halihina atongeleleleho+ vakeluve.+
36 Kufumaho, asongele jipanda jiwana jamutondo wamukesha jakukashililako lize lihina nakujishila ulu, kaha nawa malovo akusukikako lize lihina apwile aulu. Jize jipanda ajijikile hamanevo vawana vapalata.
37 Kaha kuchikolo chambalaka ahakileko chivamba* chakutunga nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa, wakuliselasana.+
38 Asongele jipanda jitanu jamutondo wamukesha nakujishila ulu nakusukikako lize lihina. Jimbambo jakuze kujipanda japwile jaulu, kaha asomekele jize jipanda mumanevo atanu aunengu.
Kwinyikila Chamwishi
^ Hepe., “namalunga vosena vakwechi muchima wamangana.”
^ Kuvite yimwe yapwile jisendimita 44.5. Tala Chihande B14.
^ Chipwe “lihina lyakuvatasana.”
