Kulovoka 37:1-29
37 Kaha Mbezalele+ asongele Chikasha+ chamutondo wamukesha, muusuku jikuvite* jivali nachimbwa, muwihi kuvite yimwe nachimbwa, kaha mukujindama helu kuvite yimwe nachimbwa.+
2 Chize chikasha achishilile ulu wamwaza mukachi nahaweluka. Kaha kusongo yacho ajingulwishileko mungilingili waulu.+
3 Kufumaho atungile makulu aulu awana nakuwalamika kwishi yaChikasha kwakamwihi namahinji acho, makulu avali kusali yimwe, makulu avali kusali yikwavo.
4 Asongele nawa myalachi yamutondo wamukesha nakuyishila ulu.+
5 Yize myalachi ayingishile mumakulu aze ahakile kuChikasha mangana vakulikenga kanawa Chikasha.+
6 Kaha atungile chifwiko chaulu wamwaza,+ muusuku jikuvite jivali nachimbwa, muwihi kuvite yimwe nachimbwa.+
7 Atungile nawa vakeluve+ vaulu vavali vakufula namalitelo nakuvalamika kujisongo jivali jachifwiko.+
8 Kaha ahakile keluve umwe kusongo yimwe, keluve mukwavo kusongo yikwavo. Atungilile vaze vakeluve kujisongo josena jivali jachifwiko.
9 Mavava akeluve hikeluve atanduukile kuya helu nakuliwana nawaze amukwavo mangana afwike chize chifwiko,+ kaha nawa valitalile oku vananongamina hachifwiko.+
10 Asongele nawa mesa yamutondo wamukesha,+ muusuku yapwile jikuvite jivali, muwihi kuvite yimwe, kaha mukujindama helu kuvite yimwe nachimbwa.+
11 Kaha ayishilile ulu wamwaza. Kusongo yayo ajingulwishileko mingilingili yivali yaulu, mungilingili umwe helu ukwavo mwishi.
12 Muze mukachi kamingilingili alamikilemo liliva lyakutohwa kweseka hamwe nachikapa chalivoko.*
13 Atungile nawa makulu aulu awana nakuwapachika kujisongo jamahinji amesa mujimbango jayo jiwana.
14 Kaha aze makulu apwile kwakamwihi nalize liliva alamikile mukachi kamingilingili. Mumakulu kana mukiko vasomekelenga myalachi yakukulikisa yize mesa.
15 Asongele myalachi yamutondo wamukesha nakuyishila ulu, kaha yikiko vakulikishilenga yize mesa.
16 Kufumaho afulile malonga, najipasa, namilondo, naviloso vize vahingunwishilenga wana wavinyo.+ Vyuma kanevi vyapwile vyaulu wamwaza.
17 Jino atengele chitumbikilo chamanongo+ chaulu wamwaza. Chitumbikilo kana achifulile namalitelo. Litanda lyacho, namukota wacho, najipasa jacho, namaundu acho, najitemo jacho vyalinungasanyine.+
18 Kaha chize chitumbikilo chamanongo chapwile namitango 6, mitango yitatu kusali yimwe, mitango yitatu kusali yikwavo.
19 Mutango himutango kusali yimwe wapwile najipasa jitatu jakufwana nge jitemo jamumonde, namaundu, najitemo vyakulisowasana, kaha kusali yikwavo nawa mutango himutango wapwile najipasa jitatu jakufwana nge jitemo jamumonde, namaundu, najitemo vyakulisowasana. Omu mukiko yapwile eyi mitango 6 kuchitumbikilo chamanongo.
20 Kaha hamukota wachitumbikilo chamanongo hapwile jipasa jiwana jakufwana nge jitemo jamumonde, namaundu, najitemo vyakulisowasana.
21 Kaha liundu limwe lyapwile mwishi yamitango yakulivanga yivali yakuchitumbikilo chamanongo, liundu likwavo nawa mwishi yamitango yivali yashishilemo, kaha liundu lyeka nawa lyapwile mwishi yamitango yivali yamakumishilo. Mitango yosena 6 yafumine hamukota wachitumbikilo chamanongo.
22 Maundu, namitango, nachitumbikilo chamanongo chosena, vyapwile vyakufula namalitelo vyakuulu wamwaza.
23 Kaha chize chitumbikilo chamanongo+ achitengelele manongo 7, najimanya, natumalonga twakukwachila kakahya. Vyuma kana vyapwile vyaulu wamwaza.
24 Chize chitumbikilo chamanongo navinoma vyacho vyapwile vyaulu wamwaza wakuheta mutalende* yimwe.
25 Atungile lijiko lyakulumbila vyuma vyalivumba lyamwaza.+ Alitungile namutondo wamukesha. Kaha lyatesekele hamwe muwihi namuusuku, kuvite yimwe muusuku, kuvite yimwe muwihi, kaha jikuvite jivali mukujindama helu. Asomekele nawa jimbinga mujimbango jalyo.+
26 Lijiko lyosena alishilile ulu wamwaza, kujisongo jalyo, nakujihachi jalyo, nakujimbinga jalyo. Kaha kusongo yalyo ajingulwishileko mungilingili waulu.
27 Kujihachi jalyo jivali, mwishi yauze mungilingili, ahakileko makulu avali aulu, makulu avali kuluhachi lumwe, makulu avali kuluhachi lukwavo, mwakwingisa myalachi yakumbachila lize lijiko lyakulumbila.
28 Kufumaho asongele myalachi yamutondo wamukesha nakuyishila ulu.
29 Kaha atungile maji ajila akuwavisa,+ navyuma vyalivumba lyamwaza,+ nakuvisunga kanawa.*
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Kafwe jisendimita 7.4. Tala Chihande B14.
^ Talende yimwe yapwile jikilongalamu 34.2. Tala Chihande B14.
^ Chipwe “nakuvisunga nge muze eji kulinganga muka-kuyenga maji.”
