Kulovoka 38:1-31
38 Kaha atungile lijiko lyakulumbila wana wakulumba lyamutondo wamukesha. Lyesekele hamwe muusuku namuwihi, muusuku lyapwile jikuvite* jitanu, muwihi nawa jikuvite jitanu, kaha mukujindama helu lyapwile jikuvite jitatu.+
2 Asongele jimbinga jiwana nakujisomeka mujimbango jiwana jalize lijiko lyakulumbila, kaha ajishilile unengu.+
3 Afulile vyuma vyakuzachisa kulijiko lyakulumbila, jimbekete, najifwosholo, naviloso, najingalafwa, namalonga akakahya. Vyosenevi vyapwile vyaunengu.
4 Afulile nawa vikungo vyaunengu nakuviselasana ngana muze lyapwa lyoji, kaha avingishile mwishi yamungilingili walijiko lyakulumbila, chakukokela hakachi.
5 Kaha muze mujimbango jiwana kwakamwihi navize vikungo, ahakilemo makulu awana aunengu akusomekangamo myalachi.
6 Kufumaho asongele myalachi yamitondo yamikesha nakuyishila unengu.
7 Kaha engishilenga yize myalachi mumakulu aze apwile kujisali jalize lijiko lyakulumbila mangana chipwenganga chachashi kulimbata. Eli lijiko asongele lyapwile lyakukunama.
8 Kaha afulile mbashiya yaunengu yakusanyina+ nachitumbikilo chayo chaunengu. Vyuma kanevi avitungile navitalilo* vyamapwevo vaze vazachilenga mukulonga kuchikolo chambalaka yakuliwanyina.
9 Atungile chipango chakutavanaku.+ Kumutamba umwe wakusulo asukikileko mahina amwaza awanda wakuhosa kanawa, muusuku apwile jikuvite 100.+
10 Chize chipango chapwile najipanda 20, namanevo aunengu 20. Kaha malovo akujipanda namakulu ajo vyapwile vyapalata.
11 Kunote yacho asukikileko mahina ajikuvite 100 muusuku. Kaha jipanda 20 jakusukikako aze mahina, namanevo 20 vyapwile vyaunengu. Malovo namakulu akujipanda apwile apalata.
12 Oloze kumulauko asukikileko mahina akusuhwa jikuvite 50. Kaha kwapwile jipanda 10, namanevo 10. Malovo namakulu akujipanda apwile apalata.
13 Mutamba wakumututuko wapwile jikuvite 50.
14 Kusali yimwe yakuwingililo wachipango asukikileko mahina akusuhwa jikuvite 15, nakujikako jipanda jitatu, nakuhakako manevo vatatu.
15 Kaha kusali yikwavo nawa asukikileko mahina akusuhwa jikuvite 15, nakujikako jipanda jitatu, nakuhakako manevo vatatu.
16 Mahina akusukika kuchipango osena apwile awanda wamwaza wakuhosa kanawa.
17 Manevo akusomekamo jipanda apwile aunengu, oloze malovo namakulu apwile apalata, kaha kuze kujisongo jajize jipanda ashilileko palata. Jisambo jakukashisa jize jipanda jakuchipango japwile japalata.+
18 Kuwingililo wachipango kwapwile chivamba* chakutungisa wanda ulauluka, nawou waungonyi, nawou uchila, nalihina lyamwaza lyawanda wakuhosa kanawa. Chapwile najikuvite 20 muusuku, najikuvite jitanu mukujindama helu, kusuhwa chacho chatesekele hamwe namahina akusukika kuchipango.+
19 Jize jipanda jiwana jakuchipango, namanevo vajo vawana vyapwile vyaunengu. Kaha aze malovo akuze kujipanda apwile apalata. Kujisongo jajize jipanda vashilileko palata, kaha namakulu nawa vawashilile palata.
20 Jimbambo josena jakutavanaku najakuchipango japwile jaunengu.+
21 Evi vyuma vinakavangizaho vikiko vazachishile kutavanaku, yikiko vene tavanaku yaUnjiho,+ vize Mose alwezele vaLevi+ vavilave hakuvatwaminyina kuli Itamale+ mwanakapilishitu Alone.
22 Mbezalele+ mwanaUli, Uli mwanaHule wakumuyachi waYuta alingile vyuma vyosena vize Yehova alwezele Mose.
23 Azachilile hamwe naOholyave+ mwanaAhisamake wakumuyachi waNdane, uze apwile nauhashi mumilimo yakusonga, nayeyi yakwola, nayeyi yakutunga kuzachisa wanda ulauluka, nou waungonyi, nou uchila, nalihina lyawanda wamwaza.
24 Ulu wosena vazachishile kuchihela chajila watesekele hamwe naulu wawana wakuhungisa.+ Ulu kana wahetele mujitalende* 29, namujishekele* 730 jakweseka nakulema chashekele yamuchihela chajila.*
25 Kaha palata vakungulwile vaze vasonekele mulizavu yahetele mujitalende 100, namujishekele 1,775. Jishekele kana japwile jakweseka nakulema chashekele yamuchihela chajila.*
26 Malunga vosena vaze vasonekele vamyaka yakusemuka 20 nakuya helu+ vanehele chimbwa chashekele chakweseka nakulema chashekele yamuchihela chajila.* Kaha vosena vaze vasonekele vahetele 603,550.+
27 Kaha palata yize atungishile manevo akuchihela chajila namanevo aze apwile kwakamwihi nalihina lyakuvatasana yahetele mujitalende 100. Manevo 100 vawatungile napalata yakuheta mujitalende 100, talende yimwe hanevo umwe.+
28 Kujishekele 1,775 afulileko malovo akujipanda, nakushila palata kujisongo jajize jipanda nakujinungila hamwe.
29 Kaha unengu uze vanehelenga vatu kupwa wana* wahetele mujitalende 70, najishekele 2,400.
30 Ou unengu ukiko atungishile manevo akuchikolo chambalaka yakuliwanyina, nalijiko lyakulumbila lyaunengu, navikungo vyaunengu vyakuliselasana ngana muze lyapwa lyoji, navyuma vyeka vyosena vyakuzachisa kulijiko lyakulumbila,
31 namanevo akuchipango, namanevo akuwingililo wakuchipango, najimbambo josena+ jakutavanaku najize jakuchipango.
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Kulumbununa, vitalilo vyavikungo vyakutomesa kanawa.
^ Chipwe “lihina lyakuvatasana.”
^ Talende yimwe yapwile jikilongalamu 34.2. Tala Chihande B14.
^ Shekele yimwe yapwile jingalamu 11.4. Tala Chihande B14.
^ Chipwe “jakweseka nashekele yajila.”
^ Chipwe “jakweseka nashekele yajila.”
^ Chipwe “chakweseka nashekele yajila.”
^ Chipwe “kupwa wana wakuhungisa.”
