Kulovoka 39:1-43
39 Vatungile uvwalo wamwaza wawanda ulauluka, nawou waungonyi, nawou uchila,+ wakuzachisa muchihela chajila. Vatungile uvwalo wajila waAlone+ ngana muze Yehova alwezele Mose.
2 Kaha vatungile nawa lipunu+ lyaulu, nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa.
3 Vafulile ulu muvihanda vyakuya muupalasese, nakuvivatula-vatula mujisambo, kaha jize jisambo vajiselwile nawanda ulauluka, nou waungonyi, nou uchila, nalihina lyawanda wamwaza. Kaha vavitongele nakuviselula kanawa.
4 Kaha havifwiji vyalize lipunu vatongeleleleho tumahina tukwavo.
5 Muhya uze vatongelele halipunu mangana likwate kanawa+ vautongesele vyuma vyovimwe navize vatongesele lipunu. Vyuma kana shina ulu, nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa, ngana muze Yehova alwezele Mose.
6 Vambachile malolwa ajinyishe nakuwengisa mutuvikwachilo twaulu nakusonekaho majina avana vaIsalele ngana muze veji kusonekanga hakatachikijilo.+
7 Ahakile aze malolwa havifwiji vyalipunu mangana apwenga akwanukilaho kuli vana vaIsalele,+ ngana muze Yehova alwezele Mose.
8 Atungile chipwiko chahatulo+ muutotombwe ngana muze eji kulinganga muka-kwola lipunu. Achitungishile ulu, nawanda ulauluka, nawou waungonyi, nawou uchila, nalihina lyamwaza lyawanda wakuhosa kanawa.+
9 Echi chipwiko chahatulo chatesekele hamwe muusuku namuwihi hakuchikoneka. Kaha muusuku namuwihi chatesekele hamwe nachikapa vanatanduula minwe.*
10 Haze hachipwiko chahatulo vahakileho tumalolwa tuze twapwile mumikana yiwana. Mumukana wakulivanga valamikilemo tumalolwa twaluve, natopaze, nalimelate.
11 Mumukana wamuchivali valamikilemo tumalolwa twatukuse, nasafwila, nayashipili.
12 Kaha mumukana wamuchitatu valamikilemo tumalolwa twalyalesheme, nalyangate, nalimetusuto.
13 Mumukana wamuchiwana valamikilemo tumalolwa twakulusolite, nalunyishe, nayate. Tuze tumalolwa vatwingishile mutuvikwachilo twaulu.
14 Tumalolwa kana twapwile 12 kweseka namajina 12 avana vaIsalele. Halilolwa hililolwa vasonekeleho lijina limwe nge kutesa namiyachi 12, nge muze veji kusonekanga hakatachikijilo.
15 Kuze kuchipwiko chahatulo vatungilileko malenge akufwana nge lungoji lwaulu wamwaza.+
16 Vafulile tuvikwachilo twaulu tuvali namakulu avali aulu nakuwahaka mujimbango jivali jahelu jachize chipwiko chahatulo.
17 Kaha vengishile aze malenge aulu mumakulu aze avali apwile mujimbango jachipwiko chahatulo.
18 Jize jisongo jivali jawaze malenge vajingishile mutumena twapwile kutuvikwachilo twaulu tuze twapwile havifwiji vyalipunu.
19 Kaha vafulile makulu aulu avali nakuwahaka mujimbango jivali kwishi yachipwiko chahatulo mukachi, oku anakwate halipunu.+
20 Vafulile makulu akwavo aulu avali nakuwahaka kulutwe lwalipunu mwishi yatumahina twahavifwiji, kwakamwihi nahaze vatunungililile, helu lyamuhya walipunu.
21 Kaha chize chipwiko chahatulo vachikashile nalungoji lulauluka lwakufuma mumakulu akulipunu. Echi chalingishile chize chipwiko chipwenga hakachi kalipunu helu lyamuhya, ngana muze Yehova alwezele Mose.
22 Vatungile ndeleji yakuzeneka mavoko, yakusela nawanda ulauluka, nge muze veji kulinganga vaka-kutunga kanawa mahina. Helu lyayeyi ndeleji hakiko hapwilenga lipunu.+
23 Eyi ndeleji yapwile nashingo ngana mwashingo yakukahuma kachikungo. Kuze kushingo vahichishileko mungundo kuchina nayipulika.
24 Kaha kwishi yayize ndeleji vatungilileko jiloma* jamalengeso jawanda ulauluka, nawou waungonyi, nawou uchila, wakuselasana hamwe.
25 Kaha vafulile jingezo jaulu wamwaza nakujihaka kusongo yosena yayize ndeleji mukachi kajiloma jamalengeso.
26 Vajisowasanyine omu ngezo yaulu omu loma yamalengeso, omu ngezo yaulu omu loma yamalengeso kwishi yandeleji yosena jingulwijishi, ndeleji yize vavwalilenga hakuzachila muchihela chajila, ngana muze Yehova alwezele Mose.
27 Kaha vatungile vikuto vyamahina amwaza vyaAlone navana venyi vamalunga,+ nge muze veji kulinganga vaka-kutunga kanawa mahina.
28 Vatungile nawa lihina lyawanda wamwaza lyakujinga kumutwe,+ namatepa amahina amwaza,+ najiputula* jamahina awanda wamwaza wakuhosa kanawa,+
29 namuhya wakutunga nalihina lyawanda wamwaza wakuhosa kanawa, ulauluka, nawou waungonyi, nawou uchila, wakuselasana. Vavitungile ngana muze Yehova alwezele Mose.
30 Vafulile jino kalilata kaulu kakuvyakuma kakuya muupalasese kupwa katachikijilo kajila kakulihana,* nakusonekaho ngwavo: “Kujila chapwa chaYehova.”+
31 Kaha kaze kalilata vakakashile nalungoji lulauluka halutwe lwalihina lyakujinga kumutwe, ngana muze Yehova alwezele Mose.
32 Shikaho milimo yosena yatavanaku, chipwe ngwetu mbalaka yakuliwanyina, yakumine. Ngocho vaIsalele valingile vyuma vyosena vize Yehova alwezele Mose.+ Kaha valingile vene ngocho.
33 Kufumaho vanehele tavanaku+ kuli Mose, navyuma vyayo vyosena,+ najifwenete jayo+, navipamba vyayo,+ namyalachi yayo,+ najipanda jayo, namanevo ayo,+
34 nachiwuva chamalambu avizamba jamikoko akulomba ulombo uchila,+ nachiwuva chamalambu avambau, nalihina lyakuvatasana,+
35 nachikasha chaUnjiho namyalachi yacho,+ nachifwiko chacho,+
36 namesa, navyuma vyayo vyosena,+ najimbolo jakuhana Kalunga,
37 nachitumbikilo chamanongo chaulu wamwaza, namanongo acho+ aze apwile mumukana helu, navyuma vyacho vyosena,+ namaji akumunyikisa,+
38 nalijiko lyakulumbila lyaulu,+ namaji akuwavisa,+ navyuma vyalivumba lyamwaza,+ nachivamba*+ chakuchikolo chambalaka,
39 nalijiko lyakulumbila lyaunengu,+ navikungo vyalyo vyaunengu vyakuliselasana ngana muze lyapwa lyoji, namyalachi yalyo,+ navyuma vyalyo vyosena vyakuzachisa,+ nambashiya nachitumbikilo chayo,+
40 namahina akusukika kuchipango, najipanda jacho, namanevo acho,+ nachivamba*+ chakuwingililo wachipango, najisambo jacho, najimbambo jacho,+ navyuma vyosena vyakuzachisa milimo yakutavanaku chipwe ngwetu mbalaka yakuliwanyina,
41 nauvwalo wakutonga kanawa wakuzachisa muchihela chajila, nauvwalo wajila wakapilishitu Alone,+ nauvwalo wavana venyi wakuzachisa milimo yaupilishitu.
42 VaIsalele vazachile milimo yosena kweseka namuze Yehova alwezele Mose.+
43 Kahomu Mose atalile milimo yosena yize vazachile, amwene ngwenyi vanayizate kweseka namuze ahanjikile Yehova. Kaha Mose avakiswile.
Kwinyikila Chamwishi
^ Kafwe jisendimita 22.2. Tala Chihande B14.
^ iloma japwa himuyachi umwe wamihako.
^ Chipwe “nauvwalo wakwishi.”
^ Chipwe “kupwa muchama wajila.”
^ Chipwe “nalihina lyakuvatasana.”
^ Chipwe “nalihina lyakuvatasana.”
