Kulovoka 5:1-23
5 Kufumaho, Mose naAlone vayile kuli Fwalo nakumulweza ngwavo: “Yehova Kalunga kaIsalele nambe ngwenyi, ‘Suula vatu jami mangana vayenga vakangulingile chiwanyino mupambo.’”
2 Oloze Fwalo ambile ngwenyi: “Yehova+ ikiye iya numba ngwononoke mulizu lyenyi ngusuule vaIsalele vayenga?+ Yehova kangwamutachikiza numba chachindendeko, kaha kangweshi kusuula vaIsalele vayengako.”+
3 Vakiko vamwambile ngwavo: “Kalunga kavaHepeleu nahanjika nayetu. Tuli nakusaka tuyenga ungeji wamakumbi atatu mupambo mangana tukahane Yehova Kalunga+ ketu vimuna vakuvatula, nge chiku mwatujiha namusongo chipwe napoko yamukwale.”
4 Kaha mwangana waEjipitu avambile ngwenyi: “Mwomwo ika enu vaMose naAlone muli nakutangwila vaIsalele kuzata milimo yavo? Kindulukenu kumilimo* yenu.”+
5 Fwalo ambile lika ngwenyi: “Talenu omu vanavulu vatu kana mulifuchi lino, oloze enu muli nakusaka vanoke nakuhona kuzata milimo yavo.”
6 Halikumbi vene lize, Fwalo alwezele vakulwane vamilimo natupitau vavaIsalele ngwenyi:
7 “Kanda namuhana cheka vaIsalele mwila wakufwatwisa tumengako.+ Vechenu vayenga nakulitondela vavene mwila kana.
8 Valwezenu vafwatulenga tumenga vakuheta museteko yize vanafwatulanga kunyima. Kanda kuvatepulwila kuseteko kanako, mwomwo vali nakuzata nauvwa. Kahou uvwa ukiko uli nakuvalingisa vayayavalenga ngwavo, ‘Tuli nakusaka kuya nakuhana Kalunga ketu vimuna vakuvatula.’
9 Vazachisenu chikuma mangana vahone kwivwilila kuvyuma vyamakuli.”
10 Ngocho vakulwane vamilimo,+ natupitau twavo vayile nakulweza vaIsalele ngwavo: “Fwalo nahanjika ngwenyi, ‘Kangweshi kumihana cheka mwilako.
11 Yenunga mukalitondelewo enu vavene kweshokwo namuuwanyina, oloze kumilimo yenunyi kangweshi kutepululakoko.’”
12 Ngocho vaIsalele valimwangililile mulifuchi lyosena nakukungulula jino visachi mumande nakuvitenga mwila.
13 Vakulwane vamilimo vambilenga kuli vakiko ngwavo: “Mwatela kukumisanga milimo yenu hakumbi hakumbi ngana muze mwalingilenga omu twamihanyinenga mwila.”
14 Jino vakulwane vamilimo vaze atongwele Fwalo vavetele+ tupitau vavaIsalele. Kaha vavahulishile ngwavo: “Mwomwo ika zau nalelo munahonena kuhetesa haseteko yatumenga yize munapunga nakufwatula kunyima?”
15 Ngocho tupitau vavaIsalele vayile nakuyayavala kuli Fwalo ngwavo: “Ika uli nakutuyanjishila etu vangamba jove ngana?
16 Etu kaveshi nakutuhana mwilako, oloze vali nakutwamba ngwavo, ‘Fwatulenu tumenga.’ Vatu jove vali nakutuveta, okunyi vakiko vali nakupihisa.”
17 Oloze Fwalo avambile ngwenyi: “Muli nauvwa, muli nauvwa!+ Kahou uvwa ukiko uli nakumilingisa mwambenga ngwenu, ‘Tuli nakusaka kuya nakuhana Yehova+ vimuna vakuvatula.’
18 Yenunga mukazate milimo. Mwila kaveshi kumihanawoko, olozenyi kuvanga muhetese haseteko yatumenga vanamitomena.”
19 Kaha tupitau vavaIsalele vamwene jino ngwavo vali muukalu mwomwo yalushimbi vavahanyine lwakwamba ngwavo: “Kanda kuvatepulwila seteko yatumenga vatela kufwatulanga hakumbi hakumbiko.”
20 Jino omu vapwile nakufuma kuli Fwalo, valiwanyine naMose naAlone vaze vapwile nakuvavandamina.
21 Vavalwezele ngwavo: “Yehova atale havyumevi munalingi, amiyule, mwomwo munalingisa Fwalo navangamba jenyi vatulumbilise,* nakuvahana nawa poko yamukwale mangana vatujihe.”+
22 Jino Mose ambile kuli Yehova ngwenyi: “Ove Yehova, ikaze unanehela luyando hali ava vatu? Ika unangutumina?
23 Kufuma vene haze ngwayanga nakumona Fwalo nakuhanjika nenyi mulijina lyove,+ hakiko nasweze chikumanyi kuyanjisa vatu jove,+ kahove nawa kawavasokweleko.”+
Kwinyikila Chamwishi
^ Chipwe “kuviteli.”
^ Chipwe “mwomwo munatulingisa tunuke livumba lyalipi kuli Fwalo navangamba jenyi.”
