Kulovoka 7:1-25
7 Jino Yehova ambile kuli Mose ngwenyi: “Tala, ngunakulingisa kupwa nge Kalunga* kuli Fwalo, kaha ndumbwove Alone mwapwa kapolofweto kove.+
2 Uhanjika kuli ndumbwove Alone vyuma vyosena vize nangukulweza, kufumaho ikiye avihanjike kuli Fwalo, kaha Fwalo mwakasuula vaIsalele kufuma mulifuchi lyenyi.
3 Ami nangwechelela Fwalo akaluhwise muchima wenyi,+ kaha nanguvulisa vinjikizo vyami navyuma vyakukomwesa mulifuchi lyaEjipitu.+
4 Chipwe ngocho, Fwalo keshi kumivwililako, kaha nangukazangamisa+ Ejipitu nangolo jami nakulovola mayongomena avatu jami vaIsalele mulifuchi lyaEjipitu.
5 Omu nangukolola livoko lyami nakuzangamisa vaEjipitu, nakulovola vaIsalele muli vakiko, vaEjipitu navakatachikiza chikupu ngwavo ami yami Yehova.”+
6 Mose naAlone valingile vyuma vize avalwezele Yehova. Valingile vene ngocho.
7 Omu Mose naAlone vahanjikile kuli Fwalo, Mose apwile namyaka yakusemuka 80, kaha Alone apwile namyaka yakusemuka 83.+
8 Yehova ambile jino kuli Mose naAlone ngwenyi:
9 “Nge Fwalo mwakamyamba ngwenyi, ‘Lingenu chuma chakukomwesa,’ kaha kalweze Alone ngwove, ‘Mbata mbwechi yove uyimbile hamavu kumeso aFwalo.’ Kaha eyi mbwechi nayikalumuka nakupwa linoka wamunene.”+
10 Ngocho Mose naAlone vayile kuli Fwalo nakulinga vyuma vyosena vize avalwezele Yehova. Alone ambilile mbwechi yenyi hamavu kumeso aFwalo navangamba jenyi, kaha yalumukile nakupwa linoka wamunene.
11 Fwalo naikiye asanyikile vaka-mangana navaka-kupanda. Kaha vapilishitu vaka-kulinga visava vamuEjipitu+ navakiko valingile vyuma vyovimwe navisava vyavo.+
12 Ngocho mutu himutu ambilile mbwechi yenyi hamavu, kaha jize jimbwechi jalumukile nakupwa manoka vavanene. Oloze mbwechi yaAlone yaminyine jimbwechi javo.
13 Chipwe ngocho, Fwalo akaluhwishile lika muchima wenyi,+ kaha kavevwililileko ngana muze ahanjikile Yehova.
14 Jino Yehova ambile kuli Mose ngwenyi: “Fwalo nakaluhwisa muchima wenyi.+ Nakane kusuula vaIsalele vayenga.
15 Yako kuli Fwalo nachimene chino, kaha tala, ali nakuya kulwiji. Ove ukemana kungenge yaKalwiji Nyile mangana ukaliwane nenyi kuze. Kaha mbata mbwechi yize yalumukanga nakupwa linoka.+
16 Ukahanjika kuli ikiye ngwove, ‘Yehova Kalunga kavaHepeleu nangutumu kuli ove+ ngwenyi: “Suula vatu jami mangana vakanguzachile mupambo,” oloze ove noholyapwa kawononokeleko.
17 Yehova nambe ngwenyi: “Nangulinga chuma chize nachikulingisa utachikize ngwove ami yami Yehova.+ Nanguveta mbwechi ngunakwate mulivoko lyami hameya amuKalwiji Nyile, kaha meya nawalumuka nakupwa manyinga.
18 Vaishi vali muKalwiji Nyile navafwa, kaha kalwiji mwanuka livumba lyalipi chikuma, ngocho nachikaluhwila vaEjipitu kunwa meya amuKalwiji Nyile.”’”
19 Jino Yehova ambile kuli Mose ngwenyi: “Hanjika kuli Alone ngwove, ‘Mbata mbwechi yove nakwolola livoko lyove hameya amuEjipitu,+ hatulwiji twayo, nahatupila twayo,* nahavimbwetengele vyayo,+ nahavijiva vyayo, kaha meya osena nawalumuka nakupwa manyinga.’ Mulifuchi lyaEjipitu mwosena namupwa manyinga, namumilondo yavo yosena yamitondo nayize yamalolwa.”
20 Hahaze vene, Mose naAlone valingile nge muze avalwezele Yehova. Alone ambachile mbwechi nakuyiveta hameya amuKalwiji Nyile kumeso aFwalo navangamba jenyi, kaha meya osena mukalwiji alumukile nakupwa manyinga.+
21 Vaishi vaze vapwile mukalwiji vafwile,+ kaha kalwiji aputukile kunuka livumba lyalipi chikuma, ngocho vaEjipitu kavahashile kunwa meya amuKalwiji Nyileko.+ Lifuchi lyosena lyaEjipitu lyapwile namanyinga lika.
22 Oloze vapilishitu vaka-kulinga visava vamuEjipitu navakiko valingile vyuma vyovimwe navisava vyavo.+ Ngocho Fwalo akaluhwishile lika muchima wenyi, kaha kavevwililileko ngana muze ahanjikile Yehova.+
23 Jino Fwalo akindulukile kuzuvo yenyi, kahakile muchima kuchuma kanechiko.
24 Ngocho vaEjipitu vosena vapwilenga nakufula mashima kungenge yaKalwiji Nyile mangana vawaneko meya akunwa, mwomwo kavahashile kunwa meya amukalwiji Nyileko.
25 Mwahichile makumbi 7 kufuma haze Yehova alumwine meya amuKalwiji Nyile nakupwa manyinga.
Kwinyikila Chamwishi
^ Hepe., “ngunakulingisa kupwa uKalunga.”
^ Kulumbununa, tupila vakufuma haKalwiji Nyile.
