Kulovoka 8:1-32
8 Yehova ambile kuli Mose ngwenyi: “Yako kuli Fwalo ukamulweze ngwove, ‘Yehova nambe ngwenyi: “Suula vatu jami mangana vayenga vakanguzachile.+
2 Nge naukana lika kuvasuula, kaha nanguneha vizunda+ mulifuchi lyove lyosena.
3 MuKalwiji Nyile namuzala vizunda, kaha navakanduka nakwingila muzuvo yove, nakukapete kove kakusavala, nahakahela kove, namujizuvo javangamba jove, nahavatu jove, namujifwolonyi jove, namujindeho* jove jakuchikila mbolo.+
4 Vizunda naveza kuli ove, nakuli vatu jove, nakuli vangamba jove vosena.”’”
5 Jino Yehova ambile kuli Mose ngwenyi: “Lweza Alone ngwove, ‘Mbata mbwechi yove nakwolola livoko lyove hatulwiji, nahatupila twaNyile, nahavimbwetengele, mangana vizunda vakanduke hatunda mulifuchi lyaEjipitu.’”
6 Kaha Alone olwele livoko lyenyi hameya amuEjipitu, ngocho vizunda vaputukile kukanduka hatunda nakuzalisa lifuchi lyaEjipitu lyosena.
7 Oloze vapilishitu vaka-kulinga visava navakiko valingile vyuma vyovimwe navisava vyavo, kaha valingishile vizunda vakanduke hatunda mulifuchi lyaEjipitu.+
8 Jino Fwalo asanyikile Mose naAlone nakuvalweza ngwenyi: “Lembelelenu Yehova afumise vizunda kuli ami nakuli vatu jami,+ mwomwo nguli nakusaka jino kusuula vaIsalele mangana vayenga nakuhana Yehova vimuna vakuvatula.”
9 Jino Mose ambile kuli Fwalo ngwenyi: “Chili kuli ove kungulweza likumbi ngwatela kumulembelela afumise vizunda kuli ove, nakuli vangamba jove, nakuli vatu jove, namujizuvo jove. Oloze navakasala kaha muKalwiji Nyile.”
10 Kaha Fwalo ambile ngwenyi: “Hamene.” Ngocho Mose ambile ngwenyi: “Chipwenga vene nganomu unahanjika, mangana utachikize ngwove kakweshi weka wakuhambakana hali Yehova Kalunga ketuko.+
11 Vizunda navakafuma kuli ove, namujizuvo jove, nakuli vangamba jove, nakuli vatu jove. Oloze navakasala kaha muKalwiji Nyile.”+
12 Ngocho Mose naAlone vafumine kuli Fwalo, kaha Mose alembelelele Yehova afumise vaze vizunda anehelele Fwalo.+
13 Yehova alingile kweseka namuze alombele Mose, kaha vizunda vaputukile kufwa mujizuvo, namuvipango, namumande.
14 VaEjipitu vaputukile kukungulula nakulumbika vaze vizunda milumba milumba, kaha lifuchi lyaEjipitu lyaputukile kunuka livumba lyalipi.
15 Omu Fwalo amwene jino ngwenyi vizunda vanakumu, akaluhwishile cheka muchima+ wenyi nakukana kwivwilila Mose naAlone ngana muze ahanjikile Yehova.
16 Yehova ambile jino kuli Mose ngwenyi: “Lweza Alone ngwove, ‘Mbata mbwechi yove nakuyiveta hamavu, kaha lukungu nalwalumuka nakupwa tungunungunu mulifuchi lyaEjipitu lyosena.’”
17 Kaha valingile vene ngocho. Alone olwele livoko lyenyi nakuveta mbwechi hamavu, ngocho lukungu lwalumukile nakupwa tungunungunu mulifuchi lyaEjipitu lyosena. Vaze tungunungunu vaputukile kusuma vatu natunyama.+
18 Vapilishitu vaka-kulinga visava navakiko vesekele kulinga mwomumwe mangana valovole tungunungunu navisava vyavo,+ oloze vahonene. Kaha tungunungunu vasuminenga vatu natunyama.
19 Shikaho, vapilishitu vaka-kulinga visava vahanjikile kuli Fwalo ngwavo: “Echi vanachilingi nangolo jaKalunga.”*+ Oloze Fwalo akaluhwishile lika muchima wenyi, kaha kavevwililileko ngana muze ahanjikile Yehova.
20 Yehova ambile jino kuli Mose ngwenyi: “Hinduka chimenemene chino uyenga ukaliwane naFwalo. Tala, ali nakuya kulwiji, kaha ukahanjika kuli ikiye ngwove, ‘Yehova nambe ngwenyi: “Suula vatu jami mangana vayenga vakanguzachile.
21 Oloze nge naukana kusuula vatu jami, kaha nangutuma vikesu kuli ove, nakuli vangamba jove, nakuli vatu jove, namujizuvo jove. Mujizuvo jamuEjipitu namukazala navikesu, nahamavu hosena nahakapwa vikesu lika.
22 Halikumbi lize, nangukasezaho kaha ngalila yaNgoshene yize vali nakutwama vatu jami. Ngalila kana kayeshi kukapwa navikesuko,+ kaha naukatachikiza ngwove ami Yehova nguli mulifuchi lino.+
23 Nangukasolola chihandwa mukachi kavatu jami navatu jove. Chinjikizo kana nachikasoloka hamene.”’”
24 Yehova alingile vene ngocho. Mayongomena avikesu aputukile kwingila muzuvo yaFwalo namujizuvo javangamba jenyi namulifuchi lyaEjipitu lyosena.+ Shikaho vikesu+ venyekele lifuchi lyaEjipitu lyosena.
25 Kutwala muze, Fwalo asanyikile Mose naAlone nakuvalweza ngwenyi: “Yenu mukahane Kalunga kenu vimuna vakuvatula mulifuchi vene lino.”
26 Oloze Mose ambile ngwenyi: “Kacheshi kupwa chakwoloka kulinga ngochoko, mwomwo vimuna vakuvatula natuhana Kalunga ketu Yehova navevwisa unyengwe vaEjipitu.+ Uno nge vaEjipitu navatumona tuli nakuhana Kalunga vimuna vakuvatula vakuvevwisa unyengwe, kutala kaveshi kutwasa malolwako tahi?
27 Natutambuka ungeji wamakumbi atatu tuyenga mupambo, mangana tukahane Yehova Kalunga ketu vimuna vakuvatula kuze, ngana muze natulweze.”+
28 Jino Fwalo ambile ngwenyi: “Nangumisuula muyenga mukahane Yehova Kalunga kenu vimuna vakuvatula mupambo. Oloze kanda namuya kwakusuku chikumako. Ngulembelelenuko kuli Kalunga.”+
29 Kaha Mose ambile ngwenyi: “Omu nangufuma hano, nanguya nakulembelela Yehova, kaha hamene vikesu kaveshi kukapwa cheka kuli ove Fwalo, nakuli vangamba jove, nakuli vatu joveko. Oloze kanda nautwonga* cheka nakukana kusuula vaIsalele vayenga nakuhana Yehova vimuna vakuvatulako.”+
30 Mose afumine kuli Fwalo nakuya nakulembelela Yehova.+
31 Kaha Yehova alingile kweseka namazu aMose. Vikesu vafumine kuli Fwalo, nakuli vangamba jenyi, nakuli vatu jenyi. Kakwasalile chikesu numba umweko.
32 Chipwe ngocho, Fwalo akaluhwishile cheka muchima wenyi, kaha kasuwile vaIsalele vayengako.
