Kulovoka 9:1-35
9 Jino Yehova ambile kuli Mose ngwenyi: “Yako kuli Fwalo ukamulweze ngwove, ‘Yehova Kalunga kavaHepeleu nambe ngwenyi: “Suula vatu jami mangana vayenga vakanguzachile.+
2 Oloze nge nauvakakachila lika nakukana kuvasuula,
3 kaha livoko lyaYehova+ nalikwata havimuna jove vosena. Tuvalu, navimbulu, navangamela, navangombe, namikoko navapwa namusongo waupi.+
4 Yehova mwasolola chihandwa mukachi kavimuna javaIsalele navimuna javaEjipitu, kaha kuvimuna javaIsalele kakweshi kufwa numba umweko.”’”+
5 Yehova avulukile likumbi mwakalinga chuma kanechi, kaha ambile ngwenyi: “Hamene ami Yehova nangukalinga chuma kanechi mulifuchi.”
6 Ngocho likumbi lyakavangijileho Yehova alingile chuma kana, kaha vimuna javaEjipitu vosena vaputukile kufwa,+ oloze kuvimuna javaIsalele kakwafwile numba umweko.
7 Omu Fwalo atumine vatu jenyi vakamone vyuma vyasolokele, vawanyine kuvimuna javaIsalele kakwafwile numba umweko. Oloze Fwalo akaluhwishile lika muchima wenyi, kaha kasuwile vaIsalele vayengako.+
8 Jino Yehova ambile kuli Mose naAlone ngwenyi: “Zalisenu mavoko enu nauto wamulilungu, kaha Mose awase mwilu kumeso aFwalo.
9 Jino uze uto naukalumuka nakupwa lukungu mulifuchi lyaEjipitu lyosena, kaha luze lukungu nalukaneha mahute amapi kuvatu nakutunyama mulifuchi lyaEjipitu lyosena.”
10 Ngocho Mose naAlone vambachile uto wamulilungu nakwimana kumeso aFwalo. Mose awashile mwilu, kaha wanehele mahute amapi kuvatu nakutunyama.
11 Vapilishitu vaka-kulinga visava kavahashile kwimana kumeso aMoseko mwomwo yamahute aze avakwachile hohamwe navaEjipitu vosena.+
12 Oloze Yehova echelele Fwalo akaluhwise lika muchima wenyi, kaha kevwililile Mose naAloneko ngana muze Yehova alwezele Mose.+
13 Jino Yehova ambile kuli Mose ngwenyi: “Hinduka chimenemene chino uyenga nakwimana kumeso aFwalo nakumulweza ngwove, ‘Yehova Kalunga kavaHepeleu nambe ngwenyi: “Suula vatu jami mangana vayenga vakanguzachile.
14 Nangutuma vipupu kuli ove, nakuli vangamba jove, nakuli vatu jove, mangana utachikize ngwove hamavu hosena kaheshi weka wakunguhambakana amiko.+
15 Oholyapwa kachi ove navatu jove ngunamijihi lyehi namusongo waupi nakukunongesa* hano hamavu.
16 Oloze ngunakweche mangana ngukusolwele ngolo jami nakulingisa lijina lyami valivilike hamavu hosena.+
17 Noholyapwa uchili lika nakulivwimbila hali vatu jami nakukana kuvasuula vayenga tahi?
18 Hamene halwola vene nge luno, nangukanokesa vula yayinene yamalolwa yize kanda yinokengaho lyehi muEjipituko.
19 Shikaho, tuma vatu vanehe vimuna jove vosena navyuma vyove vyosena vili muchipapa vavingise mwakuvilamina. Vatu natunyama vosena vaze vali muchipapa, vaze navazeneka kupwa mujizuvo navafwa nge vula yamalolwa nayivanokela.”’”
20 Vangamba jaFwalo vaze vevwile woma mazu aYehova vanehele washiwashi vangamba javo navimuna javo nakuvengisa mujizuvo,
21 oloze vaze vahumbwile mazu aYehova vasezele vangamba javo navimuna javo muchipapa.
22 Yehova alwezele jino Mose ngwenyi: “Olola livoko lyove mwilu mangana vula yamalolwa yinoke mulifuchi lyaEjipitu lyosena,+ hali vatu, nahali tunyama, nahavyuma vyakusoka hamavu vyosena mulifuchi lyaEjipitu.”+
23 Mose olwele mbwechi yenyi mwilu, ngocho Yehova anehele mikalateta navula yamalolwa, kaha kakahya* kafumine mwilu nakuholokela hamavu. Yehova anokesele lika vula yamalolwa mulifuchi lyaEjipitu.
24 Kwapwile vula yamalolwa nakakahya kakulifutula navula yamalolwa. Vula kana yatohwele chikuma, kaha nawa kanda yichinokengaho lyehi mulifuchi lyaEjipituko.+
25 Ngocho yize vula yanongesele vyuma vyosena vize vyapwile muchipapa mulifuchi lyaEjipitu, vatu natunyama, navyuma vyakusoka hamavu vyosena, namitondo yosena.+
26 Mungalila yaNgoshene muze mwapwilenga vaIsalele mukiko kaha kamwanokele vula kanako.+
27 Jino Fwalo asanyikile Mose naAlone nakuvalweza ngwenyi: “Ngunetavila jino ngwami ngunalingi shili. Yehova noloka, oloze ami navatu jami yetu tunahengesa.
28 Mulembelelenu Yehova mangana akumise mikalateta navula yamalolwa. Kaha nangumisuula jino muyenga, kamweshi kutwama cheka munoko.”
29 Jino Mose ambile kuli Fwalo ngwenyi: “Omu nangufuma muno munganda, nanguya nakwolola mavoko ami kuli Yehova nakulomba. Kaha mikalateta nayikuma, navula yamalolwa nawa kayeshi kunoka chekako, mangana utachikize ngwove mavu apwa ambala aYehova.+
30 Olozenyi ngunatachikiza ngwami, ove navangamba jove kamweshi kwivwa Yehova Kalunga womako.”
31 Jino linyu* nambale yalyenyekele navula yamalolwa mwomwo mbale yapwile hiyinalovola lyehi mitwe kaha linyu nawa lyapwile hilinalovola lyehi jitemo.
32 Oloze tiliku nasepelete* kavyalyenyekele navula yamalolwako mwomwo halwola kana vyapwile kanda vichihye.*
33 Mose afumine munganda muli Fwalo, olwele mavoko enyi kuli Yehova nakulomba, ngocho mikalateta navula yamalolwa vyakumine, kaha vula yechele kunoka.+
34 Kahomu Fwalo amwene ngwenyi vula yamalolwa namikalateta vinakumu, alingile cheka shili hakukaluhwisa muchima+ wenyi hohamwe navangamba jenyi.
35 Akaluhwishile lika muchima wenyi nakukana kusuula vaIsalele vayenga, ngana muze Yehova ahanjikile kuhichila muli Mose.+
Kwinyikila Chamwishi
^ Chipwe “nakukulalisa.”
^ Pamo kulumbununa, muveso waunene.
^ Mutondo uze vatumbilenga kushikulu. Kaha wanda wawo vauzachishilenga kutunga mahina.
^ Sepelete himuyachi watiliku uze valiminenga muEjipitu.
^ Chipwe “mwomwo vyapwile mbuto jausula.”
