Kuputuka 11:1-32
11 Jino vaka-mavu vosena vahanjikilenga lilimi limwe namazu wowamwe.
2 Kahomu vayile chakutala kumututuko, vawanyine chana kungalila yaShinale,+ kaha vatwamine vene kuze.
3 Jino valihanjikishile mwavomwavo ngwavo: “Twayenu tufwatule tumenga, tuvochenu nakakahya.” Ngocho vazachishile tumenga muchishishisa chakuzachisa malolwa, kaha vazachishile nawa lingongwe kupwa ndaka.
4 Kaha vambile ngwavo: “Twayenu tutunge nganda yetu nakaposhi kaze nakaheta mwilu, kaha tufumakanyisenu lijina lyetu kuchina natulimwanga kwahita mavu kwosena.”+
5 Ngocho Yehova asulukile hamavu amone nganda nakaposhi vapwile nakutunga vana vavatu.
6 Yehova ambile ngwenyi: “Talenu! Vatu vanapu jino umwe, vosena vali nakuhanjika lilimi limwe,+ kaha vanaputuka nakulinga chuma kanechi. Kakweshi chuma chimwe navajina kulinga chize kaveshi kuhasa kutesamoko.
7 Twayenu+ tusuluke hamavu nakuluwanganyisa lilimi lyavo mangana mutu himutu ahone kwivwa lilimi lyamukwavo.”
8 Ngocho Yehova avasanjile hachihela kana, nakuvamwangila kumavu kwosena.+ Kutwala muze vechele kutunga yize nganda.
9 Shikaho vayilukile ngwavo Mbavele,*+ mwomwo kukiko Yehova aluwanganyishilile lilimi lyavaka-mavu vosena, kaha Yehova avasanjile nakuvamwangila kumavu kwosena.
10 Ou ukiko mujimbu waSheme.+
Sheme atwamine myaka 100, kaha asemene Alapakashate+ omu mwahichile myaka yivali kufuma haze lyakumine Livaji.
11 Omu Sheme alingile hanaseme lyehi Alapakashate, atwamine nawa myaka 500. Hamyaka kaneyi asemene vana vamalunga navava vamapwevo.+
12 Alapakashate atwamine myaka 35, kaha asemene Shela.+
13 Omu Alapakashate alingile hanaseme lyehi Shela, atwamine nawa myaka 403. Hamyaka kaneyi asemene vana vamalunga navava vamapwevo.
14 Shela atwamine myaka 30, kaha asemene Evele.+
15 Omu Shela alingile hanaseme lyehi Evele, atwamine nawa myaka 403. Hamyaka kaneyi asemene vana vamalunga navava vamapwevo.
16 Evele atwamine myaka 34, kaha asemene Pelenge.+
17 Omu Evele alingile hanaseme lyehi Pelenge, atwamine nawa myaka 430. Hamyaka kaneyi asemene vana vamalunga navava vamapwevo.
18 Pelenge atwamine myaka 30, kaha asemene Leu.+
19 Omu Pelenge alingile hanaseme lyehi Leu, atwamine nawa myaka 209. Hamyaka kaneyi asemene vana vamalunga navava vamapwevo.
20 Leu atwamine myaka 32, kaha asemene Selunge.
21 Omu Leu alingile hanaseme lyehi Selunge, atwamine nawa myaka 207. Hamyaka kaneyi asemene vana vamalunga navava vamapwevo.
22 Selunge atwamine myaka 30, kaha asemene Nahole.
23 Omu Selunge alingile hanaseme lyehi Nahole, atwamine nawa myaka 200. Hamyaka kaneyi asemene vana vamalunga navava vamapwevo.
24 Nahole atwamine myaka 29, kaha asemene Tela.+
25 Omu Nahole alingile hanaseme lyehi Tela, atwamine nawa myaka 119. Hamyaka kaneyi asemene vana vamalunga navava vamapwevo.
26 Tela atwamine myaka 70, kufumaho asemene Apalama,+ naNahole,+ naHalane.
27 Ou ukiko mujimbu waTela.
Tela asemene Apalama, naNahole, naHalane. Kaha Halane asemene Lote.+
28 Halane afwililile muUle+ mulifuchi lyavaKalateya,+ mungalila yize asemukilile, shimbu ise Tela achipwile nakuyoya.
29 Apalama naNahole vambachile mapwevo javo. Lijina lyapwevo lyaApalama apwile ikiye Salai,+ kaha lijina lyapwevo lyaNahole apwile ikiye Milika,+ mwanaHalane. Halane ikiye asemene Milika naIshika.
30 Oloze Salai kapwile navanako, apwile mumba.+
31 Tela akatukile muUle mulifuchi lyavaKalateya namwanenyi Apalama namuzukulyenyi Lote,+ mwanaHalane, nanayewenu Salai pwevo lyamwanenyi Apalama, nakuya kulifuchi lyaKanane.+ Jino omu vahetele muHalane,+ vatwaminenga vene muze.
32 Makumbi osena aze ayoyele Tela ahetele mumyaka 205. Kaha Tela afwililile muHalane.
Kwinyikila Chamwishi
^ Ulumbunwiso, “Kuluwangana.”
