Kuputuka 13:1-18
13 Kaha Apalama afumine kuEjipitu nakuya kuNengeve,+ napwevo lyenyi navyosena vize apwile navyo, naLote hamwe.
2 Apalama apichile vimuna vavavulu chikuma, kaha ahetele nawa palata yayivulu naulu wauvulu.+
3 Kaha hakufuma kuNengeve nakuya kuMbetele, ayilenga nakunungwojoka lika palanga nomu akahetele kuchihela kuze kwapwililile mbalaka yenyi hakavanga hakachi kaMbetele naAi,+
4 kuze nawa atungilile lijiko lyakulumbila hakavanga. Kuchihela kana kukiko Apalama apwile nakwalishilanga lijina lyaYehova.
5 Kaha Lote, uze ayilenga hamwe naApalama naikiye apichile mikoko, navangombe, najimbalaka.
6 Jino chihela chakutwama vosena hamwe chakehele mwomwo luheto lwavo lwavulile chikuma, kaha kavahashile kutwama hamweko.
7 Ngocho tufunga twavimuna jaApalama, natufunga twavimuna jaLote vaputukile kulikokojwesa. (Halwola kanelu, mulifuchi kana mwapwile nakutwama vaKanane navaPeliji.)+
8 Apalama ambile jino kuli Lote+ ngwenyi: “Etu katwatela kulikokojwesako, kaha tufunga twami natufunga twove nawa kavatela kulikokojwesako mwomwo muusoko wetu.
9 Shikaho tulihandunune. Unahase kusakula yeshoyo ngalila unasake. Nge muya kuchimoswe, kahami nanguya kuchilyo, oloze nge muya kuchilyo, kahami nanguya kuchimoswe.”
10 Ngocho Lote andwile meso enyi, kaha amwene ngalila yosena yaYotau+ ngwenyi hingalila yapwile nameya amavulu (shimbu kanda Yehova+ anongese Sotome naNgomola), kaha yapwile kwijiva nge milemba yaYehova, nge hilifuchi lyaEjipitu. Ngalila kana yayile swi nakuZowale.+
11 Jino Lote asakwile ngalila yosena yaYotau, kaha atutukile nakuya nakutwama kumututuko. Ngocho valihandunwine.
12 Apalama atwamine mulifuchi lyaKanane, oloze Lote atwaminenga kwakamwihi najinganda jamungalila yaYotau.+ Kutwala muze, Lote ajikile mbalaka yenyi kwakamwihi naSotome.
13 Jino vatu vakuSotome vapwilenga vakuhuka, vaka-shili chikuma kumeso aYehova.+
14 Jino omu Lote alingile hanahandunuka lyehi kuli Apalama, Yehova ambile kuli Apalama ngwenyi: “Andula meso ove, oho vene uli, utale kunote, nakusulo, nakumututuko, nakumulauko,
15 mwomwo lifuchi lyoseneli unamono, nangukalihana kuli ove nakuli vaka-tanga* yove likapwe luheto lwenu haya myaka yosena.+
16 Kaha vaka-tanga* yove nangukavavulisa nge usekeseke. Kachi nge mutu mwahasa kulava usekeseke wahamavu, kahanyi mwakahasa kulava navaka-tanga* yove.+
17 Katuka, yako utambwojoke mulifuchi, namuusuku walyo namuwihi walyo mwomwo lifuchi kana nangulihana kuli ove.”
18 Ngocho Apalama ayilenga nakunungwojoka nambalaka yenyi. Kutwala muze, ayile nakutwama kumitondo yayinene yakuMamele,+ muHevelone.+ Kaha atungile lijiko lyakulumbila wana kuli Yehova+ kuchihela kana.
