Kuputuka 14:1-24
14 Hamakumbi aze, Amalafwele mwangana waShinale,+ naAlyoke mwangana waElasale, naKetolamele+ mwangana waElame,+ naChitale mwangana waNgoyime,
2 vashile jita naMbela mwangana waSotome,+ naMbilisha mwangana waNgomola,+ naShinave mwangana waAtama, naShemevele mwangana waZevowime,+ namwangana waMbela, chipwe ngwavo Zowale.
3 Vamyangana kana* valikashile nakulikungulwila hamwe muChinema* chaShichime,+ chipwe ngwavo, Kalungalwiji waMungwa.*+
4 Ava vamyangana vakwavo* vazachililile Ketolamele hamyaka 12, oloze mumwaka wakusokesa 13 valikangile kuli ikiye.
5 Ngocho mumwaka wakusokesa 14, Ketolamele navamyangana vaze apwile navo hamwe, vayile nakufungulula vaLefwaime muAshatelote-kalanaime, navaZuze muHame, navaEme+ muShave-kilyataime,
6 navaHole+ kupili yavo yaSeile,+ swi nakuEle-palane chihela chakupambo.
7 Kaha vakindulukile nakuya kuEne-mishipate, chipwe ngwavo, Kateshe,+ kaha vatambwile ngalila yosena yavaAmaleke+ nakufungulula nawa vaAmole+ vaze vatwaminenga muHazazone-tamale.+
8 Halwola kanelu, mwangana waSotome akatukile nakuya kujita, hamwe kaha namwangana waNgomola, namwangana waAtama, namwangana waZevowime, namwangana waMbela, chipwe ngwavo Zowale, kaha valitanjikile muChinema* chaShichime mangana valwenga jita
9 naKetolamele mwangana waElame, naChitale mwangana waNgoyime, naAmalafwele mwangana waShinale, naAlyoke mwangana waElasale.+ Ava vamyangana vawana valwile jita navaze vamyangana vatanu.
10 Jino Chinema* chaShichime chapwile namena amavulu amanenekela. Kahomu vamyangana vaSotome naNgomola vapwile nakuchina, valindumukililenga mumena kana, kaha vaze valitulileho vachinyinyine kungalila yajipili.
11 Jino vaze vafungulwile vakwavo, vambachile vikumba vyosena vyamuSotome naNgomola navyakulya vyavo vyosena, kaha vayile.+
12 Vambachile nawa Lote, mwana ndumbwaApalama uze atwaminenga muSotome,+ navikumba vyenyi, kaha vayile.
13 Jino kwapwile mutu umwe achinyine nakuya nakulweza Apalama kaHepeleu. Halwola kana Apalama atwaminenga* kumitondo yaMamele kaAmole,+ ndumbwaEshekole naAnele.+ Ava malunga valikashile chivwasano naApalama.
14 Apalama evwile ngwavo kausoko* kenyi+ vanamukwate ufunge. Ngocho asanyikile vatu jenyi vakulongesa lyehi 318, vangamba vakusemukila muzuvo yenyi, kaha akavile vaze vatu swi nakuNdane.+
15 Kuheta naufuku, Apalama nalizavu lyavatu jenyi valipangile nakulukuka vaka-kole javo. Kaha avahangasanyine swi nakuHova, kunote yaNdamashiku.
16 Kaha atambwile vikumba vyosena, nakausoko kenyi Lote navikumba vyenyi, namapwevo vosena, navatu veka nawa.
17 Omu Apalama apwile nakukinduluka kuze ayile nakufungulula mwangana Ketolamele navamyangana vaze apwile navo, mwangana waSotome amukikililile kuChinema* chaShave, chipwe ngwavo, Chinema chaMwangana.+
18 Kaha Mekizeteke+ mwangana waSalema+ anehelele Apalama mbolo navinyo. Mekizeteke apwile kapilishitu kaKalunga Wakulitulaho Chikuma.+
19 Kaha amukiswile nakwamba ngwenyi:“Vamukisule Apalama kuli Kalunga Wakulitulaho Chikuma,Kalunga uze atengele melu namavu.
20 Vamwalisenga Kalunga Wakulitulaho Chikuma,Ou nahane vaka-kole jove mumavoko ove.”
Ngocho Apalama amuhanyine vyakusokesa mulikumi kuvyuma vyenyi vyosena.+
21 Kufumaho mwangana waSotome ambile kuli Apalama ngwenyi: “Nguhane ava vatu,* oloze vikumba mbata tuhu.”
22 Kaha Apalama ambile kuli mwangana waSotome ngwenyi: “Ngunolola livoko lyami nakulishinga kuli Yehova, Kalunga Wakulitulaho Chikuma, Ou atengele melu namavu
23 ngwami, kangweshi kumbata chuma chove numba chimweko, chipwe wanda chipwe vene muhya wamendelo, kuchina naukamba ngwove, ‘Ami yami ngunahetesa Apalama luheto.’
24 Vyuma ngunambateko shina vyavize vene vyakulya vanali lyehi vakweze jami. Olozenyi malunga ava vayanga hamwe nayami, vaAnele, naEshekole, naMamele,+ vambate chazano chavo.”
Kwinyikila Chamwishi
^ Chasoloka nge vamyangana kana shina ava vanavuluka muvesi 1.
^ Ikiye Kalungalwiji waKufwa.
^ Chipwe “muChana.”
^ Chasoloka nge ava vamyangana vakwavo shina ava vanavuluka muvesi 2.
^ Chipwe “muChana.”
^ Chipwe “Chana.”
^ Chipwe “atwaminenga mujimbalaka.”
^ Hepe., “ndumbwenyi.”
^ Chipwe “kuChana.”
^ Chipwe “myono.”
