Kuputuka 15:1-21
15 Omu vyakumine vyumevi, Yehova ahanjikile kuli Apalama muchakumumwenesa ngwenyi: “Apalama, kanda nawivwa womako.+ Ami ngunapu ngukepwe kuli ove.+ Fweto yove nayikapwa yayinene chikuma.”+
2 Apalama akumbulwile ngwenyi: “Ove Yehova Mwata Wakulitulaho, naunguhana ika hakuwana nge chingutwama lika chakuzeneka mwana, kahou mwakaswana zuvo yami nawa mutu wakuNdamashiku, Eliyeze?”+
3 Apalama ambile cheka ngwenyi: “Kawanguhanyine mwanako,*+ ngocho mutu* weka wakuzuvo yami ikiye mwanguswana.”
4 Oloze Yehova amukumbulwile ngwenyi: “Mutu kana keshi kukapwa swana yoveko, oloze mwanove* wakulisemena ove ivene ikiye mwakapwa swana yove.”+
5 Kalunga alowele Apalama haweluka nakumwamba ngwenyi: “Andula meso ove utale mwilu, kaha lava vatanganyika numba nge muvahasa.” Kaha amwambile ngwenyi: “Mukiko navakavula vaka-tanga* yove.”+
6 Apalama afwelelele Yehova,+ kaha vamuvulukile kupwa wakwoloka.+
7 Jino Kalunga ambile cheka ngwenyi: “Ami yami Yehova, uze akulowele munganda yaUle yavaKalateya nakukuhana lifuchi lino kupwa luheto lwove.”+
8 Ngocho, Apalama ambile ngwenyi: “Ove Yehova Mwata Wakulitulaho, nangutachikiza ngachilihi ngwami nangulitambula nakupwa luheto lwami?”
9 Kaha Kalunga amukumbulwile ngwenyi: “Ngukwachile ngombe wamyaka yitatu, napembe wachihwevo wamyaka yitatu, namukoko wamyaka yitatu, nakatela, namwanakakwilimba.”
10 Ngocho avambachile vosena, avavatwile muvihanda vivali vivali, kaha chihanda hichihanda achihakile kusali yachihanda chikwavo, oloze tujila kavavatwileko.
11 Jino tujila vaze veji kulyanga nyama vaputukile kuwila hamijimba yavaze tunyama vakufwa, kaha Apalama avahangilenga.
12 Omu likumbi lyapwile kwakamwihi nakulauka, Apalama asavalile chikuma tulo, kaha milima yayinene yakwivwisa woma yamuwanyinyine kutulo.
13 Jino Kalunga ambile kuli Apalama ngwenyi: “Ijiva chikupu ngwove vaka-tanga* yove navakapwanga vamwiza mulifuchi lyeka, kaha navakavakwata undungo nakuvayanjisa hamyaka 400.+
14 Oloze nangukasopesa vaka-lifuchi lize navakazachilanga,+ kufumaho navakalovokamo navikumba vyavivulu.+
15 Kahove naukafwa nakusuuluka mumyaka yaushinakaji wove.+ Navakakufunda nge muze vafunjile vakakuluka jove.
16 Oloze kuheta muchisemunwino chamuchiwana, vaka-tanga yove navakakinduluka cheka kuno,+ mwomwo jishili javaAmole kanda jiyangilile chikuma.”+
17 Omu lyalingile likumbi hilinalauka lyehi kaha nawa hikunelava wi, kwapwile lilungu lize lyafwinjile wishi, kaha mumunyi wakakahya wahichile mukachi kavihanda vyavaze tunyama vavatwile.
18 Halikumbi kana lize, Yehova ashikile Apalama lushiko+ ngwenyi: “Lifuchi lino+ nangukalihana kuli vaka-tanga* yove, kufuma kukalwiji kaEjipitu palanga nakukalwiji wamunene, Yufwalate,+
19 lifuchi lyavaKene,+ navaKenaze, navaKatamone,
20 navaHete,+ navaPeliji,+ navaLefwaime,+
21 naAmole, navaKanane, navaNgilingashe, navaYevuse.”+
Kwinyikila Chamwishi
^ Hepe., “mbutoko.”
^ Hepe., “mwana.”
^ Hepe., “ou wakulovoka mujimo lyove.”
^ Hepe., “mbuto.”
^ Hepe., “mbuto.”
^ Hepe., “mbuto.”
