Kuputuka 16:1-16
-
Hangale naIshimele (1-16)
16 Jino Salai pwevo lyaApalama kasemene vanako,+ oloze apwile nangamba yenyi wapwevo wakaEjipitu, lijina lyenyi ikiye Hangale.+
2 Kaha Salai ambile kuli Apalama ngwenyi: “Tala, Yehova nanguminyi lusemo. Shikaho, ove mwata, lisavale nandungo yami, pamo nangupwako navana kuhichila muli ikiye.”+ Ngocho Apalama evwililile mumazu apwevo lyenyi.
3 Omu Apalama alingile hanatwame lyehi myaka 10 mulifuchi lyaKanane, Salai ambachile ngamba yenyi wakaEjipitu Hangale nakumuhana kuli lunga lyenyi Apalama apwenga pwevo lyenyi.
4 Apalama alisavalile naHangale, kaha Hangale emichile lijimo. Jino omu Hangale amwene ngwenyi nemita lyehi lijimo, aputukile kulumbilisa kaka yenyi Salai.
5 Kaha Salai ambile kuli Apalama ngwenyi: “Ove yove unanehesa ukalu nguli nakumona. Ami yami ngwakuhanyine ngamba yami umukumbachile,* kaha ikiye hakumona ngwenyi nemita lyehi, naputuka jino kungulumbilisa. Ngocho Yehova atuyule amone ou nahengesa hali ami nayove.”
6 Oloze Apalama ambile kuli Salai ngwenyi: “Tala! Ou hingamba yove, ali mumavoko ove. Linga mweshomwo unamono ngwove mwamwaza.” Ngocho Salai ayanjishile Hangale, kaha Hangale achinyine.
7 Jino kangelo kaYehova amuwanyine kukaselwoke wameya apwile mupambo, mujila yakuya kuShule.+
8 Kaha amwambile ngwenyi: “Ove Hangale ngamba yaSalai, unafumu kulihi, kaha uli nakuya kulihi?” Ikiye ambile ngwenyi: “Nguli nakuchina kaka yami Salai.”
9 Uze kangelo kaYehova amwambile ngwenyi: “Hiluka kuli kaka yove, kaha kalinyise kuli ikiye.”
10 Kangelo kaYehova ambile nawa ngwenyi: “Nangukavulisa vaka-tanga* yove, nou mwakahasa kuvalava vene wauchi.”+
11 Kangelo kaYehova amwambile cheka ngwenyi: “Tala unemita lijimo, kaha naukasema mwana walunga, ukamuluka lijina ngwove Ishimele,* mwomwo Yehova nevu lyehi luyando lwove.
12 Ikiye mwakapwanga nge chimbulu wamuchipapa. Mwakapwanga nakole navatu vosena, kaha vatu vosena nawa navakapwanga nenyi nakole. Kaha mwakatwamanga kuze kwakulitalasana navandumbwenyi vosena.”*
13 Jino Hangale alishile lijina lyaYehova, uze apwile nakuhanjika kuli ikiye. Amwalishile ngwenyi: “Ove wapwa uKalunga muka-kumona,”+ mwomwo alyambile ngwenyi: “Ngunamono uze eji kungumonanga.”
14 Shikaho lize lishima valivulukilile ngwavo Mbele-lahai-loi.* (Lyatwama hakachi kaKateshe naMbelete.)
15 Hangale asemene mwana walunga naApalama, kaha Apalama alukile uze mwanenyi ngwenyi ikiye Ishimele.+
16 Apalama apwile namyaka yakusemuka 86 halwola Hangale asemene nenyi Ishimele.
Kwinyikila Chamwishi
^ Hepe., “umuhake hatulo yove.”
^ Hepe., “mbuto.”
^ Ulumbunwiso, “Kalunga Eji Kwivwanga.”
^ Chipwe pamo, “Kaha atwaminenga nakole navandumbwenyi.”
^ Ulumbunwiso, “Lishima lyaYou Ayoya Eji Kungumonanga.”
