Kuputuka 18:1-33
18 Kufumaho, Yehova+ alisolwele kuli Apalahama kumitondo yayinene yakuMamele+ halwola atwamine kuchikolo chambalaka yenyi omu likumbi lyapwile hamulungu.
2 Jino andwile meso enyi, kaha amwene malunga vatatu vanemana hahasuku,+ ngocho akatukile kuchikolo chambalaka yenyi nakuvalahila, kahomu avawanyine afukamine hamavu.
3 Kaha ambile ngwenyi: “Ove Yehova, kachi nge unangwivwila uselewa, kaha kanda unguhambakana ami ngamba yoveko.
4 Vandaminenu vaminehele tumeya mangana vamisanyise kuvilyachilo vyenu,+ kufumaho munoke jino mwishi yamutondo.
5 Hakuwana nge muneza kuli ami ngamba yenu, manenu nguminehele mbolo mulyenga mangana mulihizumune.* Kufumaho numbanyi muyenga ungeji wenu.” Ngocho vamwambile ngwavo: “Chamwaza. Linga nganomu unambe.”
6 Apalahama ayile washiwashi nakwingila mumbalaka muli Sala nakumulweza ngwenyi: “Zanguwisako. Wahisa vyesekelo* vyaunga wamwaza vitatu, kaha uchike nakwocha jimbolo.”
7 Kufumaho Apalahama alahilile kuutanga wavangombe, ambachileko mwanangombe wamwaza wakununa nakumuhana kuli ngamba yenyi, kaha amuwahishile washiwashi.
8 Apalahama ambachile mateka, namavele, nanyama yangombe yize awahishile nakuvahana valyenga. Kaha ikiye emanyine kwakamwihi navakiko mwishi yamutondo omu vapwile nakulya.+
9 Kaha vamwambile ngwavo: “Pwevo lyove Sala+ ali kulihi?” Ikiye akumbulwile ngwenyi: “Ali mumbalaka.”
10 Ngocho minavo umwe ambile ngwenyi: “Chikupu vene nangukakinduluka cheka kuli ove mwaka nawizaho halwola vene nge luno. Kaha tala, pwevo lyove Sala mwakasema mwana walunga.”+ Jino Sala apwile nakwivwilila muchikolo chambalaka yapwile kunyima yauze lunga apwile nakuhanjika.
11 Apalahama naSala vapwile hivanakulu lyehi, vapwile hitushinakaji.+ Kaha Sala apwile hanahambakana lyehi hamyaka yakusema vana.*+
12 Ngocho Sala aputukile kuseha mumuchima wenyi nakwamba ngwenyi: “Kutala ngunahase kupwa cheka nachipepa chamwana okunyi ami ngunazeye lyehi, kaha nawa mwata wami hanakulu lyehi?”+
13 Yehova ambile kuli Apalahama ngwenyi: “Mwomwo ika Sala nasehela nakwamba ngwenyi: ‘Kutala ngunahase kusema mwana muushinakaji tahi?’
14 Kutala kuli chuma mwahona kulinga Yehova numba?+ Nangukakinduluka cheka kuli ove mwaka nawizaho halwola vene nge luno, kaha Sala mwakasema mwana walunga.”
15 Oloze Sala ahamikile ngwenyi: “Kangwaseheleko.” Ahamikile mwomwo evwile woma. Kaha Kalunga ambile ngwenyi: “Nduma, wasehanga.”
16 Vaze malunga vakatukile nakuya, vatalikishile kuSotome,+ kaha Apalahama apwile nakuvashinjikiza.
17 Yehova ambile ngwenyi: “Kangweshi kuswekela Apalahama vyuma nguli nakusaka kulingako.+
18 Apalahama mwakapwa chikupu muyachi waunene wangolo, kaha vaka-mafuchi ahamavu vosena navakavakisula kuhichila muli ikiye.+
19 Mwomwo ngunalikate naApalahama mangana akanangule vana venyi navaka-tanga yenyi vaze navakeza hanyima yenyi vakalamenga jila yaYehova hakulinganga mwakwoloka nakukava mwaya chiyulo chenyi,+ mangana Yehova atesemo vyosena vize ashikile Apalahama.”
20 Jino Yehova ambile ngwenyi: “Miteto vali nakulitetelela haSotome naNgomola yinasweze chikuma,+ kaha shili yili mujinganda kaneji yinatoho chikuma.+
21 Ngocho nanguyako ngumone numba nge vyuma vali nakulitetelelaho vyamuchano. Nangusaka ngutachikize vyuma kanevi.”+
22 Vaze malunga vafumine jino kuze nakutalikisa kuSotome, oloze Yehova+ asalile naApalahama.
23 Jino Apalahama apandamine kuli ikiye nakwamba ngwenyi: “Uno naukanongesa vaka-kuhuka navaka-kwoloka hamwe tahi?+
24 Ngachilihi nge munganda kana naukawanamo vatu vakwoloka 50, kutala naukayinongesa yosena tahi, nyi naukayitetela mwomwo yavaze vatu 50 vakwoloka valimo?
25 Ove kaweshi kuhasa kujiha muka-kwoloka namuka-kuhuka hamweko nakulingisa jino muka-kwoloka atambule fweto yoyimwe namuka-kuhuka.+ Kaweshi kuhasa kulinga ngochoko.+ Kutala Muka-kuyula vaka-mavu vosena mwahona kulinga mwamwaza numba?”+
26 Jino Yehova ambile ngwenyi: “Nge nangukawana vatu vakwoloka 50 munganda kana, kaha nangukayikonekela yosena mwomwo yavakiko.”
27 Oloze Apalahama akumbulwile cheka ngwenyi: “Ngunomika nakuhanjika kuli ove Yehova numba tuhu ngulukungu, kaha nawa nguuto.
28 Kachi nge havatu vakwoloka 50 nahakalihona vatanu, kutala naukanongesa nganda yosena mwomwo hanalihono vatu vatanu tahi?” Kaha ikiye ambile ngwenyi: “Kangweshi kukayinongesako kachi nge nangukawanamo vatu vakwoloka 45.”+
29 Apalahama ahanjikile cheka kuli ikiye ngwenyi: “Ngachilihi nge naukawanamo vatu 40?” Kaha amukumbulwile ngwenyi: “Kangweshi kukayinongesako mwomwo yavaze 40.”
30 Apalahama ambile ngwenyi: “Ove Yehova kanda upihililako,+ ngwitavise nguhanjike lika. Ngachilihi nge mukawanamo vatu vakwoloka 30 kaha?” Ikiye amukumbulwile ngwenyi: “Kangweshi kukayinongesako nge nangukawanamo vatu 30.”
31 Apalahama ambile lika ngwenyi: “Ngunomika nakuhanjika kuli ove Yehova. Ngachilihi nge mukawanamo vatu vakwoloka 20 kaha?” Ikiye amukumbulwile ngwenyi: “Kangweshi kukayinongesako mwomwo yavaze 20.”
32 Kukuminyinako ambile ngwenyi: “Ove Yehova, kanda upihililako, ngwitavise nguhanjike jino kamakumishilo. Ngachilihi nge mukawanamo vatu vakwoloka 10 kaha?” Ikiye amukumbulwile ngwenyi: “Kangweshi kukayinongesako mwomwo yavaze 10.”
33 Omu Yehova akumishile kuhanjika naApalahama, aliyililile kwenyi,+ kaha Apalahama nawa akindulukile kwimbo lyenyi.
Kwinyikila Chamwishi
^ Hepe., “mujikijise michima yenu.”
^ Hepe., “Wahisa vyesekelo vyashiya.” Shiya yimwe yapwile jilita 7.33. Tala Chihande B14.
^ Hepe., “Sala alitwaminyinyine kulinga nge muze valingilenga vakwavo mapwevo.”
