Kuputuka 19:1-38
19 Vaze vangelo vavali vahetele muSotome nachingoloshi, kaha halwola kana luze Lote atwamine kuchikolo chaSotome. Omu avamwene, akatukile nakuvakikilila, kaha afukamine chameso hamavu.+
2 Avambile ngwenyi: “Enu vamyata jami, achitavenu mwingile muzuvo yayami ngamba yenu mutwamemo ufuku umwe, nangumisanyisa nawa kuvilyachilo vyenu. Kahomu nakucha numbanyi muyenga ungeji wenu.” Oloze vamwambile ngwavo: “Nduma, natutwama ufuku wosena kuchihela chize chasanga.”
3 Lote avashinjilile chikuma, kaha vayile hamwe kuzuvo yenyi. Ngocho avawahishilile vyakulya, nakuvochela mbolo yakuzeneka chimbalwila, kaha valile.
4 Oloze shimbu vapwile kanda vachisavale, malunga vosena vamunganda yaSotome, vanyike navakulwane, vajingilikile zuvo yaLote.
5 Kaha vatambikilenga Lote ngwavo: “Ava malunga vaneza kuli ove naufuku uno vali kulihi? Tulowelevo mangana tulisavale navo.”+
6 Jino Lote alovokele kuli vakiko nakusoka kuchikolo.
7 Kaha avambile ngwenyi: “Enu vandumbwami, ngunasakwililako, kanda namulinga vyavipiko.
8 Talenu, nguli navana vami vamapwevo vavali vaze kanda valisavaleho lyehi namalunga. Manenu ngumilowelevo, muvalinge mweshomwo munasake enu vavene. Oloze ava malunganyi kanda namuvalinga mumweko, mwomwo vaneza kuzuvo* yami.”+
9 Oloze vakiko vamwambile ngwavo: “Fuma kuchikolo!” Kaha vambile cheka ngwavo: “Ou mutu ejile kaha nakuzuzumana kuno, oloze mwasaka atuyule. Ove yove natuzangamisa chikuma kuhambakana vakiko.” Kaha vamushindakanyine chikuma Lote nakusaka kachi vapazule lipito.
10 Jino vaze malunga vapwile muzuvo volovelele Lote nakumukokela muzuvo nakusoka kuchikolo.
11 Kaha vavetele vatu vaze vapwile kuchikolo naupuputa, vatu vamokomoko navava vavalemu vosena, ngocho vatu kana vakatalile nakutondatonda kuchikolo.
12 Jino vaze malunga vambile kuli Lote ngwavo: “Kutala uli navakwenu veka muno munganda tahi? Mbata vaisowenu, navana vove vamalunga navava vamapwevo, naveshovo uli navo, mulovoke muno munganda.
13 Nganda yino natuyinongesa mwomwo miteto vanalitetelela vatu hanganda yino yinevwakana chikuma kuli Yehova,+ ngocho Yehova natutumu tuyinongese.”
14 Kaha Lote ayile kuli vaisewenu vaze vasakile kumbata vana venyi, avalwezele ngwenyi: “Katukenu. Fumenu muchihela chino mwomwo Yehova mwanongesa nganda yino.” Oloze vaisewenu vamumwene nge ali nakuseseka kaha.+
15 Jino kulungulungu lyakucha, vaze vangelo valwezele Lote anguhwise ngwavo: “Katuka! Mbata pwevo lyove navana vove vamapwevo vavali muyenga, kuchina namufwa omu navanongesa vatu vamunganda yino hajishili javo.”+
16 Oloze shimbu apwile nakulangisa, Yehova amwivwilile keke,+ kaha vaze malunga vakwachile kulivoko lyenyi nakulivoko lyapwevo lyenyi nakumavoko avana venyi vamapwevo vavali, kaha vamulowele nakumutwala kuweluka wanganda.+
17 Kahomu valingile hivanavalovola lyehi kuweluka, umwe ambile ngwenyi: “China ulwile mwono wove. Kanda utala kunyimako,+ chipwe kwimana hachihela chimwe mungalila yinoko.+ Chinyina kungalila yajipili kuchina naunonga.”
18 Jino Lote avambile ngwenyi: “Ove Yehova, kuzenyi chiku mwane.
19 Tala, ami ngamba yove unangwivwila uselewa, kaha unangusolwela likoji lyalinene* hakuyovola mwono wami.+ Oloze kangweshi kuhasa kuchinyina kungalila yajipiliko kuchina lupi nalukanguwana, kaha nangukafwa.+
20 Tala, kuli mbongi yimwe mwakamwihi, kaha ngunahase kuchinyinako. Yikiko himbongi yayindende kaha. Uno mungwitavisa nguchinyineko tahi? Mwomwo yikiko himbongi yayindende kaha. Nge mungwitavisa, kaha nanguyovoka.”*
21 Ngocho amwambile ngwenyi: “Chamwaza. Ngunakwitavisa,+ kaha kangweshi kunongesa mbongi unavulukako.+
22 Chinyina kuze washiwashi, mwomwo kangweshi kulinga chuma numba chimweko kuvanga unahete kuze.”+ Shikaho alukilile lijina lyambongi kana ngwenyi Zowale.*+
23 Lote ahetele kuZowale omu lyalingile likumbi hilinatutuka lyehi.
24 Jino Yehova anokesele vula yasulufulu nakakahya haSotome naNgomola. Vula kana yafumine mwilu, kuli Yehova.+
25 Ngocho anongesele jinganda kana, nangalila yosena, navatu vosena vamujinganda kana, navyuma vyakusoka hamavu vyosena.+
26 Oloze pwevo lyaLote uze apwile munyima atalile kunyima, kaha alumukile kaumbu kamungwa.+
27 Jino Apalahama amenekele chimenemene nakuya kuze ahanjikilile naYehova+ hakavanga.
28 Kaha atalile kuSotome naNgomola nangalila yosena, ngocho amwene vyuma vyakukomwesa. Amwene wishi uli nakufwinda nge wishi walilungu.+
29 Hakunongesa jinganda jamungalila kana, Kalunga anukile Apalahama, ngocho alowele Lote mujinganda muze atwaminenga nakujinongesa.+
30 Kutwala muze, Lote afumine kuZowale navana venyi vamapwevo vavali nakuya nakutwama jino kungalila yajipili+ mwomwo evwile woma kutwama muZowale.+ Kaha atwaminenga muwina wakusendeveka navana venyi vamapwevo vavali.
31 Jino mwanenyi watwatwa ambile kuli songo yenyi ngwenyi: “Setu nashinakaja lyehi, kaha kakweshi lunga kuchihela chino mwalisavala nayetu kweseka nachisemwa chavaka-mavu vosenako.
32 Tuyenga tuhane setu vinyo anwenga, tulisavale nenyi mangana tulame mbuto yasetu.”
33 Ngocho naufuku, vanwishile sevo vinyo, kaha mwanenyi watwatwa ayile nakulisavala naise. Oloze ise katachikijile omu ejile mwanenyi nakusavala nomu ahindukileko.
34 Jino omu kwachele, uze mwana watwatwa ambile kuli songo yenyi ngwenyi: “Ami ngwalisavalanga natata ufuku wazau. Tumuhane cheka vinyo naufuku walelo. Kaha nayove nawa uyenga ulisavale nenyi mangana tulame mbuto yasetu.”
35 Kaha naufuku uze, vanwishile sevo vinyo, kaha mwanenyi wakanyike ayile nakulisavala naise. Oloze ise katachikijile omu ejile mwanenyi nakusavala nomu ahindukileko.
36 Ngocho vana vaLote vamapwevo vosena vavali vemichile majimo akuli sevo.
37 Mwanenyi watwatwa asemene mwana walunga, kaha amulukile lijina ngwenyi Mowave.+ Ikiye sevo yavaMowave kuheta nakulelo lino.+
38 Kaha mwanenyi wakanyike nawa asemene mwana walunga, kaha amulukile lijina ngwenyi Mbenami. Ikiye sevo yavaAmone+ kuheta nakulelo lino.
Kwinyikila Chamwishi
^ Chipwe “vaneza nguvakinge.” Hepe., “mumuvule.”
^ Chipwe “zangi yakwilila.”
^ Chipwe “kaha mwono wami kaweshi kufwako.”
^ Ulumbunwiso, “Kukeha.”
