Kuputuka 20:1-18
-
Sala navamupululula mumavoko aAvimeleke (1-18)
20 Apalahama atutukile kuze+ nakuya kungalila yaNengeve, kaha atwaminenga hakachi kaKateshe+ naShule.+ Kahomu atwaminenga* nawa muNgelale,+
2 Apalahama ahanjikile cheka hali pwevo lyenyi Sala ngwenyi: “Ou hindumbwami.”+ Ngocho Avimeleke mwangana waNgelale atumine vatu vakambate Sala.+
3 Kufumaho Kalunga ejile kuli Avimeleke muchilota naufuku nakumwamba ngwenyi: “Tala, naufwa hali ou pwevo unambate,+ mwomwo asomboka lyehi, kaha hipwevo lyambala.”+
4 Avimeleke kalisavalile nenyiko. Ngocho ambile ngwenyi: “Ove Yehova, kutala naujiha vatu vaze kaveshi namulongako* nyi?
5 Uno ou lunga kangulwezanga ngwenyi, ‘Ou hindumbwamiko’ numba? Kaha ou pwevo nawa kambanga ngwenyi, ‘Ou hindumbwamiko’ numba? Chuma kana ngwachilinganga nachivezu chitoma, kaha kangwatachikizanga nawa ngwami nanguvulumuna mulongako.”
6 Jino Kalunga wamuchano amwambile muchilota ngwenyi: “Ngunatachikiza vene ngwami walinganga chuma kana nachivezu chitoma, kahami nawa ngwakukinganga kuchina naulinga shili. Shikaho ngwazenekelanga kukwitavila ulisavale nenyi.
7 Ngocho mukindulwishile Apalahama pwevo lyenyi, mwomwo ikiye hikapolofweto,+ kaha mwakulombela+ nauyoya. Oloze nge kaweshi kumukindulwisako, kaha tachikiza ngwove naufwa chikupu, navaze vakuzuvo yove vosena hamwe.”
8 Avimeleke ahindukile chimenemene, asanyikile vangamba jenyi vosena nakuvalweza vyuma vyosenevi. Kaha vevwile woma chikumakuma.
9 Jino Avimeleke asanyikile Apalahama nakumwamba ngwenyi: “Ika unalingila chuma kanechi? Chuma muka ngunakuvulumuna numba unehese mulonga waunene washili hali ami nahawangana wami? Chuma unalingi kachawahileko.”
10 Kaha Avimeleke ahanjikile cheka kuli Apalahama ngwenyi: “Ika wajinanga numba ulinge chuma kanechi?”+
11 Apalahama ambile ngwenyi: “Mwomwo ngwashinganyekanga ngwami, ‘Vatu vakuno kavevwa Kalunga womako, ngocho navangujiha mwomwo yapwevo lyami.’+
12 Kaha nawa ikiye apwa hindumbwami vene, setu umwe oloze manetu valihandununa. Kaha ngwamumbachile kupwa pwevo lyami.+
13 Ngocho omu Kalunga angufumishile kuzuvo yatata nguyenga nakutambwojoka,+ ngwambile kuli pwevo lyami ngwami, ‘Mungusolwela zangi yakwilila kachi nge munguvuluka kweshokwo natuya ngwove: “Ou hindumbwami.”’”+
14 Jino Avimeleke ambachile mikoko navangombe navangamba vamalunga navava vamapwevo, avahanyine kuli Apalahama nakumukindulwishila nawa pwevo lyenyi Sala.
15 Kaha Avimeleke amwambile ngwenyi: “Tala, ngalila yosena yino yinapu yami. Twama kweshokwo unasake.”
16 Kaha ambile nawa kuli Sala ngwenyi: “Ngunahane ndumbwove+ jimbongo japalata 1,000. Jinapu hichinjikizo chakusolola kuvatu jove nakuvatu vosena nge kaweshi namulongako, kaha nawa kawasaukileko.”
17 Jino Apalahama alembelelele Kalunga wamuchano, kaha Kalunga ahindwile Avimeleke napwevo lyenyi navandungo jenyi vamapwevo, kaha vaputukile kusema vana.
18 Mwomwo Yehova asokele lusemo lwamapwevo vakuzuvo yaAvimeleke mwomwo yaSala, pwevo lyaApalahama.+
