Kuputuka 21:1-34
21 Yehova anukile Sala nge muze amulwezele, kaha Yehova amulingilile Sala vyuma amushikile.+
2 Ngocho Sala emichile lijimo,+ kaha asemene mwana walunga naApalahama omu apwile kashinakaji. Vyuma kanevi vyalingiwile halwola vene luze vamushikile+ Apalahama kuli Kalunga.
3 Apalahama alukile lijina uze mwana asemene naSala ngwenyi, Isaka.+
4 Kaha Apalahama ajihanyine mwanenyi Isaka omu apwile namakumbi akusemuka 8 nge muze vamulwezele kuli Kalunga.+
5 Apalahama apwile namyaka yakusemuka 100 omu asemukile mwanenyi Isaka.
6 Kaha Sala ambile ngwenyi: “Kalunga nangulingisa ngusehelele, kaha weshowo mwevwako mwasehelela hamwe nayami.”*
7 Ambile nawa ngwenyi: “Iyaze ahashile kuhanjika kuli Apalahama ngwenyi ‘Sala mwakamwisa mwana’? Oloze ngunaseme nenyi mwana muushinakaji wenyi.”
8 Jino uze mwana akolele, kaha vamusumwine. Ngocho Apalahama awahishile chiwanyino chakulya chachivulu halikumbi lize vasumwine Isaka.
9 Oloze Sala amwenenga mwanaHangale+ kaEjipitu uze asemene naApalahama mwahenda Isaka.+
10 Ngocho ambile kuli Apalahama ngwenyi: “Muhange ou ndungo wapwevo namwanenyi hamwe, mwomwo mwana wayou ndungo keshi kukapwa swana namwanami Isaka hamweko.”+
11 Oloze mazu ahanjikile Sala halyou mwana evwishile Apalahama kupihya.+
12 Jino Kalunga ambile kuli Apalahama ngwenyi: “Kanda nawivwa kupihya havyuma ali nakukulweza Sala hali ou mwana nahali ndungo yove wapwevoko. Mwivwilile* mwomwo vaze navakavuluka ngwavo vaka-tanga* yove navakafuma muli Isaka.+
13 Kaha nakuli mwana+ wayou ndungo wapwevo+ nawa, nakukafuma muyachi waunene mwomwo naikiye napu mwanove.”*
14 Apalahama ahindukile chimenemene, ambachile mbolo natuku yameya nakuvihana kuli Hangale. Amutwikilevyo hachifwiji nakumusuula ayenga namwanenyi hamwe.+ Kaha Hangale akatukile, ayile nakulumbwangila mupambo yaMbele-sheva.+
15 Jino meya aze apwile mutuku akumine, kaha Hangale atumbikile mwanenyi mwishi yachiputa.
16 Kaha ikiye ayile nakutwama kwauka wenyi, kafwe tunda yakweseka hamwe nakuze nakuholokela mwivwi wakwasa, mwomwo ambile ngwenyi: “Kangweshi nakusaka kumona omu mwafwa mwanamiko.” Ngocho atwamine hahasuku, kaha aputukile kulila nalizu lyakukanguka.
17 Jino Kalunga evwile lizu lyauze kanyike walunga,+ kaha kangelo kaKalunga mwilu atambikile Hangale nakumwamba ngwenyi:+ “Ove Hangale, uli nakulila ika? Kanda nawivwa womako, mwomwo Kalunga nevu lizu lyauze kanyike walunga kuze ali.
18 Katuka, yako umukatule, kaha mukwachilile, mwomwo nangukamulingisa kupwa muyachi waunene.”+
19 Jino Kalunga amutonesele meso, kaha amwene lishima lyameya. Ngocho Hangale ayile kuze kulishima, azalishile tuku yenyi nameya nakuhana uze kanyike walunga anwenga.
20 Kalunga apwilenga nauze kanyike walunga+ omu akolelenga. Uze kanyike atwaminenga mupambo, kaha apwile muka-kwasa uta wamanana.
21 Atwaminenga mupambo yaPalane,+ kaha naye amumbachilile pwevo wakulifuchi lyaEjipitu.
22 Halwola kana luze, Avimeleke naFwikole kapitau kamaswalale jenyi vambile kuli Apalahama ngwavo: “Tunamono ngwetu Kalunga ali nayove muvyuma vyosena uli nakulinga.+
23 Ngocho lishinge Kalunga ngwove kaweshi kukangwongako, chipwe kukonga vana vami navazukulu jamiko. Kaha nawa ngwove nausololanga zangi yakwilila kuli ami nakuli vaka-lifuchi lino uli nakutwama nganomu ngunakusolwelalyo ami.”+
24 Kaha Apalahama ambile ngwenyi: “Ngunalishingi kulinga ngocho.”
25 Jino Apalahama ayayavalile kuli Avimeleke halishima lyameya lize vamunyangile kuli vangamba jaAvimeleke.+
26 Oloze Avimeleke amukumbulwile ngwenyi: “Kangwatachikijile ou nalingi chuma kanako, kahove nawa kawangulwezeleko. Chuma kana chechi vene ngunevu likumbi lyalelo.”
27 Apalahama ambachile mikoko navangombe nakuvahana kuli Avimeleke, kaha vosena vavali valikashile chivwasano.
28 Jino Apalahama ambachile mikoko vavihwevo 7 nakuvahaka hauka wavo.
29 Kaha Avimeleke ambile kuli Apalahama ngwenyi: “Mwomwo ika unambachila ava mikoko vavihwevo 7 nakuvahaka hauka wavo?”
30 Ikiye ambile ngwenyi: “Ava mikoko vavihwevo 7 uvatambula kulivoko lyami vapwenga unjiho wakusolola nge ami yami ngwafulile lino lishima.”
31 Shikaho alukilile chihela kana ngwenyi Mbele-sheva,*+ mwomwo kuze kukiko valishingilile lushingo vosena vavali.
32 Ngocho valikashile chivwasano+ kuMbele-sheva, kaha Avimeleke naFwikole kapitau kamaswalale jenyi, vakindulukile kulifuchi lyavaFwilishite.+
33 Kufumaho Apalahama atumbile mutondo wamutamalishike kuMbele-sheva, kaha kuze kukiko apwile nakwalishilanga lijina lyaKalunga wahaya myaka yosena,+ Yehova.+
34 Kaha Apalahama atwaminenga* lwola lwalusuku* mulifuchi lyavaFwilishite.+
Kwinyikila Chamwishi
^ Chipwe pamo, “weshowo mwevwako mwanguseha.”
^ Hepe., “Ivwilila mulizu lyenyi.”
^ Hepe., “mbuto.”
^ Hepe., “mbuto.”
^ Ulumbunwiso, “Lishima lyaLushingo; Lishima lyaVatanu naVavali.”
^ Chipwe “atwaminenga mwamwiza.”
^ Hepe., “atwaminenga makumbi amavulu.”
