Kuputuka 23:1-20
-
Sala mwafwa, fuka (1-20)
23 Sala atwamine myaka 127. Eyi yikiko myaka ayoyele Sala.+
2 Sala afwililile kuKilyate-alava,+ chipwe ngwavo Hevelone,+ mulifuchi lyaKanane.+ Kaha Apalahama alishonene nakulila Sala.
3 Jino Apalahama akatukile kuze kwapwile mujimba wapwevo lyenyi, kaha ayile nakuhanjika kuli vana vaHete+ ngwenyi:
4 “Ami ngunapu ngumwiza, ngumuka-kuzuzumana muli enu.+ Ngocho nguhanenuko mavu apwenga fuka, mangana ngufundeho chivimbi chami.”
5 Kaha vana vaHete vamukumbulwile Apalahama ngwavo:
6 “Ove mwata wetu achitwivwilile. Ove unapu uchilolo chaKalunga* muli etu.+ Lisakwile fuka yamwaza kujifuka jetu mangana ufundeko chivimbi chove. Muli etu kamweshi umwe mwakana kukuhana fuka yenyi mangana ufundemo chivimbi choveko.”
7 Ngocho Apalahama akatukile, kaha alifukwile kuli vana vaHete,+ venya-lifuchi lize.
8 Ambile kuli vakiko ngwenyi: “Nge enu* munetavila ngwenu ngufunde chivimbi chami, kaha achingwivwililenu mwane. Nguhanjikilenuko kuli Efwelone mwanaZohale,
9 mangana angulanjise wina wenyi wakusendeveka wakuMakapela uze uli kungiza yamavu enyi. Angulanjisewo hameso enu najimbongo japalata+ mwangutomena mangana upwenga wami wakufunda vafu jami.”+
10 Jino Efwelone naikiye kwapwile, atwamine hamwe navana vaHete. Kaha Efwelone kaHete akumbulwile Apalahama oku navana vaHete vali nakwivwako, navosena vaze vengililenga kuchikolo changanda,+ ngwenyi:
11 “Nduma, ove mwata wami. Achingwivwilile mwane. Nangukuhana namavu nawina wakusendeveka uliho. Nangukuhanavyo kumeso avatu vakumuyachi wami. Ijiva tuhu kufunda chivimbi chove.”
12 Ngocho Apalahama alifukwile kuli venya-lifuchi lize,
13 nakuhanjika kuli Efwelone oku navatu vali nakwivwako, ngwenyi: “Kachi nge nawitavila, achingwivwilile mwane. Nangukuhana jimbongo japalata mungutomena jakulanda mavu kana. Jitambule mangana ngufunde chivimbi chami.”
14 Efwelone amukumbulwile Apalahama ngwenyi:
15 “Ove mwata wami, achingwivwilile. Awa mavu ndando yawo yineseka mujishekele* japalata 400. Olozenyi chihande chandando kacheshi chachilemu kuli amiko. Ove funda tuhu chivimbi chove.”
16 Apalahama evwililile Efwelone. Kaha Apalahama apezalishilile Efwelone palata yize avulukile kumeso avana vaHete. Yapwile jishekele* japalata 400 kweseka nomu valanjilenga vaka-kusekasana.+
17 Ngocho mavu aEfwelone akuMakapela aze apwile kwakamwihi naMamele, mavu nawina wakusendeveka uze wapwileho, namitondo yosena yize yapwile hamusuka wamavu aze, vyapwile jino
18 hiluheto lwaApalahama luze alanjile kumeso avana vaHete navosena vaze vengililenga kuchikolo changanda.
19 Omu vyakumine vyumevi, Apalahama afunjile pwevo lyenyi Sala muwina wakusendeveka wakumavu akuMakapela kwakamwihi naMamele, chipwe ngwavo Hevelone, mulifuchi lyaKanane.
20 Ngocho vana vaHete vahanyine Apalahama aze mavu nawina wakusendeveka uze wapwileho kupwa hichihela chenyi chakufundanga vafu.+
Kwinyikila Chamwishi
^ Chipwe pamo, “uchilolo wamunene.”
^ Chipwe “myono yenu.”
^ Shekele yimwe yapwile jingalamu 11.4. Tala Chihande B14.
^ Shekele yimwe yapwile jingalamu 11.4. Tala Chihande B14.
