Kuputuka 25:1-34
25 Jino Apalahama ambachile pwevo weka, lijina lyenyi ikiye Ketula.
2 Kutwala muze Ketula asemene nenyi Jimilane, naYokoshane, naMetane, naMichane,+ naIshivake, naShuwa.+
3 Yokoshane asemene Sheva, naNdetane.
Vana vaNdetane vapwile Ashule, naLetushe, naLeume.
4 Vana vaMichane vapwile Efwa, naEfwele, naHanoke, naAvita, naEleta.
Vosenava vasemukile kuli Ketula.
5 Kutwala muze Apalahama ahanyine Isaka vyuma vyenyi vyosena.+
6 Oloze vana venyi vakuli mapwevo jenyi vakwavo avahanyine mawana. Omu achipwile nakuyoya, Apalahama asuwile ava vana venyi vayenga nakutwama kulifuchi lyaKumututuko, kwakusuku namwanenyi Isaka.+
7 Myaka yosena ayoyele Apalahama yapwile 175.
8 Apalahama afwile wakusuuluka mumyaka yaushinakaji wenyi, kaha atokele ngana mwavatu jenyi.*
9 Kaha vana venyi vaIsaka naIshimele vamufunjile muwina wakusendeveka wakuMakapela, hamusuka wamavu aEfwelone mwanaZohale kaHete, aze apwile kwakamwihi naMamele,+
10 aze alanjile Apalahama kuli vana vaHete. Kaha Apalahama vamufunjile kuze vafunjile pwevo lyenyi Sala.+
11 Omu Apalahama alingile hanafu lyehi, Kalunga akiswilenga lika Isaka.+ Isaka atwaminenga kwakamwihi naMbele-lahai-loi.+
12 Ou ukiko mujimbu waIshimele+ mwanaApalahama, uze asemene naHangale+ kaEjipitu, ngamba yaSala.
13 Awa akiko majina avana vaIshimele kweseka namwaya visaka vyavo. MwanaIshimele watwatwa ikiye Nevayote,+ kaha hinamushisa Ketale,+ naAtavele, naMivisame,+
14 naMishima, naNduma, naMasa,
15 naHatate, naTema, naYetule, naNafwishe, naKetema.
16 Ava vakiko vana vaIshimele namajina avo, kweseka namembo avo navilombo vyavo.* Vapwile vamyata 12 kweseka navisaka vyavo.+
17 Myaka yosena ayoyele Ishimele yapwile 137. Ishimele afwile, kaha atokele ngana mwavatu jenyi.*
18 Kaha vana venyi vanungwojokele kufuma kuHavila+ kwakamwihi naShule,+ yize yalihachile naEjipitu swi nakuAsulya. Kaha mukutwama chavo valihachilenga navandumbwavo vosena.*+
19 Ou ukiko mujimbu waIsaka mwanaApalahama.+
Apalahama asemene Isaka.
20 Isaka apwile namyaka yakusemuka 40 omu ambachile pwevo lyenyi Laveka, mwanaMbetwele+ kaAlame wakuPatane-alame, ndumbwaLavane kaAlame.
21 Kaha Isaka amulembelelelenga Yehova hali pwevo lyenyi mwomwo apwile mumba. Ngocho Yehova amukumbulwile, kaha pwevo lyenyi Laveka emichile lijimo.
22 Kaha vana vapwile mujimo lyaLaveka valipikilenga,+ ngocho alyambile ngwenyi: “Nge omu mukiko chapwa, kaha nakufwa chinawahe.” Kaha amwihwile Yehova hachuma kanechi.
23 Kaha Yehova amwambile ngwenyi: “Mujimo+ lyove muli miyachi yivali. Kaha eyi miyachi yivali nayikafuma muli ove nayikalihandununa.+ Muyachi umwe naukapwa nangolo kuhambakana ukwavo.+ Kaha mwana wamukulwane mwakazachilanga songo yenyi.”+
24 Jino omu lwola lwakusapuluka lwahetele, Laveka asemene vapasa.
25 Mwana watete asemukile naungona uchila mujimba wosena kwijiva nge uvwalo waungona.+ Kaha vamulukile ngwavo Esau.*+
26 Munyima yenyi mwakavile songo yenyi, kaha livoko lyenyi lyakwachile kukakukunya kaEsau,+ kaha vamulukile ngwavo Yakova.*+ Isaka apwile namyaka yakusemuka 60 omu pwevo lyenyi asemene ava vana.
27 Omu vakolele ava vana, Esau apwile chinyanga wamunene,+ mutu wamuchipapa. Oloze Yakova apwile mutu wakulonga, muka-kutwama mujimbalaka.+
28 Isaka azangile Esau mwomwo amujihililenga nyama, oloze Laveka azangile Yakova.+
29 Likumbi limwe Yakova apwile nakuteleka vyakulya omu Esau ejile kufuma muchipapa oku nafu chizava.
30 Kaha Esau ambile kuli Yakova ngwenyi: “Anguhwisako, nguhaneko ovyo vyakulya vichila uli navyo, mwomwo ngunafu chizava.”* Shikaho vamulukilile lijina ngwavo Etome.*+
31 Yakova amwambile ngwenyi: “Vangila kungulanjisa utwatwa wove.”+
32 Esau ambile ngwenyi: “Ami hinangufwa, nyi utwatwa wakaze?”
33 Yakova amwambile ngwenyi: “Vangila kulishinga kuli ami.” Ngocho alishingile kuli ikiye, kaha amulanjishile Yakova utwatwa wenyi.+
34 Yakova ahanyine Esau mbolo namusoji wamakunde, kaha alile nakunwa, akatukile nakuliyila kwenyi. Ngocho Esau alumbilishile utwatwa wenyi.
Kwinyikila Chamwishi
^ Eyi hindangwishi yize yalumbununa kufwa.
^ Chipwe “navilombo vyavo vyakukingiwa.”
^ Eyi hindangwishi yize yalumbununa kufwa.
^ Chipwe pamo, “Kaha vatwaminenga nakole navandumbwavo.”
^ Ulumbunwiso, “Ungona.”
^ Ulumbunwiso, “Ou Wakukwata kuKakukunya; Ou Wakushisa Muli Mukwavo.”
^ Chipwe “ngunafu zala.”
^ Ulumbunwiso, “Kuchilana.”
