Kuputuka 26:1-35
26 Jino mulifuchi mwengilile zala yakalombolombo yeka nge yize yapwileko hakavanga hamakumbi aApalahama.+ Ngocho Isaka ayile kuNgelale kuli Avimeleke, mwangana wavaFwilishite.
2 Kaha Yehova alisolwele kuli Isaka nakumwamba ngwenyi: “Kanda nauya kuEjipituko. Oloze utwame kweshokwo kungalila nangukulweza mulifuchi lino.
3 Zuzumana mulifuchi lino,+ kahami nangupwanga lika nayove nakukukisula, mwomwo lifuchi lyosena lino+ nangulihana kuli ove nakuli vaka-tanga* yove. Kaha nangutesamo vyuma ngwalishingile kuli iso Apalahama.+
4 ‘Nangukavulisa vaka-tanga* yove nge vatanganyika vamwilu,+ nakuvahana lifuchi lyosena eli.+ Kaha vaka-mafuchi ahamavu vosena navakavakisula kuhichila muli vaka-tanga* yove,’+
5 mwomwo Apalahama ononokele mulizu lyami, kaha alaminenga lika vyuma ngwasakile, navyevi ngwamulwezele, najishimbi jami.”+
6 Ngocho Isaka atwaminenga lika muNgelale.+
7 Omu malunga vamungalila kana vamuhulishilenga hali pwevo lyenyi, ikiye avalwezelenga ngwenyi: “Ou hindumbwami.”+ Evwilenga woma kuvalweza ngwenyi, “Ou hipwevo lyami,” mwomwo ambile ngwenyi, “malunga vamungalila yino navangujiha mwomwo yaLaveka” hakuwana nge apwile wamwaza chikuma.+
8 Kahomu mwahichile makumbi, Avimeleke mwangana wavaFwilishite atalile munjanena, kaha amwene Isaka ali nakusapula napwevo lyenyi Laveka.+
9 Kaha Avimeleke asanyikile Isaka nakumwamba ngwenyi: “Ou hipwevo lyove. Nyi ikaze wambilanga ngwove, ‘Ou hindumbwami’?” Isaka amwambile ngwenyi: “Ngwambanga ngocho kuchina nangufwa mwomwo yaikiye.”+
10 Avimeleke ambile cheka ngwenyi: “Ikaze unalingila chuma kanechi kuli etu?+ Mwomwo kachi mutu umwe alisavalanga napwevo lyove, kachi unatuhakisa mumulonga.”+
11 Avimeleke alwezele vatu jenyi vosena ngwenyi: “Weshowo mwalinga chuma chimwe chachipi kuli ou lunga napwevo lyenyi, mwafwa chakufwa.”
12 Isaka alimine mbuto mulifuchi lize, kaha mumwaka kana ahile jimbuto jajivulu. Mbuto kana javulile mapapa 100 kuzomboka hali jize akuvile, mwomwo Yehova amukiswile.+
13 Jino Isaka apwile naluheto, kaha afukililenga lika palanga nomu ahetele luheto lwaluvulu chikuma.
14 Apwile namautanga amikoko, nawawa avangombe, navangamba vavavulu chikuma.+ Ngocho vaFwilishite vaputukile kumwivwila lwiso.
15 Kaha vaFwilishite vashikilile mashima osena aze vafulile kuli vangamba jaise hamakumbi aise Apalahama.+
16 Jino Avimeleke ambile kuli Isaka ngwenyi: “Fuma muno mungalila yetu, mwomwo unafukila chikuma kutuhambakanetu.”
17 Ngocho Isaka atutukile nakuya kuchinema* chaNgelale,+ kaha atwaminenga kuze.
18 Kaha Isaka afululwile mashima aze vafulile hamakumbi aise Apalahama, aze vaFwilishite vashikilile omu alingile Apalahama hanafu lyehi.+ Kaha awalukile majina aze awalukile ise.+
19 Kahomu vangamba jaIsaka vapwile nakufululula mashima kuchinema,* vawanyine lishima lyameya amwaza.
20 Jino tufunga vakuNgelale vaputukile kukokojwesa tufunga twaIsaka ngwavo: “Awa meya etu.” Ngocho Isaka alukile lishima kana ngwenyi Eseke,* mwomwo vamukokojwesele.
21 Kufumaho vafululwile lishima lyeka, kaha vaputukile kulikokojwesa cheka. Ngocho Isaka alukile lishima lize ngwenyi, Setena.*
22 Kutwala muze, Isaka afumine kuze, ayile nakufula lishima lyeka, kaha kavalikokojwesele chekako. Ngocho Isaka alukile lishima kana ngwenyi Lehovote,* nakwamba ngwenyi: “Mwomwo Yehova natuhane chihela chakutwama, kaha natulingisa tusemunwine mulifuchi lino.”+
23 Isaka afumine cheka kuze nakuya kuMbele-sheva.+
24 Kaha Yehova alisolwele kuli ikiye naufuku, amwambile ngwenyi: “Ami yami Kalunga kaiso Apalahama.+ Kanda nawivwa womako,+ mwomwo nguli nayove hamwe, kaha nangukukisula nakuvulisa vaka-tanga* yove mwomwo yangamba yami Apalahama.”+
25 Ngocho Isaka atungile lijiko lyakulumbila kuze, kaha alishilenga lijina lyaYehova.+ Ajikile mbalaka yenyi kuze,+ kaha vangamba jenyi vafulile lishima kuze.
26 Jino Avimeleke akatukile kuNgelale nakuya kuli Isaka. Ayile hamwe nangambela yenyi Ahuzate, nakapitau kamaswalale jenyi Fwikole.+
27 Kaha Isaka avambile ngwenyi: “Munakave ika kuli ami, hakuwana nge mwanguhungile nakunguhanga mungalila yenu?”
28 Vakiko vamwambile ngwavo: “Tunamono hatoma ngwetu Yehova ali nayove.+ Kaha twashinganyekanga ngwetu, ‘Tulishinge lushingo nayove, nakulikasa nawa chivwasano,+
29 mangana utufwelelese ngwove kaweshi kukatulinga mwamupiko nge muze twazenekele etu kukulinga mwamupi. Mwomwo etu twakulingile mwamwaza hakukusuula uyenga mukuunda. Ove unapu jino uwakukisula kuli Yehova.’”
30 Ngocho avawahishilile kulya chachivulu, kaha valile nakunwa.
31 Kaha lichako, vahindukile chimenemene, valishingile lushingo.+ Kufumaho Isaka avasuwile vayenga, kaha vayile mukuunda.
32 Jino halikumbi vene lize, vangamba jaIsaka vejile kuli ikiye nakumulweza vyalishima vafulile,+ ngwavo: “Tunawanemo meya.”
33 Kaha Isaka alukile lishima kana ngwenyi, Shiva. Shikaho nganda kana vayivulukila ngwavo Mbele-sheva+ nakulelo lino.
34 Omu Esau apwile namyaka yakusemuka 40, ambachile Yutete mwanaMbeli kaHete kupwa pwevo lyenyi, kaha ambachile nawa Mbasemate mwanaElone kaHete.+
35 Ava mapwevo vevwishilenga Isaka naLaveka kupihya kumichima* yavo.+
Kwinyikila Chamwishi
^ Hepe., “mbuto.”
^ Hepe., “mbuto.”
^ Hepe., “mbuto.”
^ Chipwe “kumwanakalwiji.”
^ Chipwe “kumwanakalwiji.”
^ Ulumbunwiso, “Vikokojola.”
^ Ulumbunwiso, “Kole.”
^ Ulumbunwiso, “Vihela Vyavinene.”
^ Hepe., “mbuto.”
^ Hepe., “kukola kumuchima.”
