Kuputuka 27:1-46
27 Omu Isaka alingile hanakulu lyehi, kaha meso enyi nawa anelava lyehi, asanyikile mwanenyi wamukulwane Esau,+ nakumwamba ngwenyi: “Ove mwanami!” Kaha ikiye etavile ngwenyi: “Yami uno mwane.”
2 Isaka amwambile ngwenyi: “Ami ngunakulu lyehi jino. Kaha nawa kangwatachikijile likumbi nangufwako.
3 Ngocho mbata vitwa vyove, namusakali wove, nauta wove wamanana uyenga muchipapa nakungujihila nyama.+
4 Kaha ungutelekeleyo kanawa nge omu ngwazanga, unguneheleyo ngulyenga, mangana ngukukisule shimbu kanda ngufwenga.”
5 Jino Laveka evwileko omu Isaka apwile nakuhanjika namwanenyi Esau. Kaha Esau ayile muchipapa nakuzomba nyama mangana anehele ise.+
6 Laveka ambile kuli mwanenyi Yakova ngwenyi:+ “Ngunevu iso mwahanjika nayayove Esau ngwenyi,
7 ‘Ngujihile nyama, ungutelekeleyo kanawa, unguneheleyo ngulyenga, mangana ngukukisule kumeso aYehova shimbu kanda ngufwenga.’+
8 Shikaho ove mwanami, ngwivwilile kanawa, nakulinga vyuma nangukulweza.+
9 Yako kuutanga wavapembe, ungunehele misamba javapembe vamwaza vavali, mangana nguvajihe nakutelekela iso kulya chiyema nge omu azanga.
10 Kaha uchitwale kuli iso alyenga mangana akukisule shimbu kanda afwenga.”
11 Yakova ambile kuli naye Laveka ngwenyi: “Yayami Esau apwa mutu waungona,+ oloze ami chikova chami chisenena.
12 Nyi ngachilihi nge tata mwangupapachila nakungwivwa ngwenyi ungona wauchi?+ Nangusoloka nge nguli nakumuhulamisa, ngocho nangulinehela changu, keshi kisuko.”
13 Jino naye amwambile ngwenyi: “Ove mwanami, changu kana chizenga hali ami. Ijiva kulinga omu ngunakulweze, yako ungunehele vapembe.”+
14 Kaha ayile, avambachile nakuvaneha kuli naye. Ngocho naye atelekelele Isaka kulya chiyema nge omu azanga.
15 Kufumaho Laveka anonele uvwalo wamwaza wamwanenyi wamukulwane Esau uze apwile nawo muzuvo, kaha auvwikile mwanenyi wakanyike Yakova.+
16 Amuvwikile nawa vilambu vyavaze misamba javapembe kumavoko enyi, namushingo yenyi muze kamwapwile ungonako.+
17 Kaha ambachile chize kulya chiyema nambolo yize awahishile nakuvihana kuli mwanenyi Yakova.+
18 Ngocho Yakova ayile kuli ise nakumwamba ngwenyi: “Ove tata!” Kaha Ise amukumbulwile ngwenyi: “Yami uno. Yove iya mwanami?”
19 Yakova ambile kuli ise ngwenyi: “Yami mwanove watwatwa Esau.+ Ngunalingi nge omu wangulwezanga. Achihinduke utwame, ulyenga nyama ngunanehe mangana ungukisule.”+
20 Kaha Isaka ambile kuli mwanenyi ngwenyi: “Ove mwanami, unayiwane ngachilihi washiwashi ngana?” Ikiye amukumbulwile ngwenyi: “Yehova Kalunga kove ikiye nanguwanyinayo.”
21 Jino Isaka ambile kuli Yakova ngwenyi: “Achipandame kuno, ngukupapachile ngwivwenga numba nge yove vene mwanami Esau nyi chiku.”+
22 Yakova apandamine kuli ise, kaha amupapachilile, nakwamba ngwenyi: “Mavoko anakwivwakana nge aEsau,+ oloze lizunyi lyaYakova.”
23 Ise kamutachikijileko, mwomwo mavoko enyi apwile naungona nge mavoko ayayenyi Esau. Ngocho amukiswile.+
24 Kufumaho Isaka amuhulishile ngwenyi: “Yove vene mwanami Esau tahi?” Yakova etavilile ngwenyi: “Yami vene.”
25 Kaha Isaka amwambile ngwenyi: “Ngunehele nyama mwanami ngulyenga, kaha nangukukisula.” Ngocho amuneheleleyo, kaha alile. Amunehelele navinyo nawa, kaha anwine.
26 Jino ise Isaka amwambile ngwenyi: “Pandama kuno ove mwanami ungusweswenye.”+
27 Ngocho apandamine kuli ikiye, amusweswenyele, kaha evwile livumba lyauvwalo wenyi.+ Kufumaho amukiswile nakwamba ngwenyi:
“Livumba lyamwanami linapu nge livumba lyachipapa chize nakisula Yehova.
28 Kalunga wamuchano akuhane lyume lyakufuma kwilu,+ namavu awilo,+ nambuto jamanona jakulisala, navinyo vyavihya.+
29 Vatu veka naveka vakuzachilenga ove, kaha vaka-mafuchi valifukulenga kuli ove. Ove upwenga umwata wavandumbwove, kaha vana vanoko vamalunga valifukulenga kuli ove.+ Vamwangule weshowo mwakwangula ove, kaha vamukisule weshowo mwakukisula ove.”+
30 Omu Isaka alingile hanakisula lyehi Yakova, kaha nawa Yakova hanafumu lyehi kuli ise Isaka, yayenyi Esau akindulukile kufuma kuze ayile nakuzomba.+
31 Naikiye nawa atelekele kulya chiyema, achinehele kuli ise. Kaha ambile kuli ise ngwenyi: “Ove tata, achihinduke ulyenga nyama ngunakunehela ami mwanove mangana ungukisule.”
32 Kaha ise Isaka amwambile ngwenyi: “Yove iya?” Ikiye ambile ngwenyi: “Yami mwanove watwatwa Esau.”+
33 Kaha Isaka aputukile kulichikimina chikumakuma, kaha ambile ngwenyi: “Nyi ou azombanga nyama nakungunehelayo iya? Ami ngunali lyehi nyama shimbu wapwanga ove kanda wizenga. Kaha ngwamukisulanga, ngocho mwapwanga wakukisula chikupu.”
34 Omu Esau evwile mazu aise, aputukile kulila nalizu lyakukanguka nakulinyenga, nakwamba kuli ise ngwenyi: “Ove tata, ngukisule nayami nawa.”+
35 Isaka amwambile ngwenyi: “Songo yove ezanga nakungwonga mangana atambule kisu yize yatelanga kupwa yayove.”
36 Ngocho Esau ambile ngwenyi: “Kumana vikiko vamuvulukila ngwavo Yakova,* mwomwo nanguzangamina jino mapapa kavali.+ Nangutambula lyehi utwatwa wami,+ kaha oholyapwa nangutambula nawa kisu yami.”+ Ambile cheka ngwenyi: “Uno kawanguseleleleko kisu numba yimweko tahi?”
37 Oloze Isaka akumbulwile cheka Esau ngwenyi: “Tala, ngunamutongola lyehi kupwa mwata wove,+ kaha vandumbwenyi vamalunga vosena ngunamuhanevo kupwa vangamba jenyi. Kaha jimbuto jamanona navinyo vyavihya nawa ngunamuhanevyo kupwa vyenyi.+ Nyi vyuma vyeka mukaze nangukuhana ove mwanami?”
38 Jino Esau ambile kuli ise ngwenyi: “Ove tata, uno hakiko hanakumina kukisula chove tahi? Ove tata, ngukisule nayami nawa.” Kaha Esau alilile nalizu lyakukanguka.+
39 Jino ise Isaka amukumbulwile ngwenyi:
“Tala, kaweshi kukatwama kumavu awiloko, kaha kaweshi kukatambula nawa lyume lyakufuma kwiluko.+
40 Naukayoyela hapoko yove yamukwale,+ kaha naukazachilanga songo yove.+ Omu naukevwa chipekete mutoka yenyi, naukayihokola nakufumamo.”+
41 Oloze Esau akwachilile Yakova koko mwomwo yakukisula chize vamukiswile kuli ise.+ Kaha Esau alyambilenga mumuchima wenyi ngwenyi: “Makumbi akulila tata kalinwomu ahete.+ Kufumaho nangumujiha songo yami Yakova.”
42 Omu Laveka vamulwezele mazu amwanenyi wamukulwane Esau, asanyikile mwanenyi wakanyike Yakova, kaha amwambile ngwenyi: “Ivwa, yayove Esau nakukwachila koko nakusaka kukujiha.*
43 Ngocho jino, ove mwanami, lingomu nangukulweza. Katuka uchinyine kuli ndumbwami Lavane kuHalane.+
44 Kaha katwame nenyi makumbi amwe palanga nomu nayikuma kulundundu yayayove,
45 nomu nawatula matoto nakukwachila, nakuvulyama nawa vyuma unamulingi numba jino ngukakusanyike. Mwomwo ikaze nangutokesela muvosena muvavali halikumbi limwe?”
46 Kaha Laveka ambilenga lika kuli Isaka ngwenyi: “Ngunahungu kuyoya chami mwomwo yavava vana vakusemuwa kuli Hete.+ Kachi nge naYakova mwakambata pwevo kuvana vakusemuwa kuli Hete, ngana mwavava mapwevo valifuchi lino, kaha numba kufwa ngufwenga tuhu.”+
Kwinyikila Chamwishi
^ Ulumbunwiso, “Ou Wakukwata kuKakukunya; Ou Wakushisa Muli Mukwavo.”
^ Chipwe “ali nakulivendejeka ivene navishinganyeka vyakukujiha.”
