Kuputuka 30:1-43
30 Omu Lakele amwene ngwenyi keshi nakusema vana naYakovako, evwilile yayenyi lwiso, kaha ambile kuli Yakova ngwenyi: “Nguhane vana mokomoko nangufwa.”
2 Yakova apihililile naLakele, kaha amwambile ngwenyi: “Uno ami yami Kalunga ngunakulingisa uzeneke kusema vana* numba?”
3 Kaha Lakele ambile ngwenyi: “Tala, ndungo yami wapwevo Mbiliha+ ou. Lisavale nenyi angusemene vana,* mangana ngupwenga navana kuli ikiye.”
4 Ngocho amuhanyine ngamba yenyi wapwevo Mbiliha kupwa pwevo lyenyi, kaha alisavalile nenyi.+
5 Kutwala muze, Mbiliha emichile lijimo, kaha asemene mwana walunga naYakova.
6 Jino Lakele ambile ngwenyi: “Kalunga napu muka-kunguyulilako, kaha nevwilila nawa mulizu lyami, shikaho nanguhane mwana walunga.” Ngocho amulukile lijina ngwenyi Ndane.*+
7 Mbiliha ngamba yaLakele emichile lijimo likwavo, kaha asemene mwana walunga wamuchivali naYakova.
8 Lakele ambile ngwenyi: “Ngunalipiki chikuma nayayami. Kaha ngunamufungulula.” Ngocho amulukile lijina ngwenyi Nafwatale.*+
9 Omu Leya amwene ngwenyi keshi nakusema cheka vanako, ambachile ngamba yenyi Zelepa nakumuhana kuli Yakova kupwa pwevo lyenyi.+
10 Zelepa ngamba yaLeya asemene mwana walunga naYakova.
11 Leya ambile ngwenyi: “Echi hikutokwa chachinene.” Ngocho amulukile lijina ngwenyi Ngate.*+
12 Kufumaho Zelepa ngamba yaLeya asemene mwana walunga wamuchivali naYakova.
13 Leya ambile ngwenyi: “Ngunawahilila chikuma! Mwomwo vana vamapwevo navakangwambanga ngwavo nguwakuwahilila.”+ Ngocho amulukile lijina ngwenyi Ashele.*+
14 Likumbi limwe Luvene+ ayile muchipapa halwola lwakwaha tiliku, kaha awanyine mandeleke muchipapa. Ngocho awanehele kuli naye Leya. Kaha Lakele ambile kuli Leya ngwenyi: “Nguhaneko mandeleke amwanove.”
15 Leya amwambile ngwenyi: “Omu unangutambula lunga lyami ove unamono ngwove hichuma chachindende tahi?+ Musaka utambule nawa namandeleke amwanami nyi?” Jino Lakele ambile ngwenyi: “Chamwaza, Yakova mwalisavala nayove ufuku walelo mangana tutambasane namandeleke amwanove.”
16 Kahomu Yakova apwile nakufuma muchipapa nachingoloshi, Leya ayile nakumukikilila, kaha amwambile ngwenyi: “Lelo mulisavala nayami, mwomwo ngunakuhanyina lyehi fweto yamandeleke amwanami kuli Lakele.” Ngocho alisavalile nenyi ufuku uze.
17 Kalunga amwivwililile Leya nakumukumbulula, kaha emichile lijimo nakusema mwana walunga wamuchitanu naYakova.
18 Jino Leya ambile ngwenyi: “Kalunga nanguhane fweto yami, mwomwo ngunahane ngamba yami kuli lunga lyami.” Ngocho amulukile lijina ngwenyi Isakale.*+
19 Leya emichile cheka lijimo, kaha kutwala muze asemene mwana walunga wakusokesa 6 naYakova.+
20 Jino ambile ngwenyi: “Kalunga nanguhane wana waunene. Lunga lyami mwatwama jino nayami+ mwomwo ngunamusemena vana vamalunga 6.”+ Ngocho amulukile lijina ngwenyi Zevulune.*+
21 Kufumaho asemene nawa mwana wapwevo, kaha amulukile lijina ngwenyi Njina.+
22 Kutwala muze, Kalunga alakanyine Lakele, kaha amwivwililile nakumukumbulula hakumuhana lusemo mangana emite lijimo.*+
23 Ngocho emichile lijimo, kaha asemene mwana walunga. Ambile ngwenyi: “Kalunga nangwande sonyi.”+
24 Ngocho amulukile lijina ngwenyi Yosefwe,*+ mwomwo ngwenyi: “Yehova nanguhakilako mwana walunga mukwavo.”
25 Omu Lakele alingile hanaseme lyehi Yosefwe, Yakova ambile kuli Lavane ngwenyi: “Ngusuule mangana nguyenga kwimbo lyami, kulifuchi lyami.+
26 Nguhane vana vami namapwevo jami ava ngunazachila kuli ove mangana nguyenga navo, mwomwo ove unatachikiza kanawa milimo ngunakuzachilanga.”+
27 Jino Lavane amwambile ngwenyi: “Kachi nge unangwivwila uselewa, twamanga lika nayami, mwomwo ngunamono navitaho* ngwami Yehova nangukisula mwomwo yayove.”
28 Kaha amwambile cheka ngwenyi: “Ngutomene fweto yove, kaha nangukuhanayo.”+
29 Yakova ambile ngwenyi: “Ove unatachikiza milimo ngunakuzachila nomu unatoho utanga wove kulivoko lyami.+
30 Shimbu ngwapwile kanda ngwizenga, ove wapwile navimuna vavandende kaha, oloze jino vanasemunwina nakuvula. Yehova nakukisulanga kufuma vene halwola ngwejile kuli ove. Kahami mwaka uka nangukazata vyakuzuvo yami?”+
31 Jino Lavane amwambile ngwenyi: “Ngukuhane ika?” Yakova ambile ngwenyi: “Kanda unguhana chuma numba chimweko. Oloze nge naungulingila chuma chino, kaha nanguputuka kukufungila cheka vimuna jove nakuvalama.+
32 Lelo natuhita muutanga wove wosena. Kaha uhandununemo vizamba jamikoko vosena vamavalanga-mavalanga, navava vamapelenge-mapelenge, navava vasweuluka vosena, navapembe vavihwevo vamapelenge-mapelenge, navava vamavalanga-mavalanga. Kufuma likumbi lyalelo, vimuna navakasemuka kulutwe vamiyachi eyi, vakiko navakapwa fweto yami.+
33 Kaha kumakumbi akulutwe omu naukeza nakutala vimuna jami, naukamona ngwove ngumutu wakwoloka.* Kaha veshovo vapembe vavihwevo vakuzeneka mavalanga, chipwe mapelenge, navizamba jamikoko vosena vaze kaveshi vasweulukako vaze navakawana kuli ami, vakavamone ngwavo vakwiva.”
34 Lavane ambile ngwenyi: “Chamwaza. Chipwenga vene nganomu unahanjika.”+
35 Kaha halikumbi lize, Lavane ahandunwine vizamba javapembe vamisululu-misululu, navava vamapelenge-mapelenge, navapembe vavihwevo vosena vamavalanga-mavalanga, navava vamapelenge-mapelenge, navizamba jamikoko vosena vaze vapwile namangona amwe atoma, navosena vasweuluka, kaha avahanyine kuli vana venyi mangana vavalamenga.
36 Kufumaho Lavane atwalile utanga wenyi kungalila yakutambuka makumbi atatu kufuma kuze apwile Yakova. Kaha Yakova afungilenga vimuna jaLavane vaze vasalileho.
37 Jino Yakova atetele vitondo vituta vyamushitolashe, namumonde, namupelene, kaha akelulwileho mena aze asolokele kupwa nge himapelenge atoma.
38 Kaha ambachile vize vitondo nakuvijika kulutwe lwavizau vyameya, kuze vejilenga vimuna nakunwa meya, mangana ngwenyi omu naveza nakunwa meya, valinyinyine kuze ajikile vize vitondo.
39 Ngocho vimuna valinyinyinenga kuli vize vitondo, kaha vasemenenga vana vamisululu-misululu, navava vamavalanga-mavalanga, navava vamapelenge-mapelenge.
40 Kutwala muze Yakova afumishileho vaze vana vamikoko. Kaha ahandunwine vimuna jaLavane nakuvatalisa kuvimuna vamisululu-misululu, navava vasweuluka. Kufumaho ambachile mautanga avimuna jenyi nakuwahaka kwauka wawo, kaha kawafutwile cheka namautanga aLavaneko.
41 Omu vimuna vangolo vahetelenga halwola lwakulinyina, Yakova ajikilenga vize vitondo kulutwe lwavize vizau vyameya, mangana valinyinyine kuze kuvitondo.
42 Oloze omu vimuna vakuhona ngolo vahetelenga halwola lwakulinyina, Yakova kajikilenga vize vitondo kulutwe lwavize vizau vyameyako. Kaha vimuna vakuhona ngolo vapwilenga vaLavane, oloze vaze vangolo vapwilenga vaYakova.+
43 Ngocho Yakova afukililenga chikuma, apwile namautanga amanene, navangamba vamalunga navava vamapwevo, navangamela navimbulu.+
Kwinyikila Chamwishi
^ Chipwe “ngunakanyisa mihako yamujimo lyove.”
^ Hepe., “asemene hamambuli ami.”
^ Ulumbunwiso, “Muka-kuyula.”
^ Ulumbunwiso, “Kulipika.”
^ Ulumbunwiso, “Kutokwa Chachinene.”
^ Ulumbunwiso, “Kwivwa Kuwaha; Kuwahilila.”
^ Ulumbunwiso, “Ikiye Fweto.”
^ Ulumbunwiso, “Kutwama.”
^ Hepe., “Kalunga amwivwililile, kaha asokolwele mujimo lyenyi.”
^ Lijina lyaYoshifwiya mukavatu, kulumbununa “Ya Ahakileko (Avulise).”
^ Chipwe “naunjiho.”
^ Chipwe “wakashishi.”
