Kuputuka 31:1-55
31 Kutwala muze Yakova evwile vyuma vahanjikile vana vaLavane ngwavo: “Yakova natambula vyuma vyasetu vyosena, kaha kuvyuma vyasetu kukiko nawanyina luheto lwosenelu.”+
2 Omu Yakova atalilenga Lavane kumeso, amwene ngwenyi Lavane keshi nachisambo nge muze apwile hakavangako.+
3 Ngocho Yehova ambile kuli Yakova ngwenyi: “Kinduluka kulifuchi lyavakakuluka jove, kuli vausoko wove,+ kaha nangupwanga lika nayove.”
4 Jino Yakova atumine mazu kuli Lakele naLeya vezenga kuchipapa kuze apwilenga nakufunga vimuna.
5 Kaha ambile kuli vakiko ngwenyi:
“Ngunamono ngwami senu keshi nakungusolwela chisambo nge muze alingilenga hakavangako.+ Oloze Kalunga katata napunga lika nayami.+
6 Enu munatachikiza kanawa ngwenu senu ngunamuzachilanga nangolo jami josena.+
7 Kaha senu nanguzangaminanga, nalumunanga jifweto jami mapapa 10, oloze Kalunga kamwitavishile angulinge mwamupiko.
8 Omu angwambile ngwenyi, ‘Veshovo vimuna navakasemuka namavalanga-mavalanga navakapwa fweto yove,’ kaha vimuna vosena vasemenenga vana vamavalanga-mavalanga. Omu nawa angwambile ngwenyi, ‘Veshovo vimuna navakasemuka namisululu-misululu navakapwa fweto yove,’ kaha vimuna vosena vasemenenga vana vamisululu-misululu.+
9 Ngocho Kalunga ambachilenga vimuna jasenu nakunguhanavo ami.
10 Omu vimuna vahetanga halwola lwakulinyina, ngwalotanga, kaha ngwamonanga vizamba javapembe vali nakunyina vihwevo. Ava vizamba vapwanga vamisululu-misululu, vamavalanga-mavalanga, navava vamapenga-mapenga.+
11 Jino kangelo kaKalunga wamuchano angusanyikanga muchilota ngwenyi, ‘Ove Yakova!’ Ngwamukumbululanga ngwami, ‘Yami uno mwane.’
12 Kaha angwambanga ngwenyi, ‘Andula meso ove utale, vizamba javapembe vosena vaze vali nakunyina vihwevo vanapu vamisululu-misululu, vamavalanga-mavalanga, navava vamapenga-mapenga. Mwomwo ngunamono vyuma vyosena ali nakukulinga Lavane.+
13 Ami yami Kalunga wamuchano uze asolokele kuli ove kuMbetele,+ kuze wahingunwinyine* maji halilolwa lyakwanukilaho, kuze nawa walishingilile lushingo kuli ami.+ Katuka, fuma mulifuchi lino ukinduluke kulifuchi lize wasemukilile.’”+
14 Ngocho Lakele naLeya vamukumbulwile ngwavo: “Muzuvo yasetu kamweshi cheka uswana twatela kuswanako.
15 Setu ali nakutumona jino nge tuvaka-lifuchi lyeka, hakuwana nge natulanjisa, kaha nawa ali nakuyoyela handando yamatemo etu.+
16 Luheto lwosena elu natambula Kalunga kuli setu lunapu lwetu navana vetu.+ Ngocho ulinga mweshomwo nakulweze Kalunga.”+
17 Jino Yakova akatukile, alemene vangamela jenyi nakunyinyisaho vana venyi namapwevo jenyi.+
18 Kaha ambachile vikumba vyenyi vyosena,+ nakusununa utanga wenyi wavimuna vaze ahetele kuPatane-alame, nakuya kuli ise Isaka kulifuchi lyaKanane.+
19 Jino Lavane ayile nakuteula mikoko jenyi. Shimbu apwile kuze, Lakele evile vatelafwime*+ vaise.+
20 Kaha nawa Yakova ahemene Lavane kaAlame hamangana, mwomwo kamulwezele ngwenyi mwachinako.
21 Yakova achinyine navyuma vyenyi vyosena, azaukile Kalwiji,*+ kaha atalishile chakuya kungalila yajipili yaNgileyate.+
22 Omu mwahichile makumbi atatu, Lavane vamulwezele ngwavo Yakova nachinyi.
23 Ngocho, Lavane ambachile vausoko wenyi, vakavangijile Yakova tunda yakutambuka makumbi 7. Kaha vamuwanyine kungalila yajipili yaNgileyate.
24 Jino Kalunga ejile kuli Lavane kaAlame+ muchilota naufuku+ nakumwamba ngwenyi: “Zangama navyuma muhanjika kuli Yakova, numba vipwa vyamwaza chipwe vyavipi.”+
25 Ngocho Lavane apandamine kuli Yakova hakuwana nge Yakova ajikile mbalaka yenyi kupili, kaha Lavane navausoko wenyi nawa vatulililile kungalila yize yajipili yaNgileyate.
26 Jino Lavane ambile kuli Yakova ngwenyi: “Ikaze unalingila chuma kanechi? Ika unanguhemena hamangana nakumbata vana vami kwijiva nge vafunge vakukwata kujita?
27 Mwomwo ika unanguseunukila, nakunguhema hamangana, nakukatuka chakuzeneka kungulweza? Kachi nge wangulwezanga, kachi ngwakusuulanga nakuwahilila namyaso, nakwimba tungoma natulyalya.
28 Oloze unangulingisa nguzeneke kusweswenya vazukulu* jami navana vami vamapwevo. Unalingi mwakuhulama.
29 Nguli nangolo jakumilinga mwamupi, oloze Kalunga kasenu ahanjikanga kuli ami ufuku walelo ngwenyi, ‘Zangama navyuma muhanjika kuli Yakova, numba vipwa vyamwaza chipwe vyavipi.’+
30 Numba tuhu uli nakuya mwomwo unasakenga kukinduluka kuzuvo yaiso, nyi ikaze unevila tulunga twami?”+
31 Yakova akumbulwile Lavane ngwenyi: “Mwomwo ngwevwanga woma, ngocho ngwalyambanga ngwami, ‘Pamo naungunyanga vana vove.’
32 Weshowo nauwana natulunga twove keshi kuyoyako. Talatala havyuma nguli navyo kumeso avausoko wetu, mangana umbateho vyuma vyove.” Oloze Yakova katachikijile ngwenyi Lakele ikiye avevileko.
33 Ngocho Lavane engilile mumbalaka yaYakova, namumbalaka yaLeya, namumbalaka yavaze vandungo vamapwevo vavali,+ oloze kavawanyineko. Kahomu alovokele mumbalaka yaLeya, engilile nawa mumbalaka yaLakele.
34 Halwola kanelu, Lakele ambachile vaze vatelafwime nakuvasweka muchipau chamapwevo changamela chize apwile nacho, kaha atwamineho. Lavane atondeletondele mumbalaka mwosena, oloze kawanyine vyuma vyenyiko.
35 Jino Lakele ambile kuli ise ngwenyi: “Kanda upihililako ove mwata wami, kangweshi kuhasa kukatuka kumeso oveko, mwomwo nguli kukakweji.”+ Lavane atondeletondele chikuma, oloze kawanyine vaze vatelafwimeko.+
36 Yakova apihililile, kaha aputukile kukokojwesa Lavane. Yakova ambile kuli Lavane ngwenyi: “Mulonga muka ngunavulumuna, kaha shili muka ngunalingi numba unguhangasane ngana nautenu?
37 Omu unatondotondo havikumba vyami vyosena, vyuma muka vyakuzuvo yove unawaneho? Vinehe kuno vavimone kuli vausoko wami navausoko wove mangana vatuyule.
38 Myaka yoseneyi 20 ngunatwamenga nayove, mikoko jove navapembe jove kavapulumwishilengako,+ kaha nawa kangwalilenga vizamba jove vamikokoko.
39 Kaha vaze vakutanya kuli visuma nawa,+ ami kangwavanehelenga kuli oveko, oloze ngwashishishilengamo veka. Ove wasakilenga kukufweta nge chimuna chove vanamwivi namusana, chipwe nge vanamwivi naufuku.
40 Ngwafwilenga liyena namusana, ngwafwilenga nawa chishika naufuku, kaha kangwasavalilenga tuloko.+
41 Ngunatwamenga myaka 20 kuzuvo yove. Ngwakuzachilile myaka 14 hali vana vove vamapwevo vavali, nakukufungila vimuna jove myaka 6, kaha unalumunanga nawa jifweto jami mapapa 10.+
42 Kachi nge Kalunga katata,+ Kalunga kaApalahama, Kalunga uze Isaka eji kwivwanga woma+ kapwile nayamiko, kachi unangusuula mavokovoko. Kalunga namono luyando lwami nakukilikita chami, shikaho akuhanjikilanga ufuku walelo.”+
43 Lavane amukumbulwile Yakova ngwenyi: “Ava mapwevo vanapu vana vami, ava vana vavo vanapu vana vami, ava vimuna nawa vanapu vimuna jami, kaha vyuma vyosenevi uli nakumona vinapu vyami navana vami. Mwamupi mukaze nangulinga lelo kuli vana vami, nakuli vana vavo vanaseme?
44 Twaya jino, tulikase chivwasano ami nayove, chipwenga unjiho mukachi ketu.”
45 Ngocho Yakova anonele lilolwa, alimikile kupwa lilolwa lyakwanukilaho.+
46 Jino Yakova ambile kuli vausoko wenyi ngwenyi: “Nonenu malolwa.” Kaha vanonele malolwa nakulumbika mulumba. Kufumaho, valililile vyakulya haze hamulumba wamalolwa.
47 Lavane aulukile ngwenyi Yengale-sahanduta,* oloze Yakova aulukile ngwenyi Ngalete.*
48 Jino Lavane ambile ngwenyi: “Likumbi lyalelo, ou mulumba wamalolwa unapu hiunjiho mukachi kayami nayove.” Shikaho aulukilile lijina ngwenyi Ngalete,+
49 kaha nawa ngwenyi, Kaposhi Kakutalila, mwomwo ngwenyi: “Yehova atulame ami nayove omu natuzeneka kulimona cheka kufuma hano.
50 Kachi nge naukayanjisa vana vami vamapwevo, chipwe kukambata mapwevo veka vakuhakila kuli vana vami, ijiva ngwove Kalunga mwakapwa chinjiho mukachi kayami nayove, numba tuhu mutu weka wauchiko.”
51 Lavane ambile cheka kuli Yakova ngwenyi: “Tala, mulumba wamalolwa ou, nalilolwa lyakwanukilaho ngunemika mukachi kayami nayove nawa eli.
52 Ou mulumba wamalolwa unapu unjiho, nalilolwa lyakwanukilaho nawa linapu unjiho+ wakusolola nge kangweshi kukahambakana mulumba uno wamalolwa nakwiza kuli ove ngukulinge mwamupiko. Kaha ove nawa kaweshi kukahambakana mulumba uno wamalolwa nalilolwa lyakwanukilaho lino nakwiza kuli ami ungulinge mwamupiko.
53 Kalunga kaApalahama,+ Kalunga kaNahole, Kalunga kasevo, atuyule.” Oloze Yakova alishingile Kalunga uze Isaka eji kwivwanga woma.*+
54 Kufumaho, Yakova ahanyine chimuna wakuvatula kuze kupili, kaha asanyikile vausoko wenyi valyenga vyakulya. Ngocho valile, kaha vasavalile kupili ufuku uze.
55 Jino Lavane ahindukile chimenemene, asweswenyele vazukulu* jenyi+ navana venyi vamapwevo nakuvakisula.+ Kaha Lavane akatukile nakukinduluka kwimbo lyenyi.+
Kwinyikila Chamwishi
^ Hepe., “kuze wawavishile.”
^ Chipwe “tulunga vamutanga; tuponya.”
^ Ikiye Yufwalate.
^ Hepe., “vana vamalunga.”
^ Lizu lyachiAlamayiki, kulumbununa “Mulumba waUnjiho.”
^ Lizu lyachiHepeleu, kulumbununa “Mulumba waUnjiho.”
^ Hepe., “alishingile woma waise Isaka.”
^ Hepe., “vana vamalunga.”
