Kuputuka 32:1-32
32 Yakova atwalilileho naungeji wenyi, kaha vangelo jaKalunga valiwanyine nenyi.
2 Omu avamwene ambile ngwenyi: “Chino chinapu chilombo chaKalunga.” Kaha alukile chihela chize ngwenyi Mahanaime.*
3 Jino Yakova atumine valuwa valivange kuya kuli yayenyi Esau kulifuchi* lyaSeile,+ kuEtome.+
4 Kaha avalwezele ngwenyi: “Mukamwambulila mwata wami Esau ngwenu, ‘Ngamba yove Yakova nambe ngwenyi: “Ngunatwamenga* naLavane hamyaka yayivulu.+
5 Ngunahete vangombe, navimbulu, namikoko, navangamba vamalunga navava vamapwevo.+ Kaha ngunatumu mujimbu uno wakukulweza ove mwata wami mangana ungwivwile uselewa.”’”
6 Jino vaze valuwa vakindulukile kuli Yakova, kaha vamulwezele ngwavo: “Tunamuwane yayove Esau, kaha ali nakwiza nakukusesa, ali nakwiza hamwe namalunga 400.”+
7 Ngocho Yakova evwile woma nakulizakamina chikuma.+ Kaha atepele vatu vaze apwile navo, namautanga amikoko navapembe, navangombe, navangamela mumazavu avali.
8 Kaha alyambile ngwenyi: “Kachi nge Esau mwalukuka lizavu limwe, kaheli lizavu likwavo nalichina.”
9 Kufumaho Yakova ambile ngwenyi: “Ove Kalunga kakaka yami Apalahama, Kalunga katata Isaka, Ove Yehova, ove wahanjikile kuli ami ngwove, ‘Kinduluka kulifuchi lyove, kuli vausoko wove, kaha nangukakulingila vyamwaza.’+
10 Ami ngamba yove+ kangwatelemo kungusolwela zangi yove yakwilila, nakashishiko, mwomwo hakuya kuHalane ngwazaukile Yotau nambwechi yami kaha, oloze nguli jino namazavu avali.+
11 Nguli nakukulomba+ unguyovole mumavoko ayayami Esau, mwomwo nguli nakwivwa woma ngwami mweza nakungulukuka,+ hohamwe navana, namanevo.
12 Kahove wambile ngwove, ‘Nangukakulingila vyamwaza chikupu, kaha nangukavulisa vaka-tanga* yove nge usekeseke wakukalungalwiji, uze navahona kulava.’”+
13 Jino ufuku uze Yakova asavalile kuze. Kaha kuluheto lwenyi ambachileko lumwe kupwa wana wakuhana yayenyi Esau.+
14 Ambachile vapembe vavihwevo 200, navapembe vavizamba 20, namikoko vavihwevo 200, namikoko vavizamba 20,
15 navangamela 30 vakwamwisa vana, navangombe vavihwevo 40, navangombe vavakuji 10, navimbulu vavihwevo 20, navimbulu vavilunga 10.+
16 Kaha avahanyine kuli vangamba jenyi, utanga nahawo utanga nahawo, nakwamba kuli vangamba jenyi ngwenyi: “Zaukenu mulivange kulutwe lwami, museze tando mukachi kautanga nautanga.”
17 Yakova alwezele ngamba yenyi wakulivanga ngwenyi: “Kachi nge yayami Esau mwakuwana nakukwihula ngwenyi, ‘Kaka yove iya? Uli nakuya kulihi? Nyi ou utanga uli nawo weya?’
18 Umukumbulule ngwove, ‘Wangamba yove Yakova. Unapu wana natumu kuli ove mwata wenyi Esau.+ Kaha ikiye ali nakwiza munyima yetu.’”
19 Yakova alwezele nawa ngamba yenyi wamuchivali, nayou wamuchitatu, navosena vaze vakavilenga munyima yamautanga ngwenyi: “Omu mukiko munamuhanjika kuli Esau omu namumuwana.
20 Kaha muhanjike nawa ngwenu, ‘Ngamba yove Yakova ali nakwiza munyima yetu.’” Mwomwo Yakova alyambile mumuchima wenyi ngwenyi: ‘Kachi nge nanguvangila kumutumina wana+ wakumuunjisa, pamo nahase kungutambula nalikoji omu nangumuwana.’
21 Ngocho vangamba jenyi vazaukile nauze wana nakulivanga kuya, kaha ikiye asavalile muchilombo ufuku uze.
22 Jino naufuku vene uze, Yakova akatukile, ambachile mapwevo jenyi vavali,+ navangamba jenyi vamapwevo vavali,+ navana venyi vamalunga 11, kaha vazaukile hamwava waYavoke.+
23 Omu alingile hanavazawisa lyehi musali yakalwiji,* azawishile nawa vyuma vyosena apwile navyo.
24 Yakova asalile uka wenyi. Jino kwasolokele lunga umwe, kaha alipikile nenyi palanga nakulungulungu lyakucha.+
25 Uze lunga omu amwene ngwenyi namuhono, amukwachile mutungi yenyi. Kaha tungi yaYakova yachingunukile omu apwile nakulipika nenyi.+
26 Jino uze lunga amwambile ngwenyi: “Ngweche nguyenga, mwomwo hikunachi lyehi.” Oloze Yakova ambile ngwenyi: “Kangweshi kukwecha uyengako kuvanga unangukisula.”+
27 Uze lunga amwambile ngwenyi: “Lijina lyove yove iya?” Ikiye ambile ngwenyi: “Yami Yakova.”
28 Uze lunga ambile ngwenyi: “Lijina lyove kalyeshi kupwa cheka Yakovako, oloze Isalele,*+ mwomwo unalipiki naKalunga+ navatu, kaha unavahase.”
29 Yakova amwambile ngwenyi: “Nayove ngulweze lijina lyove.” Oloze ikiye ambile ngwenyi: “Ika unangwihwila lijina lyami?”+ Kaha uze lunga amukiswile.
30 Ngocho Yakova alukile chihela chize ngwenyi Penyele,*+ mwomwo ambile ngwenyi, “Ngunalimono naKalunga meso nameso, oloze ngunayovoka.”+
31 Likumbi lyamututukilile omu alingile hanahambakana lyehi Penwele,* oloze apwile nakumbilikita mwomwo yatungi yenyi.+
32 Shikaho vana vaIsalele kaveshi kulya wama watungi nakulelo linoko, mwomwo uze lunga akwachile muwama watungi yaYakova.
Kwinyikila Chamwishi
^ Ulumbunwiso, “Vilombo Vivali.”
^ Hepe., “kungalila.”
^ Chipwe “Ngunatwamenga mwamwiza.”
^ Hepe., “mbuto.”
^ Chipwe “yamwanakalwiji.”
^ Ulumbunwiso, “Muka-kulipika naKalunga” chipwe “Kalunga Eji Kufungululanga.”
^ Ulumbunwiso, “Kumeso aKalunga.”
^ Chipwe “Penyele.”
