Kuputuka 33:1-20
33 Jino Yakova andwile meso enyi, kaha amwene Esau ali nakwiza hamwe namalunga 400.+ Ngocho apangile vana venyi nakuhana vamwe kuli Leya, veka kuli Lakele, vakwavo kuli vaze vangamba vamapwevo vavali.+
2 Kaha vaze vangamba vamapwevo navana vavo avahakile kulutwe,+ munyima yavo mwakavile Leya navana venyi,+ kaha kukuminyinako Lakele+ naYosefwe.
3 Ivene Yakova ayile kulutwe lwavo, kaha alifukwile mapapa 7 omu apwile nakupandama kuli yayenyi.
4 Esau alahile nakusesa songo yenyi, amupakachile mukasamba nakumusweswenya, kaha valilile.
5 Omu Esau andwile meso enyi, amwene mapwevo navana. Kaha amwambile ngwenyi: “Ava uli navo veya?” Ikiye ambile ngwenyi: “Ava vakiko vana vaze Kalunga nanguhane ami ngamba yove.”+
6 Kufumaho vaze vangamba vamapwevo vavali vejile navana vavo nakulifukula kuli ikiye.
7 Kaha Leya nawa ejile navana venyi, valifukwile. Jino Yosefwe ejile naLakele nakulifukula.+
8 Esau amwambile ngwenyi: “Ika watuminanga lizavu lyoseneli ngunaliwane nalyo?”+ Ikiye amukumbulwile ngwenyi: “Mangana ove mwata wami ungwivwile uselewa.”+
9 Esau amwambile ngwenyi: “Ove songo yami,+ ami nguli naluheto lwaluvulu chikuma. Mbata tuhu vyuma vyove.”
10 Oloze Yakova ambile ngwenyi: “Nduma mwane. Kachi nge unangwivwila uselewa, tambula wana wakufuma kuli ami, mwomwo ngwautumanga mangana ngukumone kumeso. Kaha ngunamono kumeso ove, kwijiva nge ngunamono kumeso aKalunga, hakuwana nge unangutambula nachisambo.+
11 Achitambule wana wakisu yami ngwakutuminanga,+ mwomwo Kalunga nangwivwila uselewa, kaha nguli navyuma vyosena vyasakiwa.”+ Yakova amushinjilile lika, ngocho autambwile.
12 Kaha Esau ambile ngwenyi: “Tukatukenu, tuyenu, kahami nangumitetekela kulutwe.”
13 Oloze Yakova ambile kuli ikiye ngwenyi: “Ove mwata wami, ove unatachikiza ngwove vanyike kavapwa vakujikizako,+ kaha nawa mikoko navangombe vaze vali nakwamwisa vana vavo ngwatela kuvalama kanawa. Shikaho, nge natuvatambukisa jimbushi mulikumbi lyangongo, kaha vimuna vosena navafwa.
14 Ngocho ove mwata wami, livange tuhu kulutwe lwayami ngamba yove, kahami nangwiza chikoki chikoki kweseka nakutambuka chavimuna navana nguli navo palanga nomu nanguheta kuli ove mwata wami kuSeile.”+
15 Esau amwambile ngwenyi: “Mana ngukuseleko vatu jami vamwe.” Ikiye ambile ngwenyi: “Kawatela kulinga ngochoko. Ngwivwile kaha uselewa ove mwata wami.”
16 Ngocho likumbi lize, Esau aputukile kukinduluka kuSeile.
17 Oloze Yakova akatukile nakuya kuSukote,+ kaha atungile zuvo yenyi kuze, noku kwakutwama vimuna jenyi. Shikaho alukilile chihela chize ngwenyi Sukote.*
18 Omu Yakova afumine kuPatane-alame,+ atambukile nakuheta kanawa kunganda yaShekeme,+ mulifuchi lyaKanane.+ Kaha atungile chilombo chenyi kwakamwihi nanganda kana.
19 Kaha alanjile musuka wamavu kuli vana vaHamole, ise yaShekeme kuze atungilile mbalaka yenyi. Musuka kana aulanjile najimbongo japalata 100.+
20 Atungile lijiko lyakulumbila kuze, kaha alilukile ngwenyi Kalunga ikiye Kalunga kaIsalele.+
Kwinyikila Chamwishi
^ Ulumbunwiso, “Visakila; Tupundo.”
