Kuputuka 35:1-29
35 Kufumaho Kalunga ambile kuli Yakova ngwenyi: “Katuka, yako kuMbetele+ ukatwameko. Ukatunge lijiko lyakulumbila wana kuli ami Kalunga wamuchano, uze alisolwele kuli ove omu wapwile nakuchina yayove Esau.”+
2 Yakova ambile kuli vaze vakuzuvo yenyi, nakuli vosena vaze apwile navo, ngwenyi: “Mbilenu tulunga veka ava muli navo,+ kaha litomesenu nakuvwala uvwalo weka.
3 Tukatukenu, tuyenu kuMbetele. Nangukatunga lijiko lyakulumbila wana kuli Kalunga wamuchano uze angwalakanyine halikumbi lyaluyando lwami, uze napunga nayami kweshokwo* ngunayinga.”+
4 Ngocho vamuhanyine Yakova vaze tulunga vapwile navo, navimbilingwa vyakumatwitwi avo. Kaha Yakova avivumbikile* mwishi yamutondo waunene uze wapwile kwakamwihi naShekeme.
5 Omu vakatukile nakuya, Kalunga anehele muzuzu havatu vamujinganda jize javajingilikile, ngocho kavahashile kuhangasana vana vaYakovako.
6 Kutwala muze, Yakova navatu vosena vaze apwile navo vahetele kuLuze,+ chipwe ngwavo Mbetele, mulifuchi lyaKanane.
7 Atungile lijiko lyakulumbila kuze, kaha alukile chihela chize ngwenyi Ele-Mbetele,* mwomwo kukiko Kalunga wamuchano alisolwelele kuli ikiye omu apwile nakuchina yayenyi.+
8 Kutwala muze, Ndevola+ ndeji yaLaveka afwile, kaha vamufunjile kuweluka waMbetele, mwishi yamuvalyu. Ngocho aulukile ngwenyi Alone-mbakute.*
9 Kalunga alisolwele cheka kuli Yakova omu apwile nakufuma kuPatane-alame, kaha amukiswile.
10 Kalunga amwambile ngwenyi: “Lijina lyove yove Yakova.+ Olozenyi kaveshi kukuvuluka cheka ngwavo Yakovako, navakuvulukanga ngwavo Isalele.” Kaha amuvulukilenga jino ngwenyi Isalele.+
11 Kalunga amwambile nawa ngwenyi: “Ami yami Kalunga Wangolo Josena.+ Sema mangana muvule chikuma. Kaha muli ove namukafuma miyachi yayivulu,+ navamyangana nawa navakafuma muli ove.*+
12 Lifuchi eli ngwahanyine kuli Apalahama, nakuli Isaka nangukakuhanalyo ove, navaka-tanga* yove vaze navakeza hanyima yove.”+
13 Kalunga amusezele kuze apwile nakuhanjika nenyi.
14 Ngocho Yakova emikile lilolwa kuchihela chize ahanjikilile naKalunga. Lyapwile lilolwa lyakwanukilaho, kaha ahingunwinyineho wana wavinyo namaji.+
15 Kaha Yakova alukile cheka chihela chize ahanjikilile naKalunga ngwenyi Mbetele.+
16 Jino vakatukile kufuma kuMbetele. Kahomu kwapwile kuchili kwakusuku nakuheta kuEfwalate, lwola lwaLakele lwakusapuluka lwahetele, kaha amwene kukaluhwa hakusapuluka.
17 Oloze shimbu apwile nakupindasana hakusapuluka, chifungiji chenyi amwambile ngwenyi: “Kanda nawivwa womako, mwomwo naukwata mwana walunga mukwavo.”+
18 Omu apwile nakundoyoka* (mwomwo apwile kwakamwihi nakufwa), alukile mwanenyi ngwenyi Mbe-nonyi,* oloze ise amulukile ngwenyi Mbenjamine.*+
19 Lakele afwile, kaha vamufunjile kujila yakuya kuEfwalate, chipwe ngwavo, Mbetelema.+
20 Kaha Yakova ahakile lilolwa hachimbumbe chenyi. Lilolwa kana hanga lyatwama hachimbumbe chaLakele nakulelo lino.
21 Kufumaho Isalele akatukile nakuya nakujika mbalaka yenyi kungalila yimwe, kuhambakana kaposhi kaEtele.
22 Omu Isalele atwaminenga kungalila yize, Luvene alisavalile naMbiliha pwevo lyaise, kaha ise Isalele evwile chuma kana.+
Jino vana vaYakova vamalunga vapwile 12.
23 Vana asemenene kuli Leya shina ava: watwatwa apwile Luvene,+ kaha Shimeyone, naLevi, naYuta, naIsakale, naZevulune.
24 Vaze asemene naLakele vapwile Yosefwe, naMbenjamine.
25 Vaze asemene naMbiliha ngamba yaLakele wapwevo vapwile Ndane, naNafwatale.
26 Kaha vana asemene naZelepa ngamba yaLeya wapwevo vapwile Ngate, naAshele. Ava vakiko vana vaYakova vamalunga vaze asemenene kuPatane-alame.
27 Kutwala muze, Yakova ahetele kuMamele+ mungalila yaKilyate-alava, chipwe ngwavo, Hevelone, kuze apwilenga nakutwama ise Isaka. Oku kukiko vazuzumanyinenga+ nawa vaApalahama naIsaka.
28 Isaka ayoyele myaka 180.+
29 Ngocho afwile wakusuuluka mumyaka yaushinakaji wenyi, kaha atokele ngana mwavatu jenyi.* Vana venyi vaEsau naYakova vamufunjile.+
Kwinyikila Chamwishi
^ Chipwe “mujila.”
^ Chipwe “aviswekele.”
^ Ulumbunwiso, “Kalunga WakuMbetele.”
^ Ulumbunwiso, “Muvalyu Wakulilila.”
^ Hepe., “navakafuma kumitanda yove.”
^ Hepe., “nambuto.”
^ Ulumbunwiso, “Mwana waKulishona Chami.”
^ Ulumbunwiso, “Mwana WakuLivoko lyaChilyo.”
^ Chipwe “Omu wapwile nakukuma mwono wenyi.”
^ Eyi hindangwishi yize yalumbununa kufwa.
