Kuputuka 37:1-36
37 Yakova atwaminenga lika mulifuchi lyaKanane, muze azuzumanyinenga+ ise.
2 Ou ukiko mujimbu waYakova.
Omu Yosefwe+ apwile namyaka yakusemuka 17, likumbi limwe apwile nakufunga vimuna.+ Apwile hamwe navandumbwenyi, vana vamapwevo jaise vaMbiliha,+ naZelepa.+ Kaha Yosefwe ejile nakulweza ise mujimbu wavilinga vyavipi vyavandumbwenyi.
3 Isalele azangilenga chikuma Yosefwe kuhambakana vana venyi vakwavo vosena,+ mwomwo apwile mwanenyi wahaushinakaji wenyi. Kaha amutongelele chikuto chakulipwila.*
4 Jino omu vandumbwenyi vamalunga vamwene ngwavo sevo namuzange chikuma kuhambakana vakiko, vamuhungile, kaha kavahanjikilenga nenyi mukuundako.
5 Kutwala muze, Yosefwe alotele chilota, kaha achilwezele vandumbwenyi,+ ngocho vawanyine katenga kakwavo kakumuhungilaho.
6 Yosefwe avambile ngwenyi: “Ivwenu chilota ngwalotanga.
7 Ngwalotanga tuli nakukasa mikuta yatiliku muwande. Jino mukuta wami wakatukanga nakwimana, kaha mikuta yenu yaujingilikanga nakulifukula kuukiko.”+
8 Kaha vandumbwenyi vamwambile ngwavo: “Uno uli nakwamba ngwove naukapwa chikupu umwangana wetu, nakutuyulanga tahi?”+ Ngocho vawanyine katenga kakwavo kakumuhungilaho, mwomwo yachilota alotele namazu ahanjikile.
9 Kufumaho alotele chilota chikwavo, kaha achilwezele vandumbwenyi, ngwenyi: “Ngwalotanga chilota chikwavo. Ngwalotanga likumbi, nakakweji, navatanganyika 11, vili nakulifukula kuli ami.”+
10 Kaha achambulwile kuli ise nakuli vandumbwenyi nawa, kaha ise amutenukilile ngwenyi: “Echi chilota chove unaloto chinatalikisa mulihi? Uno ami nanoko navandumbwove natukeza chikupu nakulifukula kuli ove tahi?”
11 Vandumbwenyi vamwivwilile lushiushiu,+ oloze ise alamine mazu kana mumuchima wenyi.
12 Jino vandumbwenyi vayile nakufunga vimuna jasevo kwakamwihi naShekeme.+
13 Omu mwahichile makumbi amwe, Isalele ambile kuli Yosefwe ngwenyi: “Vandumbwove vali nakufunga vimuna kwakamwihi naShekeme, nyi mweka? Mana ngukutume kuli vakiko.” Kaha ikiye ambile ngwenyi: “Ngutumenu.”
14 Kaha amwambile ngwenyi: “Yako ukatale numba nge vandumbwove vali kanawa. Ukatale nawa omu vali vimuna, kaha ukeze nakungulweza.” Ngocho akatukile kufuma kuchinema* chaHevelone,+ kaha atalikishile chakuya kuShekeme.
15 Jino lunga umwe amuwanyine ali nakulumbwangila muchipapa. Uze lunga amwihwile ngwenyi: “Uli nakutonda ika?”
16 Ikiye ambile ngwenyi: “Nguli nakutonda vandumbwami. Ngulweze, kulihi vali nakufungila vimuna?”
17 Uze lunga amwambile ngwenyi: “Kunonyi vanafumuko lyehi, mwomwo ngwavevwanga vali nakuhanjika ngwavo, ‘Tuyenu kuNdotane.’” Ngocho Yosefwe akavangijile vandumbwenyi, kaha avawanyine kuNdotane.
18 Jino omu vamumwene hahasuku, shimbu kanda ahete kuli vakiko, vamutwamine punga ngwavo vamujihe.
19 Kaha valyambile mwavomwavo ngwavo: “Talenu, muka-kulota vilota uze mweza.+
20 Tuyenu tumujihe, nakumumbila muwina umwe wameya hamena ali kuno, kaha natukamba ngwetu vanamuli kuli chisuma. Kaha natumona munamwingilila vilota vyenyi.”
21 Omu Luvene+ evwile ngocho, asakile amupululule mumavoko avo. Ambile ngwenyi: “Kanda natumujihako.”*+
22 Kaha avambile ngwenyi: “Kanda namumwanga manyingako.+ Mumbilenu muwina wameya uno wamupambo, kanda namumulemekako.”*+ Luvene asakile amupululule mumavoko avo mangana amukindulwise kuli ise.
23 Kahomu Yosefwe ahetele kuli vandumbwenyi, vamuzulile chikuto chenyi chamwaza chize avwalile.+
24 Kaha vamukwachile nakumumbila muwina wameya. Halwola kanelu, muze muwina mwapwile mwaumu, kamwapwile meyako.
25 Kufumaho, vatwamine nakulya. Jino omu vandwile meso avo, vamwene chendo chavaIshimele vali nakwiza kufuma kuNgileyate+ vali nakuya kuEjipitu. Vangamela javo vambachile latanume, nambalasamu, nashitolake.+
26 Jino Yuta ambile kuli vandumbwenyi ngwenyi: “Kachi nge natujiha songo yetu nakusweka kufwa chenyi, natuwanyinaho ika?+
27 Tuyenu tumulanjise+ kuli vaIshimele, kanda tumulinga mwamupiko. Ikiye nawa hisongo yetu, manyinga etu wowamwe.” Ngocho vevwililile mulizu lyandumbwavo.
28 Omu vaMichane+ vaka-kusekasana vapwile nakuhita, vandumbwaYosefwe vakokele Yosefwe muze muwina wameya, kaha vamulanjishile kuli vaIshimele najimbongo japalata 20.+ Kahava malunga vambachile Yosefwe nakuya nenyi kuEjipitu.
29 Jino omu Luvene ayile kuze kuwina nakuwana Yosefwe wauchimo, apulile uvwalo wenyi hakupihilila.
30 Kahomu akindulukile kuli vandumbwenyi, ambile ngwenyi: “Kanyike wauchimo! Nangulinga ngachilihi?”
31 Kaha vanonele chikuto chaYosefwe, vajihile chizamba chapembe nakutupika chize chikuto mumanyinga.
32 Vambachile chize chikuto chakulipwila nakuchituma kuli sevo namazu akwamba ngwavo: “Echi chikiko chikuto tunawane. Chikekese umone numba nge chikuto chamwanove nyi chiku.”+
33 Kaha achikekesele nakwamba ngwenyi: “Chikuto chamwanami vene! Atela vanamuli kuli chisuma! Chamuchano vene Yosefwe vanamutanye!”
34 Ngocho Yakova apulile uvwalo wenyi, alikashile chikeleyi mumbunda yenyi, kaha alishonene mwanenyi hamakumbi amavulu.
35 Vana venyi vamalunga vosena, navava vamapwevo vosena, vamuvendejekelenga, oloze ikiye akanyinenga kumuvendejeka. Ambilenga ngwenyi: “Nangulishona mwanami palanga nomu nangushikumuka muFuka.”*+ Ngocho Yakova alililenga lika mwanenyi Yosefwe.
36 Oloze vaMichane valanjishile Yosefwe muEjipitu kuli Potefwale, chilolo chaFwalo,+ uze apwile mukulwane wavaka-kulama mwangana.+
Kwinyikila Chamwishi
^ Chipwe “uvwalo wamwaza wausuku.”
^ Chipwe “kuchana.”
^ Chipwe “natujiha mwono wenyiko.”
^ Chipwe “namumusalika mavokoko.”
^ Chipwe “muSheyole,” kulumbununa fuka yavatu vosena. Tala Mukana waMazu.
