Kuputuka 38:1-30
-
Yuta naTamale (1-30)
38 Jino halwola kanelu, Yuta afumine kuli vandumbwenyi, ayile nakujika mbalaka yenyi kwakamwihi nalunga umwe wakuAtulame, lijina lyenyi ikiye Hila.
2 Yuta awanyine pwevo kuze, mwanaShuwa kaKanane.+ Amumbachile kupwa pwevo lyenyi. Ngocho alisavalile nenyi,
3 kaha emichile lijimo. Kutwala muze asemene mwana walunga, kaha Yuta amulukile lijina ngwenyi Ele.+
4 Kaha emichile lijimo likwavo nakusema mwana walunga, kaha amulukile lijina ngwenyi Onane.
5 Kaha asemene cheka mwana walunga, amulukile lijina ngwenyi Shela. Halwola kanelu asemukile mwanavo, vapwile kuAkajive.+
6 Kutwala muze, Yuta ambachilile mwanenyi watwatwa Ele pwevo, lijina lyenyi ikiye Tamale.+
7 Jino Ele, mwanaYuta watwatwa, alingilenga vyuma vyavipi kumeso aYehova, kaha Yehova amujihile.
8 Ngocho Yuta ambile kuli Onane ngwenyi: “Lisavale nanyalyove, uswane pwevo lyandumbwove, mangana usemene ndumbwove vana.”+
9 Oloze Onane atachikijile ngwenyi vana kana kaveshi kukavamona kupwa venyiko.+ Ngocho omu alisavalilenga napwevo lyandumbwenyi, amwangililenga vana hamavu kuchina mwamusemena ndumbwenyi vana.+
10 Chuma alingilenga chapwile chachipi kumeso aYehova. Ngocho amujihile naikiye nawa.+
11 Jino Yuta ambile kuli nayewenu Tamale ngwenyi: “Yako kuzuvo yaiso uchikatwameko muutuliwe palanga noho mwakakolela mwanami Shela.” Mwomwo alyambile ngwenyi: ‘Pamo naikiye nawa mwafwa ngana mwavandumbwenyi.’+ Ngocho Tamale ayile, kaha atwaminenga kuzuvo yaise.
12 Omu mwahichile makumbi amavulu, mwanaShuwa,+ pwevo lyaYuta afwile. Kahomu akumine makumbi akulila, Yuta ayile kuli vaka-kuteula mikoko jenyi kuChimina,+ ayile hamwe nasepa lyenyi Hila wakuAtulame.+
13 Kaha Tamale vamulwezele ngwavo: “Isowenu mwaya kuChimina akateule mikoko jenyi.”
14 Hakwivwa ngocho, azulile uvwalo wenyi wautuliwe, avwalile uvwalo weka nakulifwika lilesu, kaha alifwikile nawa lihina lyeka kumeso enyi. Ayile nakutwama kuchikolo chaEnaime, chize chapwilile kujila yakuya kuChimina. Mwomwo Tamale amwene ngwenyi Shela nakolo lyehi, oloze ikiye kavamuhanyine kuli Shela apwenga pwevo lyenyiko.+
15 Jino omu Yuta amumwene, hahaze vene ashinganyekele ngwenyi muka-ujila, mwomwo alifwikile kumeso enyi.
16 Kaha apandamine kuli ikiye kukulo yajila nakumwamba ngwenyi: “Achingwitavile ngulisavale nayove.” Mwomwo katachikijile ngwenyi apwile nayewenuko.+ Ikiye amwambile ngwenyi: “Naungwonda ika hakulisavala nayami?”
17 Yuta ambile ngwenyi: “Nangukakutumina mwanapembe wakuutanga wami.” Ikiye amwambile ngwenyi: “Naunguhana chijikilo palanga nomu naukamutuma tahi?”
18 Yuta ambile ngwenyi: “Ngukuhane chijikilo muka?” Ikiye amwambile ngwenyi: “Nguhane kazeya+ kove kakatachikijilo namukole wako, nambwechi yove eyi yili mulivoko lyove.” Ngocho amuhanyinevyo, alisavalile nenyi, kaha amwimichishile lijimo.
19 Kufumaho, akatukile nakuya, kaha akazulile uvwalo wenyi nalilesu, nakuvwala cheka uvwalo wenyi wautuliwe.
20 Yuta atumine sepa lyenyi wakuAtulame+ atwale uze mwanapembe mangana akamutambwile chijikilo chenyi kuli uze pwevo, oloze kamuwanyineko.
21 Kaha ehwile malunga vakuchihela chize ngwenyi: “Uze muka-ujila* eji kutwamanga kutenga yajila kuno kuEnaime ali kulihi?” Vakiko vamwambile ngwavo: “Kuno kakwatwama muka-ujilako.”*
22 Ngocho akindulukile kuli Yuta nakumulweza ngwenyi: “Uze pwevo kangwamuwanyineko. Kaha nawa malunga vakuchihela chize vangulwezanga ngwavo, ‘Kuno kakwatwama muka-ujilako.’”*
23 Kaha Yuta ambile ngwenyi: “Ambate tuhu vyuma ngwamuselanga kuchina natusauka. Aminyi ngwatumanga ou mwanapembe, oloze uze pwevo kawamuwanyineko.”
24 Jino omu mwahichile tukweji vatatu, Yuta vamulwezele ngwavo: “Nokowenu Tamale alilingisanga kupwa nge muka-ujila, kaha nemita lijimo muujila wenyi.” Hakwivwa ngocho, Yuta ambile ngwenyi: “Mutwalenu mukamulumbe.”+
25 Jino omu vapwile nakumutwala, atumishile mazu nachijikilo kuli isewenu, ngwenyi: “Lunga mwenya vyumevi ikiye nanguhane lijimo.” Ambile cheka ngwenyi: “Kekesenu mumone mwenya aka kazeya kakatachikijilo namukole wako, nayeyi mbwechi.”+
26 Ngocho Yuta avikekesele nakwamba ngwenyi: “Ou pwevo napu wakwoloka kunguhambakanami, mwomwo kangwamuhanyine kuli mwanami Shelako.”+ Kaha Yuta kalisavalile cheka nauze pwevoko.
27 Omu lwola lwenyi lwakusapuluka lwahetele, vamwene ngwavo mujimo lyenyi muli vapasa.
28 Jino hakusapuluka, mwana umwe alowele livoko lyenyi. Kaha chifungiji ambachile washiwashi wanda uchila, amukashilewo kulivoko nakwamba ngwenyi: “Ou ikiye wakulivanga kusemuka.”
29 Oloze omu ahilwishile livoko lyenyi mujimo, ndumbwenyi alivangile kusemuka. Uze chifungiji ambile ngwenyi: “Unalipulila ove ivene jila.” Shikaho vamulukilile lijina ngwavo Peleze.*+
30 Kufumaho, ndumbwenyi uze vakashile wanda uchila kulivoko, naikiye asemukile, kaha vamulukile lijina ngwavo Zela.+
Kwinyikila Chamwishi
^ Chipwe “Uze muka-ujila wakutembele.”
^ Chipwe “kakwatwama muka-ujila wakutembeleko.”
^ Chipwe “kakwatwama muka-ujila wakutembeleko.”
^ Ulumbunwiso, “Kupulika,” pamo kutalisa kukupula jila hakusemuka.
