Kuputuka 39:1-23
39 Jino Yosefwe vamutwalile kuEjipitu,+ kaha Potefwale+ kaEjipitu, chilolo chaFwalo uze apwile mukulwane wavaka-kulama mwangana, amulanjile kuli vaIshimele+ vaze vamutwalile kuEjipitu.
2 Oloze Yehova apwile naYosefwe.+ Ngocho Yosefwe afukilile, kaha vamuhanyine milimo yimwe muzuvo yakaka yenyi kaEjipitu.
3 Jino kaka yenyi amwene ngwenyi Yehova apwile naYosefwe, kaha nawa ngwenyi Yehova alingishile vyuma vyosena alingilenga Yosefwe vifukile.
4 Yosefwe vamwivwililenga lika uselewa kuli kaka yenyi, kaha apwile jino muka-kumuzachila. Ngocho amutongwele kupwa muka-kumulamina zuvo yenyi, nakumuhana nawa wata havyuma vyenyi vyosena.
5 Kufuma vene haze vamutongwele Yosefwe kupwa muka-kulama zuvo yakaka yenyi, nakumuhana nawa wata havyuma vyenyi vyosena, Yehova akiswilenga lika zuvo yayauze kaEjipitu mwomwo yaYosefwe. Kaha Yehova akiswilenga nawa vyuma vyosena vyapwile muzuvo yenyi, nakuchipapa.+
6 Kutwala muze, Potefwale ahanyine vyuma vyenyi vyosena mumavoko aYosefwe. Kaha kalizakaminyine chuma numba chimweko, oloze azakaminenga kaha vyakulya vize alilenga. Yosefwe akulile nakupwa lunga wakutaluka, wamwaza chihanga.
7 Jino pwevo lyakaka yenyi aputukile kwivwila Yosefwe chipepa, kaha amwambilenga ngwenyi: “Twaya tulisavale.”
8 Oloze ikiye akanyinenga lika, nakwamba ngwenyi: “Kaka yami keshi kulizakamina vyuma ngweji kulinganga muno muzuvoko, vyuma vyenyi vyosena navihake mumavoko ami.
9 Muno muzuvo kamweshi weka nanguhambakana amiko, kaha kaka yami kangukanyishile chuma numba chimweko shina yove kaha, mwomwo unapu upwevo lyenyi. Kaha nanguhasa ngachilihi kulinga upi waunene ngana nakulinga shili kuli Kalunga?”+
10 Uze pwevo ahanjikilenga naYosefwe hakumbi hakumbi, oloze ikiye ketavile kulisavala nenyi, chipwe kushikama nenyiko.
11 Jino likumbi limwe omu Yosefwe engilile muzuvo mangana akazate milimo yenyi, kawanyinemo malunga veka vaka-kuzata muze muzuvoko.
12 Ngocho uze pwevo amukwachile kulihina lyenyi, nakwamba ngwenyi: “Twaya tulisavale!” Oloze ikiye asezele lize lihina mumavoko ayauze pwevo nakuchinyina haweluka.
13 Kahomu amwene ngwenyi Yosefwe naseze lihina mumavoko enyi nakuchinyina haweluka,
14 atambikile malunga vakuzuvo yenyi nakuvalweza ngwenyi: “Talenu! Lunga lyami atunehelele ou lunga wakaHepeleu mangana atusawise kuvatu. Ezanga kuli ami mangana alisavale nayami, oloze ngwatambakananga nalizu lyakukanguka.
15 Kahomu evwanga nanguteta miteto, asezanga lihina lyenyi kuli ami nakuchinyina haweluka.”
16 Kufumaho, alamine lize lihina palanga nomu ejile kaka yaYosefwe muzuvo.
17 Uze pwevo ahanjikile mazu awa kuli lunga lyenyi ngwenyi: “Ou ngamba wakaHepeleu watunehelele ezanga kuli ami mangana angusawise kuvatu.
18 Oloze omu ngwatetanga miteto, kaha asezanga lihina lyenyi kuli ami nakuchinyina haweluka.”
19 Ngocho omu kaka yaYosefwe evwile mazu apwevo lyenyi, akwamba ngwenyi: “Omu mukiko nangulingi ngamba yove,” akwachile matoto.
20 Akwachile Yosefwe nakumutwala mukamenga, muze valaminyinenga vafunge jamwangana, kaha apwilenga lika muze mukamenga.+
21 Oloze Yehova apwilenga lika naYosefwe nakumusolwela zangi yakwilila. Kaha amulingishile vamwivwile uselewa kuli mukulwane wakamenga.+
22 Mukulwane wakamenga ahanyine Yosefwe wata wakulama vafunge vosena mukamenga. Kaha atalilenga nawa hamilimo yosena yize vazachilenga vafunge.+
23 Uze mukulwane wakamenga kalizakaminyine chuma numba chimwe kuvyuma alaminenga Yosefweko, mwomwo Yehova apwilenga lika naYosefwe, kaha Yehova alingishile vyuma vyosena alingilenga Yosefwe vifukile.+
