Kuputuka 4:1-26
4 Jino Alama alisavalile napwevo lyenyi Eve, kaha emichile lijimo.+ Kaha omu asemene Kena,+ ambile ngwenyi: “Ngunaseme mwana walunga hakungukafwa kuli Yehova.”
2 Kufumaho asemene nawa Avele+ songo yaKena.
Avele apwile muka-kufunga mikoko, oloze Kena apwile njimi.
3 Jino omu mwahichile makumbi amavulu, Kena ahanyine jimbuto jamuwande kupwa wana kuli Yehova.
4 Kaha Avele ahanyine vatwatwa vakuutanga wavimuna jenyi,+ namaji avo. Ngocho Yehova evwilile Avele uselewa nakwitavila wana wenyi,+
5 oloze kevwilile Kena uselewa nakwitavila wana wenyiko. Shikaho Kena evwile matoto chikuma, kaha ahombele.*
6 Ngocho Yehova ambile kuli Kena ngwenyi: “Ikaze unevwila matoto nakuhomba?
7 Kachi nge naulinga mwamwaza, uno kaveshi kukwivwila uselewako* numba? Oloze nge kaweshi kulinga mwamwazako, shili yili nakukuvembelela kuchikolo, kaha yili nakufwila kukufungulula. Kutala muhasa kuyihonesa tahi?”
8 Kaha Kena ambile kuli songo yenyi Avele ngwenyi: “Tuyenga muchipapa.” Kahomu vapwile muchipapa, Kena avetele songo yenyi Avele nakumujiha.+
9 Kufumaho Yehova ambile kuli Kena ngwenyi: “Songo yove Avele ali kulihi?” Kena ambile ngwenyi: “Kangwatachikijileko. Ami yami muka-kulama songo yami numba?”
10 Ngocho Kalunga ambile ngwenyi: “Ika unalingila chuma kana? Ivwa! Manyinga asongo yove ali nakuteta kuli ami hamavu.+
11 Ove unapu jino uwakwangula, kaha ngunakuhange kumavu aze anasama nakunwa manyinga asongo yove unamwange nalivoko lyove.+
12 Omu naulimanga hamavu, kaheshi kulovoka cheka vimbutoko. Naupwanga umuka-kulumbwangila, umuka-kukimbakimba hamavu.”
13 Ngocho Kena ambile kuli Yehova ngwenyi: “Kuzangamisa unanguzangamisa hakuhengesa chami chinangutohwela chikuma.
14 Likumbi lyalelo unanguhange kumavu* ano, nangufuma kumeso ove, nangupwanga ngumuka-kulumbwangila, ngumuka-kukimbakimba hamavu, kaha weshowo mwanguwana mwangujiha.”
15 Ngocho Yehova ambile ngwenyi: “Shikaho weshowo mwajiha Kena, navamulinga sambanjinga mapapa 7.”
Kaha Yehova ahakileko* katachikijilo kaKena mangana mutu mwamuwana azeneke kumujiha.
16 Jino Kena afumine kumeso aYehova, kaha ayile nakutwama kulifuchi lyaUfunge* kumututuko wakuEtene.+
17 Kufumaho Kena alisavalile napwevo lyenyi,+ kaha emichile lijimo nakusema Enoke. Jino Kena atungile nganda, kaha ayilukile lijina lyamwanenyi walunga Enoke.
18 Kutwala muze Enoke asemene Itale, Itale asemene Mehujele, Mehujele asemene Metushele, Metushele asemene Lameke.
19 Lameke ambachile mapwevo vavali. Lijina lyapwevo wakulivanga apwile ikiye Ata, kaha lijina lyapwevo wamuchivali apwile ikiye Zela.
20 Ata asemene Yavale. Yavale ikiye apwile wakulivanga kuli vaka-kutwama mujimbalaka, vaze vahetelenga vimuna.
21 Lijina lyandumbwenyi walunga apwile ikiye Yuvale. Ikiye apwile wakulivanga kuli vaka-kwimba tulyalya najipanda vosena.
22 Zela naikiye asemene Tuvale-kena uze apwile fuli wakufula vinoma vyaunengu vyosena navyevi vyafwelu. Kaha songo yaTuvale-kena wapwevo apwile ikiye Nama.
23 Jino Lameke ahanjikile mazu ano kuli mapwevo jenyi vaAta naZela ngwenyi:“Ivwililenu lizu lyami, enu mapwevo jaLameke;Ngwivwililenu omu nanguhanjika:Ngunajihi lunga hakungulemeka,Eyo, ngunajihi mwanalunga hakunguveta.
24 Kachi nge Kena navakamulinga sambanjinga mapapa 7,+Kahanyi Lameke navakamulinga sambanjinga mapapa 77.”
25 Alama alisavalile cheka napwevo lyenyi Eve, kaha Eve asemene mwana walunga. Amulukile ngwenyi, Sete,*+ mwomwo ambile ngwenyi, “Kalunga nangutongwela mwana* weka wakushisa muli Avele, mwomwo Kena amujihile.”+
26 Kaha Sete asemene mwana walunga, amulukile ngwenyi, Enoshe.+ Halwola luze, vatu vaputukile kusaula* lijina lyaYehova.
Kwinyikila Chamwishi
^ Hepe., “kaha chihanga chenyi chaholokele.”
^ Chipwe “uno kaveshi kukuzezulako numba?”
^ Hepe., “kumeso amavu.”
^ Chipwe “azamishile.”
^ Chipwe “kulifuchi lyaNote.”
^ Ulumbunwiso, “Vatongola; Vahaka; Vatumbika.”
^ Hepe., “mbuto.”
^ Hepe., “kusanyika.”
