Kuputuka 40:1-23
40 Omu vyakumine vyumevi, mukulwane wavaka-kuhana lupasa+ kuli mwangana waEjipitu, namukulwane wavaka-kwocha jimbolo vavulumwine milonga kuli mwata wavo, mwangana waEjipitu.
2 Ngocho Fwalo apihililile navaze vangamba jenyi vavakulwane vavali, mukulwane wavaka-kuhana lupasa, namukulwane wavaka-kwocha jimbolo.+
3 Kaha avatwalile muzuvo yakuvalamina yamukulwane wavaka-kulama mwangana,+ mukamenga muze vahakile Yosefwe.+
4 Jino mukulwane wavaka-kulama mwangana asakwile Yosefwe apwenganga navo nakuvatala.+ Kaha vatwamine makumbi amwe mukamenga.
5 Jino uze muka-kuhana lupasa kuli mwangana waEjipitu, namuka-kumwochela jimbolo, vaze vapwile mukamenga, valotele vilota ufuku woumwe. Kaha chilota hichilota chapwile naulumbunwiso wacho.
6 Lichako nachimene, Yosefwe engilile mukachi muli vakiko, kaha avawanyine vanahombo.
7 Ngocho ehwile ava vangamba jaFwalo apwile navo mukamenga, muzuvo yakaka yenyi ngwenyi: “Ika munahombela ngana lelo?”
8 Vakiko vambile ngwavo: “Tuvosena twalotanga vilota, oloze katweshi namutu wakutulumbunwinavyoko.” Yosefwe avambile ngwenyi: “Uno Kalunga keshi ikiye eji kulumbununanga vilotako numba?+ Ngulwezenu vilota vyenu.”
9 Uze mukulwane wavaka-kuhana lupasa alwezele Yosefwe chilota chenyi, ngwenyi: “Muchilota chami ngwamonanga muvinyo.
10 Kumuvinyo kana kwapwanga mitango yitatu. Yize mitango yapwanga nakuchivikila. Kaha yafukulanga nakwima misusu yamivinyo, kaha yize mihako yamivinyo yahyanga.
11 Jino ami ngwakwatanga lupasa lwaFwalo mulivoko lyami, kaha ngwambatanga yize mihako yamivinyo nakuyikamwina mulupasa. Kufumaho ngwahananga luze lupasa kuli Fwalo.”
12 Yosefwe amwambile ngwenyi: “Ulumbunwiso wacho ou: Yize mitango yitatu yinapu makumbi atatu.
13 Halikumbi lyamuchitatu kufuma lelo, Fwalo mwakulovola* mukamenga nakukukindulwisa hachihela chove.+ Kaha nauhananga Fwalo lupasa nge muze walingilenga kunyima omu wapwile umuka-kumuhana lupasa.+
14 Oloze ukangwanuka omu navikakuwahila vyuma. Ukangusolwela zangi yakwilila, nakukanguvuluka kuli Fwalo mangana nayami vakangulovole muno mukamenga.
15 Ami vangwivile kulifuchi lyavaHepeleu,+ kaha nachimwe chauchi ngunalingi kuno numba vangukase muno mukamenga.”*+
16 Omu mukulwane wavaka-kwocha jimbolo amwene ngwenyi vyuma nalumbununa Yosefwe vinawahe, ambile kuli Yosefwe ngwenyi: “Nayami ngwalotanga chilota. Ngwapwanga namitonga yitatu yajimbolo jitoma hamutwe wami.
17 Mumutonga wahelu mwapwanga jimbolo jakulisezaseza vochelanga Fwalo, kaha tujila vapwanga nakulya jimbolo jize japwanga mumutonga kanou wahelu.”
18 Yosefwe amwambile ngwenyi: “Ulumbunwiso wacho ou: Mitonga yitatu yinapu makumbi atatu.
19 Halikumbi lyamuchitatu kufuma lelo, Fwalo mwatapa mutwe wove* nakukusukika hachitondo. Kaha tujila navalya nyama yove.”+
20 Jino likumbi lyamuchitatu lyapwile likumbi lyakwanuka kusemuka chaFwalo,+ kaha Fwalo awahishilile vangamba jenyi vosena chiwanyino chakulya. Ngocho alowele* uze mukulwane wavaka-kuhana lupasa, namukulwane wavaka-kwocha jimbolo nakuvaneha kumeso avangamba jenyi vosena.
21 Fwalo akindulwishile uze mukulwane wavaka-kuhana lupasa hachihela chenyi, kaha ahanyinenga lika lupasa kuli Fwalo.
22 Oloze uze mukulwane wavaka-kwocha jimbolo vamusukikile, nge muze avalumbunwinyine Yosefwe.+
23 Jino uze mukulwane wavaka-kuhana lupasa kuli mwangana kamwanukile Yosefweko, amuvulyamine.+
Kwinyikila Chamwishi
^ Hepe., “mwandula mutwe wove.”
^ Hepe., “mulishima; muwina.”
^ Hepe., “mwandula mutwe wove nakukufumisawo.”
^ Hepe., “andwile mutwe.”
