Kuputuka 42:1-38
42 Yakova evwile ngwavo kuEjipitu kuli tiliku,+ kaha ambile kuli vana venyi vamalunga ngwenyi: “Ika munatwamina kaha nakulitalatala?”
2 Ambile cheka ngwenyi: “Ngunevu ngwavo kuEjipitu kuli tiliku. Yenuko mukalande tiliku mangana tuyoye mokomoko natufwa nazala.”+
3 Ngocho vandumbwaYosefwe 10+ vayile kuEjipitu vakalande tiliku.
4 Oloze Yakova ketavishile Mbenjamine,+ ndumbwaYosefwe ayenga navandumbwenyi hamweko, mwomwo alyambile ngwenyi: “Pamo mwakengila muponde.”+
5 Ngocho vana vaIsalele vayile hamwe navakwavo vaze vayile nakulanda tiliku, mwomwo zala yakalombolombo yengilile namulifuchi lyaKanane.+
6 Jino Yosefwe ikiye apwile nawata halifuchi lyaEjipitu,+ kaha ikiye nawa alanjishilenga tiliku kuvatu vahamavu vosena.+ Ngocho vandumbwaYosefwe vejile, vafukamine chameso hamavu kuli ikiye.+
7 Omu Yosefwe amwene vandumbwenyi, avatachikijile. Oloze ikiye alisolwele nge himutu weka.+ Kaha ahanjikile kuli vakiko nautenu ngwenyi: “Munafumu kulihi?” Vakiko vamwambile ngwavo: “Tunafumu kulifuchi lyaKanane, kaha tuneza nakulanda vyakulya.”+
8 Yosefwe atachikijile vandumbwenyi, oloze vakiko kavamutachikijileko.
9 Ngocho Yosefwe anukile vilota vyenyi vize alotele hali vakiko,+ kaha avambile ngwenyi: “Enu muvandoji. Muneza nakusondwesa vihela vyavyashi* kulukuka mulifuchi lino.”
10 Vakiko vamwambile ngwavo: “Nduma ove mwata wetu. Etu vangamba jove tuneza nakulanda vyakulya.
11 Tuvosena tuvana valunga umwe kaha. Tuvatu vamuchano. Etu vangamba jove katweshi tuvandojiko.”
12 Oloze ikiye avambile ngwenyi: “Makulyenu. Muneza nakusondwesa vihela vyavyashi kulukuka mulifuchi lino.”
13 Vakiko vamwambile ngwavo: “Etu vangamba jove twasemukile malunga 12.+ Tuvana valunga umwe kaha+ wakulifuchi lyaKanane. Ou wakanyike nasale nasetu,+ oloze umwe atoka.”+
14 Yosefwe ambile kuli vakiko ngwenyi: “Ngunahanjika lyehi ngwami, ‘Enu muvandoji.’
15 Shikaho nangumyeseka ngumone numba nge muli nakuhanjika muchano: Nge omu ayoya Fwalo tu, kamweshi kufuma kunoko kuvanga ndumbwenu wakanyike munamunehe kuno.+
16 Tumenu minenu umwe ayenga nakusaka ndumbwenu shimbu enu namupwa mukamenga. Echi chinapu kumyeseka ngumone numba nge mazu enu amuchano. Mokomoko omu ayoya Fwalo tu, enu muvandoji.”
17 Ngocho avahakile vosena mukamenga hamakumbi atatu.
18 Kaha halikumbi lyamuchitatu Yosefwe, ambile kuli vakiko ngwenyi: “Ami ngwevwa Kalunga woma, ngocho lingenu chumechi nangumilweza mangana muyoye.
19 Kachi nge muvatu vamuchano, kaha sezenu ndumbwenu umwe muno mukamenga. Oloze enu muvosena yenunga mutwale tiliku kuli vaze vakujizuvo jenu vali nakufwa zala.+
20 Kanehenu ndumbwenu wakanyike kuli ami, kaha mazu enu nangukawamona kupwa amuchano. Ngocho kamweshi kukafwako.” Kaha valingile vene ngocho.
21 Kaha valihanjikishile mwavomwavo ngwavo: “Chikupu vene vali nakutuzangamisa mwomwo yavyuma twalingile kuli ndumbwetu.+ Twamwene omu ayanjile* nakutulembelela tumwivwile keke, oloze katwamwivwililileko. Shikaho tuli nakumona vihuli vyosenevi.”
22 Kaha Luvene avambile ngwenyi: “Kangwamyambile ngwami, ‘Ou kanyike kanda namumulinga mwamupiko numba?’ Oloze enu kamwevwililileko.+ Manyinga enyi vali nakuwehula jino kuli etu.”+
23 Vakiko kavatachikijile ngwavo Yosefwe ali nakwivwako, mwomwo apwilenga nakuhanjika navo kuzachisa muka-kwalumuna mazu.
24 Ngocho anyingulukile nakuya kwauka wenyi, kaha aputukile kulila.+ Omu akindulukile, ahanjikile navo cheka, kaha ambachile Shimeyone+ nakumukashila hameso avo.+
25 Jino Yosefwe alwezele vatu jenyi vavahakile tiliku mujinjeke. Avalwezele nawa vakindulwise jimbongo jamutu himutu munjeke yenyi nakuvahana nawa vyakulikafwa navyo mujila. Kaha valingile vene ngocho.
26 Ngocho vambachile yize tiliku nakuyihaka havimbulu javo, kaha vakatukile kuze nakuya.
27 Omu minavo umwe akasunwine kunjeke yenyi mangana ahane chimbulu chenyi vyakulya hachihela chakusavalila vangeji, amwene jimbongo munjeke yenyi.
28 Ngocho ambile kuli vandumbwenyi ngwenyi: “Talenu! Vananguhilwishila jimbongo jami, jili munjeke yami.” Michima yavo yomine chau, kaha vevwile woma. Valyambile mwavomwavo ngwavo: “Ika Kalunga ali nakutulingila ngana?”
29 Omu vahetele kuli sevo Yakova kulifuchi lyaKanane, vamulwezele vyuma vyosena vyavasolokelele. Vambile ngwavo:
30 “Lunga umwe, mwata walifuchi ahanjikanga nautenu kuli etu,+ mwomwo amonanga ngwenyi tuli nakusondwesa lifuchi.
31 Oloze etu twamwambanga ngwetu, ‘Tuvatu vamuchano, katweshi tuvandojiko.+
32 Twasemukile malunga 12+ kuli setu umwe kaha. Ndumbwetu umwe atoka,+ kaha wakanyike nasale nasetu kulifuchi lyaKanane.’+
33 Oloze uze mwata walifuchi atwambanga ngwenyi, ‘Nangumyeseka ngumone numba nge muvatu vamuchano: Sezenu ndumbwenu umwe kuli ami.+ Oloze enu muvosena yenunga mutwale vyakulya kuli vaze vakujizuvo jenu vali nakufwa zala.+
34 Kanehenu ndumbwenu wakanyike kuli ami, kaha nangutachikiza ngwami kamweshi muvandojiko, oloze muvatu vamuchano. Ngocho nangukamisuwila ndumbwenu, kaha namukalandanga lika vyakulya mulifuchi lino.’”
35 Omu vapwile nakukasununa kujinjeke javo, mutu himutu awanyine lifunda lyajimbongo munjeke yenyi. Kahomu vakiko nasevo vamwene aze mafunda ajimbongo, vevwile woma.
36 Sevo Yakova ambile kuli vakiko ngwenyi: “Ami yami munavindamisa.+ Yosefwe atoka,+ Shimeyone nawa wauchi,+ kaha muli nakusaka kumbata nawa Mbenjamine. Ukalu wosenou uli hali ami.”
37 Oloze Luvene ambile kuli ise ngwenyi: “Kachi nge kangweshi kukamukindulwisako, kaha kajihe tuhu vana vami vamalunga vavali.+ Nguhaneyo mumavoko ami, nangukamukindulwisa kuli ove.”+
38 Yakova amwambile ngwenyi: “Mwanami keshi kuya nayenuko, mwomwo ndumbwenyi afwa, kaha ikiye asala uka wenyi.+ Nge ponde nayimuwana mujila namuya, kaha namungulingisa ami kashinakaji ngushikumuke muFuka*+ naushona wami.”+
Kwinyikila Chamwishi
^ Chipwe “vyakuhehela.”
^ Chipwe “omu wayanjile mwono wenyi.”
^ Chipwe “muSheyole,” kulumbununa fuka yavatu vosena. Tala Mukana waMazu.
