Kuputuka 43:1-34
43 Jino zala yakalombolombo yatohwele chikuma mulifuchi.+
2 Kahomu yakumine tiliku yavo vakalanjile kuEjipitu,+ sevo avambile ngwenyi: “Yenu cheka mukatulanjile vyakulya.”
3 Yuta ambile ngwenyi: “Uze lunga atulwezele ngwenyi, ‘Kanda namukeza cheka kuli ami chakuzeneka songo yenuko.’+
4 Kachi nge nausuula songo yetu, kaha natuya nakukulanjila vyakulya.
5 Oloze nge kaweshi kumusuulako, kaha katweshi kuyako, mwomwo uze lunga atwambile ngwenyi, ‘Kanda namukeza cheka kuli ami chakuzeneka songo yenuko.’”+
6 Isalele+ avahulishile ngwenyi: “Ikaze mwalwezelele owo lunga ngwenu muli nandumbwenu mukwavo numba mungunehele ukalu upwaha?”
7 Vakiko vamukumbulwile ngwavo: “Uze lunga ikiye atwihwojwele vihula vyakutalisa kuli etu natanga yetu, ngwenyi, ‘Senu achili wamutonyi tahi? Muli nandumbwenu mukwavo tahi?’ Kaha twamulwezele muchano.+ Etu kachi natutachikiza ngachilihi ngwetu mwatwamba ngwenyi, ‘Yenu mukambate ndumbwenu’?”+
8 Jino Yuta ambile kuli ise Isalele ngwenyi: “Musuule mukweze tuyenga nenyi,+ kaha natukatuka nakuya nakulanda vyakulya mangana tuyoye+ mokomoko etu, nayove, navana vetu natufwa kuzala.+
9 Ami nangumulama kanawa.*+ Kachi nge vyuma vyavipi navimuwana, kaha ukamwihule kuli ami. Kaha nawa nge kangweshi kumukindulwisa kuli oveko, kaha nangupwa namulonga wahaya myaka yosena kuli ove.
10 Kachi nge katwalangishileko, oholili kachi tunayiko lyehi mapapa kavali nakuhiluka.”
11 Sevo Isalele ambile kuli vakiko ngwenyi: “Nge chili ngocho, kaha lingenu ngana: Mbatenu vyuma vyamwaza vyamulifuchi lino, vyakufwana nge mbalasamu yayindende,+ nauchi waundende, nalatunume, nashitolake,+ namikau yapishitasho, namamonde muhake mujinjeke jenu mumutwalile kupwa wana.+
12 Mbatenu nawa jimbongo jakuteseka mujindando jivali. Kindulwisenu nawa jimbongo jize vamihakilile mujinjeke jenu.+ Pamo valuwishile kaha.
13 Mbatenu Mbenjamine muyenga kuli owo lunga.
14 Kaha Kalunga Wangolo Josena amikafwe vakamivwile uselewa kuli owo lunga, mangana akamisuwile ndumbwenu, naMbenjamine. Kachi nge ava vana vami navatoka, kaha chipwenga vene ngocho.”+
15 Vambachile uze wana, najimbongo jakuteseka mujindando jivali, naMbenjamine, vakatukile, vayile kuEjipitu nakukemana cheka kumeso aYosefwe.+
16 Omu Yosefwe avamwene vaneza naMbenjamine, hahaze vene alwezele muka-kumulamina zuvo yenyi ngwenyi: “Twala ava malunga kuzuvo yami, kaha kajihe vimuna, nakuwahisa kulya, mwomwo ava malunga navalya nayami kulya chamusana.”
17 Uze lunga alingile nge muze amulwezele Yosefwe.+ Avambachile nakuvatwala kuzuvo yaYosefwe.
18 Oloze vakiko vevwile woma omu vavatwalile kuzuvo yaYosefwe, kaha valyambile mwavomwavo ngwavo: “Vanatunehe kuno mwomwo yajimbongo jize vatukindulwishilile mujinjeke jetu haze twejile hakavanga. Navatukwata jino tupwenga tuvandungo, nakututambula vimbulu jetu.”+
19 Ngocho vapandamine kuli uze muka-kulama zuvo yaYosefwe nakuhanjika nenyi kuchikolo chazuvo.
20 Vamwambile ngwavo: “Ove mwata wetu, twejile kuno nakulanda vyakulya haungeji wakavanga.+
21 Oloze hakukinduluka, twakasunwine kujinjeke jetu omu twahetele hachihela chakusavalila vangeji. Kaha twawanyine jimbongo jamutu himutu munjeke yenyi.+ Ngocho tuneza najo mangana tujikindulwise.
22 Tuneza nawa najimbongo jajivulu jakulanda vyakulya. Oloze katwatachikijile mutu atuhakilile jize jimbongo mujinjeke jetuko.”+
23 Ikiye avambile ngwenyi: “Ukalu wauchi, kanda namwivwa womako. Kalunga kenu, Kalunga kasenu ikiye ahakile jimbongo jize mujinjeke jenu. Yami ngwavangilile kutambula jimbongo jenu.” Kufumaho avalowelele Shimeyone.+
24 Uze lunga avengishile muzuvo yaYosefwe, avahanyine meya vasane kuvilyachilo vyavo, kaha ahanyine nawa vimbulu javo kulya.
25 Jino vakiko vawahishile wana+ wakuhana Yosefwe namusana, mwomwo vevwile ngwavo navalila kulya chamusana kuze.+
26 Kahomu Yosefwe ejile muzuvo, vamunehelele uze wana nakulifukula kuli ikiye.+
27 Jino Yosefwe avehwile chihindu chavo, nakwamba ngwenyi: “Senu wakashinakaji uze mwavulukile ali ngachilihi? Achili wamutonyi tahi?”+
28 Vakiko vamwambile ngwavo: “Ngamba yove setu ali kanawa, achili wamutonyi.” Kaha vafukamine nakulifukula.+
29 Omu Yosefwe andwile meso enyi nakumona ndumbwenyi Mbenjamine mwananaye,+ ambile ngwenyi: “Ou ikiye ndumbwenu wakanyike uze mwangulwezele tahi?”+ Kaha ambile kuli Mbenjamine ngwenyi: “Kalunga akwivwile uselewa ove mwanami.”
30 Hakuwana nge Yosefwe evwile ushona hakumona ndumbwenyi, ngocho ayile washiwashi awane kwakulilila. Ngocho engilile mukapete mwauka wenyi, kaha alilile.+
31 Kufumaho asanyine kumeso enyi, alovokele, kaha aunjile muchima nakwamba ngwenyi: “Twalenu vyakulya kumesa.”
32 Yosefwe vamuhakilile vyakulya hauka wenyi, kaha vandumbwenyi hauka wavo, vaze vaEjipitu apwile navo nawa hauka wavo, mwomwo vaEjipitu kavalilenga vyakulya hamwe navaHepeleuko mwomwo chapwile chaunyengwe kuli vaEjipitu.+
33 Vandumbwenyi vatwamine kumeso enyi, kuputukila kuli watwatwa kweseka naukulwane wenyi,+ swi nakuli kasulasongo kweseka naunyike wenyi. Kaha valitalilenga mwavomwavo oku vanalikomokela.
34 Yosefwe ahanyinenga vandumbwenyi vyazano vyakulya kufuma hamesa yenyi. Kaha chazano chaMbenjamine achitohwesele mapapa katanu kuhambakana vakwavo vosena.+ Ngocho vatwalileho kulya nakunwa nenyi hamwe nakuwahilila.
Kwinyikila Chamwishi
^ Chipwe “nangupwa nguchijikilo hali ikiye.”
