Kuputuka 45:1-28
45 Jino Yosefwe kahashile kulyungumika kumeso avangamba jenyiko.+ Ngocho atambakanyine ngwenyi: “Lovolenu vatu vosena vafume kumeso ami!” Kaha naumwe wauchi asalile naYosefwe omu alijimbwile kuli vandumbwenyi.+
2 Yosefwe alilile nalizu lyakukanguka, kaha vaEjipitu vevwileko, navaze vakuzuvo yaFwalo nawa vevwile mujimbu kanou.
3 Ngocho Yosefwe ambile kuli vandumbwenyi ngwenyi: “Ami yami Yosefwe. Tata achili wamutonyi tahi?” Vandumbwenyi kavahashile kumukumbululako, mwomwo vafwile chishima.
4 Jino Yosefwe ambile kuli vandumbwenyi ngwenyi: “Achipandamenu kuno kuli ami.” Kaha vapandamine kuli ikiye.
Yosefwe ambile ngwenyi: “Ami yami ndumbwenu Yosefwe uze mwalanjishile kuEjipitu.+
5 Oloze jino, kanda namupihilila nakulitoleka mwenumwenu hakungulanjisa kunoko. Mwomwo Kalunga angutumine kulutwe lwenu mangana ngulwile myono yenu.+
6 Uno unapu mwaka wamuchivali wazala yakalombolombo mulifuchi,+ kaha kunasale myaka yikwavo yitanu yize vatu kaveshi kukalimako chipwe kwaha.
7 Kalunga angutumine kulutwe lwenu mangana ngulame chisaka chenu hamavu,*+ nakumilwila mujila yakukomwesa.
8 Shikaho keshi yenu mwangutumine kunoko, oloze Kalunga wamuchano ikiye angutumine, mangana angutongole kupwa ngumuka-kulweza mangana* Fwalo, ngumwata kuzuvo yaFwalo yosena, kaha nawa ngumuka-kuyula lifuchi lyaEjipitu lyosena.+
9 “Kindulukenu washiwashi kuli tata, mukamulweze ngwenu, ‘Mwanove Yosefwe nambe ngwenyi: “Kalunga nangutongola kupwa ngumwata walifuchi lyaEjipitu lyosena.+ Twaya kuno kuli ami. Kanda ulangisako.+
10 Nautwamanga mungalila yaNgoshene,+ kwakamwihi nayami, hohamwe navana vove, navazukulu jove, namautanga ove amikoko navapembe, namautanga ove avangombe, navyeshovyo uli navyo.
11 Nangukuhananga vyakulya, mwomwo kunasale myaka yitanu yazala yakalombolombo.+ Mokomoko ove navakuzuvo yove namufwa kuzala, nakutokesa nawa vyuma vyenu vyosena.”’
12 Enu nasongo yami Mbenjamine munalimwena nameso enu ngwenu ami yami nguli nakuhanjika kuli enu.+
13 Ngocho kamulwezenu tata upahu nguli nawo muEjipitu, navyosena evi munamono. Kaha yenu washiwashi mukambate tata mumunehe kuno.”
14 Jino Yosefwe apakachile* ndumbwenyi Mbenjamine mukasamba nakulila, kaha Mbenjamine nawa alilile oku vanalipakata.+
15 Kaha asweswenyele vandumbwenyi vosena, alilile oku ali nakuvapakata mukasamba. Kufumaho vandumbwenyi vahanjikile nenyi.
16 Mujimbu wahetele kuzuvo yaFwalo, ngwavo: “VandumbwaYosefwe vaneza.” Kaha Fwalo navangamba jenyi vevwile kuwaha.
17 Ngocho Fwalo ambile kuli Yosefwe ngwenyi: “Lweza vandumbwove ngwove, ‘Lingenu ngana: Lemenu tunyama twenu vakumbata viteli muyenga kulifuchi lyaKanane.
18 Kambatenu senu navakujizuvo jenu mwizenga kuno kuli ami. Kahami nangukamihana vyuma vyamwaza vyamulifuchi lyaEjipitu. Kaha namukalyanga* vyakulya vyakumavu awilo* alifuchi lino.’+
19 Kaha valweze nawa ngwove:+ ‘Lingenu ngana: Mbatenu matemba+ amulifuchi lino lyaEjipitu, mukanyinyisemo vana venu namapwevo jenu. Litemba limwe mukambachilemo senu mukeze kuno.+
20 Kanda namukalizakamina havikumba vyenuko,+ mwomwo vyuma vyamwaza vyosena vyamulifuchi lyaEjipitu vinapu vyenu.’”
21 Kaha vana vaIsalele valingile vene ngocho. Yosefwe avahanyine matemba nge muze ahanjikile Fwalo, kaha avahanyine nawa vyuma vyakulikafwa navyo mujila.
22 Avahanyine mutu himutu chakuvwala chimwe, oloze Mbenjamine amuhanyine jimbongo japalata 300 navyakuvwala vitanu.+
23 Kaha atumine nawa vyumevi kuli ise: vimbulu 10 vaze vambachile vyuma vyamwaza vyamulifuchi lyaEjipitu, navimbulu vavihwevo 10 vaze vambachile tiliku nambolo navyakulya vyeka vyaise vyakulila mujila omu navakeza.
24 Ngocho asuwile vandumbwenyi, kaha vakatukile nakuya. Oloze ambile kuli vakiko ngwenyi: “Kanda namulitenukila mujilako.”+
25 Vafumine kuEjipitu, kaha vakahetele kulifuchi lyaKanane kuli sevo Yakova.
26 Kaha vamulwezele ngwavo: “Yosefwe achili wamutonyi, ikiye ali nakuyula lifuchi lyaEjipitu lyosena.”+ Oloze sevo evwile kumuchima mbumbulu, mwomwo kavetavilileko.+
27 Omu vamwambulilile mazu aYosefwe osena aze ahanjikile kuli vakiko, nakumona nawa matemba aze Yosefwe atumine vamumbachilemo, muchima waYakova wahizumukile.
28 Kaha Isalele ambile ngwenyi: “Kunahu, ngunetavila jino. Mwanami Yosefwe achili wamutonyi. Ngwatela kuya ngukamumone shimbu kanda ngufwenga.”+
Kwinyikila Chamwishi
^ Chipwe “mulifuchi.”
^ Hepe., “kupwa nguise.”
^ Hepe., “akundaminyine hashingo.”
^ Chipwe “namukapendaminanga.”
^ Chipwe “vyakulya vyamaji.”
