Kuputuka 46:1-34
46 Ngocho Isalele ambachile vyuma vyosena vize apwile navyo* nakuya. Kahomu ahetele kuMbele-sheva,+ ahanyine Kalunga kaise Isaka+ vimuna vakuvatula.
2 Jino Kalunga ambile kuli Isalele muchakumumwenesa naufuku ngwenyi: “Ove Yakova, ove Yakova.” Ikiye amukumbulwile ngwenyi: “Yami uno mwane.”
3 Kaha ambile ngwenyi: “Ami yami Kalunga wamuchano, Kalunga kaiso.+ Kanda nawivwa woma wakuya kuEjipituko, mwomwo kuze nangukakulingisa kupwa umuyachi waunene.+
4 Ami nanguya nayove hamwe kuEjipitu, kaha nangukakukindulwisa cheka kuno.+ Yosefwe ikiye mwakakufwika hameso omu naukafwa.”+
5 Shikaho Yakova akatukile kuMbele-sheva, kaha vana vaIsalele vanyinyishile sevo Yakova navana vavo, namapwevo javo, mumatemba aze atumine Fwalo mangana vamumbachilemo.
6 Vambachile navimuna javo navikumba vyavo vize vahetele mulifuchi lyaKanane. Yakova ahetele muEjipitu natanga yenyi yosena hamwe.
7 Ejile hamwe natanga yenyi yosena, vana venyi vamalunga, navava vamapwevo, navazukulu jenyi.
8 Awa akiko majina avana vaIsalele chipwe ngwetu vana vaYakova vaze vejile muEjipitu:+ MwanaYakova watwatwa apwile Luvene.+
9 Vana vaLuvene vapwile Hanoke, naPalu, naHezelone, naKalami.+
10 Vana vaShimeyone+ vapwile Yemwele, naYamine, naOhate, naYakine, naZohale, naShaulu+ uze asemene napwevo wakaKanane.
11 Vana vaLevi+ vapwile Ngeleshone, naKohate, naMelali.+
12 Vana vaYuta+ vapwile Ele, naOnane, naShela,+ naPeleze,+ naZela.+ Oloze Ele naOnane vafwilile mulifuchi lyaKanane.+
Vana vaPeleze vapwile Hezelone, naHamule.+
13 Vana vaIsakale vapwile Tola, naPuva, naYove, naShimilone.+
14 Vana vaZevulune+ vapwile Selete, naElone, naYalele.+
15 Ava vakiko vana vaLeya vamalunga vaze asemene naYakova kuPatane-alame, naNjina+ nawa mwanenyi wapwevo. Vana vaYakova vamalunga navava vamapwevo* vosena vapwile 33.
16 Vana vaNgate+ vapwile Zefwiyone, naHangi, naShunyi, naEzevone, naEli, naAlote, naAleli.+
17 Vana vaAshele+ vamalunga vapwile Imina, naIshiva, naIshivi, naMbeliya, naSela ndumbwavo wapwevo.
Vana vaMbeliya vapwile Hevele, naMalakiyele.+
18 Ava vakiko vana vaZelepa,+ ndungo uze Lavane ahanyine kuli mwanenyi Leya. Ava vana kana vakiko Zelepa asemene naYakova: vosena vapwile 16.
19 Vana vaLakele, pwevo lyaYakova vapwile Yosefwe,+ naMbenjamine.+
20 Kaha Yosefwe asemene Manase,+ naEfwalime+ mulifuchi lyaEjipitu. Ava vana avasemene naAsenate,+ mwanaPotefwela kapilishitu wakuOne.*
21 Vana vaMbenjamine+ vapwile Mbela, naMbekele, naAshavele, naNgela,+ naNamane, naEhi, naLoshe, naMupime, naHupime,+ naAlate.+
22 Ava vakiko vana vaLakele vaze asemene naYakova: vosena vapwile 14.
23 Kaha MwanaNdane+ apwile Hushime.+
24 Vana vaNafwatale+ vapwile Yazele, naNgunyi, naYezele, naShileme.+
25 Ava vakiko vana vaMbiliha, ndungo uze Lavane ahanyine kuli mwanenyi Lakele. Ava vana kana vakiko Mbiliha asemene naYakova: vosena vapwile 7.
26 Vana vosena* vaze vasemukile kuli Yakova, vaze vayile kuEjipitu naikiye hamwe vapwile 66,+ kufumisako mapwevo javana venyi.
27 Vana vaYosefwe vaze asemenene mulifuchi lyaEjipitu vapwile vavali.* Ngocho vatu* vakuzuvo yaYakova vosena vaze vayile kuEjipitu vapwile 70.+
28 Jino Yakova atumine Yuta+ alivange kulutwe lwenyi, akalweze Yosefwe ngwenyi ise ali nakuya kuNgoshene. Ngocho vahetele kungalila yaNgoshene.+
29 Kaha Yosefwe alongesele litemba lyenyi, ayile akawane ise Isalele kuNgoshene. Omu amuwanyine, amupakachile mukasamba,* kaha alilile halwola lwalusuku.*
30 Isalele ambile kuli Yosefwe ngwenyi: “Ngunahase kufwa tuhu jino. Mwomwo ngunakumono lyehi, kaha ngunejiva ngwami uchili umutonyi.”
31 Jino Yosefwe ambile kuli vandumbwenyi nakuli vaze vakuzuvo yaise ngwenyi: “Manenu nguyenga kuli Fwalo+ ngumulweze ngwami, ‘Vandumbwami navaze vakuzuvo yatata, vaze vapwilenga mulifuchi lyaKanane vaneza kuli ami.+
32 Vakiko vapwa tufunga,+ kaha vapwa vaka-kupita vimuna.+ Vaneza namautanga avo amikoko navapembe, namautanga avangombe, navyuma vyavo vyosena.’+
33 Ngocho omu Fwalo mwamisanyika nakumihula ngwenyi, ‘Milimo muka mwazata?’
34 Enu mumukumbulule ngwenu, ‘Etu vangamba jove twapwa tuvaka-kupita vimuna kufuma kuunyike wetu nakulelo lino, nge muze valingilenga vakakuluka jetu.’+ Mukamukumbulule ngocho mangana mutwamenga kungalila yaNgoshene,+ mwomwo vaka-kufunga mikoko vosena vapwile vaunyengwe kuli vaEjipitu.”+
Kwinyikila Chamwishi
^ Chipwe “ambachile vosena vaze vapwile venyi.”
^ Chipwe “Myono yavana vaYakova vamalunga navava vamapwevo.”
^ Ikiko Helyopolise.
^ Chipwe “myono yosena.”
^ Chipwe “myono.”
^ Chipwe “myono yivali.”
^ Hepe., “akundaminyine hashingo yenyi.”
^ Chipwe “kaha alilililile hashingo yenyi kuswakumwe.”
