Kuputuka 47:1-31
47 Ngocho Yosefwe ayile kuli Fwalo+ nakumulweza ngwenyi: “Tata navandumbwami vaneza kufuma kulifuchi lyaKanane, namautanga avo amikoko navapembe, namautanga avo avangombe, navyuma vyavo vyosena, kaha vali kungalila yaNgoshene.”+
2 Jino Yosefwe ambachile vandumbwenyi vamalunga vatanu, avatwalile kuli Fwalo.+
3 Fwalo ambile kuli vandumbwaYosefwe ngwenyi: “Milimo muka mwazata?” Vakiko vamukumbulwile ngwavo: “Etu vangamba jove twapwa tuvaka-kupita mautanga amikoko, nge muze valingilenga vakakuluka jetu.”+
4 Vambile cheka kuli Fwalo ngwavo: “Tuneza nakuzuzumana mulifuchi lino,+ mwomwo kulifuchi lyaKanane+ kuli zala yakalombolombo. Kaha kakweshi vyakulya vyakuhana vimuna jayetu vangamba joveko. Ngocho twitavile etu vangamba jove tutwamenga kungalila yaNgoshene.”+
5 Fwalo ambile kuli Yosefwe ngwenyi: “Iso navandumbwove vaneza kuno kuli ove.
6 Lifuchi lyaEjipitu linapu lyove. Shikaho, lweza iso navandumbwove vatwamenga kumavu awilo alifuchi lino.+ Vatwame kungalila yaNgoshene. Kachi nge unatachikiza malunga vamwe vakujikiza hali vakiko, vahane wata wakutala vimuna jami.”
7 Yosefwe anehele ise Yakova kuli Fwalo, amujimbwile kuli ikiye, kaha Yakova akiswile Fwalo.
8 Fwalo ahulishile Yakova ngwenyi: “Uli namyaka yingahi?”
9 Yakova amukumbulwile ngwenyi: “Myaka ngunalumbwangilanga* yinapu 130. Eyi myaka yinapu yayindende, yakuyandangila,+ kaha kayavulile kuhambakana myaka vanayoyonga vakakuluka jami nakulumbwangilako.”*+
10 Kufumaho Yakova akiswile cheka Fwalo, kaha Yakova afumine kumeso enyi.
11 Yosefwe atungishile ise navandumbwenyi mulifuchi lyaEjipitu, kaha avahanyine musenge wamavu amwaza mungalila yaLamesese,+ nge muze vamulwezele kuli Fwalo.
12 Yosefwe ahanyinenga ise, navandumbwenyi, navaze vakuzuvo yaise vosena vyakulya,* kweseka nakuvula chavana vavo.
13 Jino zala yakalombolombo yatohwele chikuma, mwomwo mulifuchi lyosena kamwapwile vyakulyako.* Ngocho vatu vamulifuchi lyaEjipitu namulifuchi lyaKanane vahombele nazala yize yakalombolombo.+
14 Yosefwe akungulwile jimbongo josena mulifuchi lyaEjipitu namulifuchi lyaKanane jize vatu valanjilenga tiliku.+ Kaha ajimbachilenga nakujitwala kuzuvo yaFwalo.
15 Kutwala muze, jimbongo javatu mulifuchi lyaEjipitu namulifuchi lyaKanane jakumine, kaha vaEjipitu vaputukile kwiza kuli Yosefwe nakumwamba ngwavo: “Tuhane vyakulya! Uno tufwenga nazala hameso ove omu jinakumu jimbongo jetu nyi?”
16 Yosefwe avambile ngwenyi: “Nge jimbongo jenu jinakumu, kaha nehenu vimuna jenu mangana mutambasane navyakulya.”
17 Ngocho vaputukile kuneha vimuna javo kuli Yosefwe. Kaha Yosefwe avahanyinenga vyakulya vatambasane natuvalu, namautanga avapembe namikoko, namautanga avangombe, navimbulu. Kaha mwaka wosena uze, avahanyinenga vyakulya vyakutambasana navimuna javo vosena.
18 Omu wakumine uze mwaka, vejile cheka kuli ikiye mwaka wakavangijileho. Vamwambile ngwavo: “Katweshi kukuswekelako ove mwata wetu, jimbongo jetu namautanga avimuna jetu osena vinahwila kuli ove mwata wetu. Navimwe tunasale navyo vyauchi, shina mijimba yetu namavu etu kaha.
19 Nyi tufwile ika nazala hameso ove nakuseza mavu etu kupwa ngundu? Tuhane vyakulya mangana utulande namavu etu kumwe, kaha natupwa tuvandungo jaFwalo, mavu etu nawapwa nawa enyi. Tuhane mbuto tutumbe mangana tuyoye mokomoko natufwa nazala, kaha nawa kuchina mavu etu nawasala ngundu.”
20 Ngocho Yosefwe alanjilile Fwalo mavu osena avaEjipitu, mwomwo kaEjipitu wosena alanjishile mavu enyi hakuwana nge zala yakalombolombo yatohwele chikuma. Kaha mavu osena apwile jino aFwalo.
21 Kaha vatu vosena, kufumisa kusongo yalifuchi lyaEjipitu nakutwala kusongo yikwavo, vavanungulwilile mujinganda.+
22 Oloze mavu avapilishitu kawalanjileko,+ mwomwo vyakulya valilenga vapilishitu vyafuminenga kuli Fwalo. Shikaho vazenekelele kulanjisa mavu avo.
23 Jino Yosefwe ambile kuli vatu ngwenyi: “Talenu, lelo ngunamilande mupwenga muvatu jaFwalo namavu enu kumwe. Wahenu mbuto mukuve mumande.
24 Omu najihya mukahane Fwalo+ chimbwa chimwe chakusokesa muvimbwa vitanu. Kahevi vimbwa viwana navikapwa vyenu mangana vikapwe mbuto jakutumba mumande enu, kaha nawa vikapwe kulya chenu, navaze vakujizuvo jenu, navana venu.”
25 Vakiko vamwambile ngwavo: “Unalwili myono yetu.+ Twivwile uselewa ove mwata wetu, natupwa tuvandungo jaFwalo.”+
26 Yosefwe ahakileko lushimbi luze lwazata nakulelo lino mulifuchi lyaEjipitu lyosena ngwenyi, chimbwa chimwe chakusokesa muvimbwa vitanu chambala chaFwalo. Mavu avapilishitu akiko kaha azenekele kupwa aFwalo.+
27 Jino Isalele atwaminenga lika mulifuchi lyaEjipitu, mungalila yaNgoshene.+ Kaha vahetelelelemo luheto, vasemunwinyine nakuvula chikuma.+
28 Yakova atwamine mulifuchi lyaEjipitu myaka 17. Ngocho makumbi akuyoya chaYakova ahetele mumyaka 147.+
29 Omu Isalele amwene ngwenyi ali kwakamwihi nakufwa,+ asanyikile mwanenyi Yosefwe, amwambile ngwenyi: “Kachi nge unangwivwila uselewa, kaha ingisa livoko lyove kwishi yatungi yami. Ngusolwele zangi yakwilila nakupwa uwakushishika kuli ami. Kanda ungufunda muEjipituko.+
30 Nge ngunafu,* ngufumise muEjipitu ukangufunde mufuka yavakakuluka jami.”+ Yosefwe ambile ngwenyi: “Nangulinga nganomu unambe.”
31 Isalele amwambile ngwenyi: “Lishinge kuli ami.” Kaha alishingile kuli ikiye.+ Ngocho Isalele alifukwilile kumitwe yakahela kenyi.+
Kwinyikila Chamwishi
^ Chipwe “ngunazuzumananga; ngunatwamenga mwamwiza.”
^ Chipwe “nakuzuzumanako; nakutwama mwavamwizako.”
^ Hepe., “mbolo.”
^ Hepe., “mboloko.”
^ Hepe., “Nge ngunasavala tulo hamwe navakakuluka jami.”
