Kuputuka 48:1-22
48 Kutwala muze, Yosefwe vamulwezele ngwavo: “Iso ali nakuviza chikuma.” Ngocho ambachile vana venyi vamalunga vavali, Manase naEfwalime nakuya navo.+
2 Kaha Yakova vamulwezele ngwavo: “Mwanove Yosefwe neza kuli ove.” Ngocho Isalele alikolezezele, ahindukile nakutwama hakahela kenyi.
3 Yakova ambile kuli Yosefwe ngwenyi:
“Kalunga Wangolo Josena alisolwele kuli ami kuLuze mulifuchi lyaKanane, kaha angukiswile.+
4 Ambile kuli ami ngwenyi, ‘Nangukuhana vana nakuvavulisa chikuma, kaha muli ove namukafuma liyongomena lyavatu veka naveka.+ Lifuchi eli nangulihana kuli vaka-tanga* yove vaze navakeza hanyima yove, likapwe luheto lwavo haya myaka yosena.’+
5 Ava vana vove vamalunga vavali unasemena mulifuchi lyaEjipitu shimbu kanda ngwize kuli ove kuno kuEjipitu vanapu vami.+ Efwalime naManase navapwa vami nge omu Luvene naShimeyone nawa vapwa vami.+
6 Oloze vaze navasemuka munyima yavo navapwa vove. Kaha kuuswana wavava vandumbwavo kukiko nakukafuma uswana wavo.+
7 Jino ami, omu ngwapwile nakufuma kuPatane, Lakele afwililile+ hameso ami mulifuchi lyaKanane, omu kwapwile kuchili kwakusuku nakuheta kuEfwalate.+ Ngocho ngwamufunjile kujila yakuya kuEfwalate, chipwe ngwavo Mbetelema.”+
8 Omu Isalele amwene vana vaYosefwe vamalunga, ambile ngwenyi: “Nyi ava veya?”
9 Yosefwe ambile kuli ise ngwenyi: “Vakiko vana vami nanguhane Kalunga kuno.”+ Ikiye amwambile ngwenyi: “Achivanehe kuli ami mangana nguvakisule.”+
10 Jino meso aIsalele elavile haushinakaji wenyi, kaha kahashile kumonako. Ngocho Yosefwe avapandamishile kuli ikiye, kaha avasweswenyele nakuvapakata mukasamba.
11 Isalele ambile kuli Yosefwe ngwenyi: “Kangwashinganyekele ngwami nangukakumonako,+ oloze jino Kalunga nangulingisa ngumone nawa navana* vove.”
12 Yosefwe afumishile vana venyi kumambuli aIsalele, kaha afukamine chameso hamavu.
13 Yosefwe ambachile vana venyi vosena vavali, Efwalime+ amukwachile nalivoko lyenyi lyachilyo nakumuhaka kulivoko lyaIsalele lyachimoswe. Kaha Manase+ amukwachile nalivoko lyenyi lyachimoswe nakumuhaka kulivoko lyaIsalele lyachilyo, kaha avapandamishile kwakamwihi naYakova.
14 Oloze Isalele olwele livoko lyenyi lyachilyo nakulisalika hamutwe waEfwalime numba tuhu apwile kanyike. Kaha asalikile livoko lyenyi lyachimoswe hamutwe waManase. Asepasanyine mavoko enyi mukuchisakula, mwomwo atachikijile ngwenyi Manase ikiye watwatwa.+
15 Kaha akiswile Yosefwe, ambile ngwenyi:+“Kalunga wamuchano ou vatambukilenga+ nenyi visemi jami vaApalahama naIsaka,Kalunga wamuchano ou nangufungunga mukuyoya chami nakulelo lino,+
16 Kangelo ou napunga nakungupululula muvihuli vyami vyosena,+ akisule ava vakweze.+Vakavavulukile lijina lyami, namajina avisemi jami vaApalahama naIsaka,Kaha vakaseme nakuvula hamavu.”+
17 Omu Yosefwe amwene ise nasalika livoko lyenyi lyachilyo hamutwe waEfwalime, evwile kupihya. Ngocho akwachile livoko lyaise ngwenyi alifumise hamutwe waEfwalime mangana alisalike hamutwe waManase.
18 Yosefwe ambile kuli ise ngwenyi: “Ove tata, keshi nganako mwomwo mwana watwatwanyi ou.+ Salika livoko lyove lyachilyo hamutwe wenyi.”
19 Oloze ise akanyine nakumwamba ngwenyi: “Ngunatachikiza vene ove mwanami, ngunatachikiza. Naikiye mwakapwa muyachi, kaha nawa mwakapwa wamulemu. Oloze songo yenyi mwakamuhambakana ulemu,+ kaha vana* venyi navakavula chikuma kwijiva nge kuvula chavatu vamumafuchi amavulu.”+
20 Kaha avakiswile lika halikumbi lize,+ ngwenyi:“VaIsalele vakuvulukenga ove hakulikisula mwavomwavo, ngwavo,‘Kalunga akulingise kupwa nge Efwalime naManase.’”
Ngocho Isalele ahakile Efwalime kulutwe lwaManase omu avakiswile.
21 Isalele ambile kuli Yosefwe ngwenyi: “Ami hikufwa,+ oloze Kalunga mwapwanga nayenu hamwe nakukamikindulwisa kulifuchi lyavakakuluka jenu.+
22 Kahami ngunakuhane musenge wamavu waunene kuhambakana vandumbwove, uze ngwatambwile kuli vaAmole napoko yami yamukwale nauta wami wamanana.”
