Kuputuka 49:1-33
49 Jino Yakova asanyikile vana venyi vamalunga nakuvamba ngwenyi: “Kungulukenu mangana ngumilweze vyuma navikasoloka kuli enu kumakumbi akulutwe.
2 Likungululenu mwivwilile, enu vana vaYakova. Ivwililenu kuli senu Isalele.
3 “Ove Luvene,+ ove yove mwanami watwatwa,+ yove ngolo jami, yove kuputuka changolo jami jakusema, yove wakulitulaho kuulemu, yove wakulitulaho kungolo.
4 Hakuzunguma chove nge makimba amapi, kaweshi kupwa uwakulitulahoko, mwomwo wayile kukahela kayami iso.+ Kaha wasawile* kahela kami. Ayile kukahela kami vene.
5 “Shimeyone naLevi vanapu vana vamujimo limwe.+ Jipoko javo jinapu vitwa vyaulyanyi.+
6 Ove mwono* wami, kanda naukalikata nalizavu lyavoko. Ove ulemu* wami, kanda naulikata nalizavu lyavoko, mwomwo hamatoto avo vajihile vatu,+ kaha nawa vatengwile vangombe hakufwila chavo viseke.
7 Vangule vilinga vyavo vyamatoto, mwomwo vinapu ukenya, nautenu wavo nawa mwomwo unapu waupi.+ Nangukavamwanga mulifuchi lyaYakova, nangukavamwanga mulifuchi lyaIsalele.+
8 “Kahove Yuta,+ vandumbwove navakakwalisanga.+ Livoko lyove nalikapwa kujishingo javaka-kole jove.+ Vana vaiso navakalifukula kuli ove.+
9 Yuta napu mwevu wandumba.+ Ove mwanami naukalya kanyama wamukoka, kaha naukakatuka nakufumako. Naukautama nakulyolola nge ndumba. Kaha ndumba iyaze mwakamusangumuna?
10 Mbwechi yawangana kayeshi kukafuma kuli Yutako,+ kaha mbwechi yakapitau kayeshi kukafuma kumahinji enyiko, palanga nomu mwakeza Shilo.*+ Kaha vatu navakamwononokanga ikiye.+
11 Mwakakashilila chimbulu chenyi kumuvinyo, nalivuvu lyachimbulu chenyi kumuvinyo wamwaza. Kaha ikiye mwakakosa mahina enyi muvinyo, nauvwalo wenyi muvinyo vichila.
12 Meso enyi nawakachilana navinyo, mazo enyi nawakatoma namavele.
13 “Zevulune+ mwakatwama kungenge yakalungalwiji, kungenge kuze veji kusulikilanga mato.+ Kaha ngiza yenyi nayikaheta nakuShitone.+
14 “Isakale+ napu chimbulu wangolo, wakuutama naviteli vyenyi vivali.
15 Mwakamona ngwenyi chihela chakunokela chamwaza, nalifuchi nawa lyamwaza. Kaha mwakambata viteli hachifwiji chenyi, mwakalisuula kuzata milimo yaundungo.
16 “Ndane+ mwakayula vatu jenyi hakupwa muyachi umwe wavaIsalele.+
17 Ndane mwakapwa linoka kutenga yajila, mwakapwa chiyenge kukulo yajila, wakusuma kujisende jakavalu mangana ou mwatambukaho aholokele kunyima.+
18 Ove Yehova, nanguvandaminanga ulwilo wove.
19 “Kaha Ngate+ navakamulukuka kulizavu lyavaka-kunyemukila, oloze ikiye mwakavalumukila nakuvahangasana munyima yavo.+
20 “Kulya chaAshele+ nachikalisala,* kaha mwakawahisa kulya chatela vamyangana.+
21 “Nafwatale+ napu kayi wachihwevo muka-kulaha chikuma. Mwakahanjika mazu ayema.+
22 “Yosefwe+ napu mutango wamutondo wakwima mihako, mutondo wakukaselwoke, ukwechi mitango yawo yinatanjila hachipato.
23 Vaka-kwasa mata amanana vamumweneselenga malwa, vamwashilenga mivwi, nakumukwachila koko.+
24 Oloze uta wenyi wamanana wapwilenga lika wakunana,+ kaha azamikishilenga lika mavoko enyi.+ Ou kafunga, lilolwa lyaIsalele, vamuzamikisa kuli Kalunga kaYakova, ukwechi ngolo.
25 Afumine* kuli Kalunga kaise, kaha mwakamukafwa. Ikiye ali nayou Wangolo Josena, kaha mwakamukisula najikisu jakufuminyina mwilu, najikisu jameya amukajinga,+ nakumuhana vana vavavulu navimuna.
26 Jikisu jaise najikahambakana vyuma vyamwaza vyahajipili jahaya myaka yosena, navyuma vyambwende vyahamilundu yakwilila.+ Najikapwanga hamutwe waYosefwe, mumbambamutwe yayou vahandwile muli vandumbwenyi.+
27 “Mbenjamine+ mwakatanyanga nge kangunge.+ Kuchimene mwakalyanga nyama yamukoka, kaha kuchingoloshi mwakapangilanga vize vyakupupa.”+
28 Vosena ava vanapu miyachi yavaIsalele 12, kaha vyumevi vikiko ahanjikile sevo kuli vakiko omu apwile nakuvakisula. Akiswile mutu himutu kweseka nakisu yinamutela.+
29 Kufumaho avalwezele ngwenyi: “Ami hinangutoka jino ngana mwavatu jami.*+ Mukangufunde hamwe navatu jami muwina wakusendeveka uze uli hamusuka wamavu aEfwelone kaHete,+
30 muwina wakusendeveka wakumavu akuMakapela kwakamwihi naMamele, mulifuchi lyaKanane, musuka uze Apalahama alanjile kuli Efwelone kaHete kupwa chihela chakufunda vafu.
31 Kuze kukiko vafunjile Apalahama napwevo lyenyi Sala.+ Kukiko vafunjile Isaka+ napwevo lyenyi Laveka. Kaha kukiko nawa ngwafunjile Leya.
32 Mavu nawina wakusendeveka uliho vavilanjile kuli vana vaHete.”+
33 Kahomu Yakova akumishile kuhana eji jindongi kuli vana venyi, azundwile mahinji enyi nakukinduluka hakahela. Kaha afwile, atokele ngana mwavatu jenyi.*+
Kwinyikila Chamwishi
^ Chipwe “wajilulwile.”
^ Tala Mukana waMazu.
^ Chipwe pamo, “muchima.”
^ Ulumbunwiso, “Mwenyacho; Uze Chapwa Chenyi.”
^ Hepe., “nachikapwa chamaji.”
^ Ikiye Yosefwe.
^ Eyi hindangwishi yize yalumbununa kufwa.
^ Eyi hindangwishi yize yalumbununa kufwa.
