Kuputuka 5:1-32
5 Ou ukiko mukanda wamujimbu waAlama. Halikumbi lize Kalunga atengele Alama, amutengele muchifwanyisa chenyi ivene Kalunga.+
2 Atengele lunga napwevo.+ Halikumbi lize avatengele,+ avakiswile, kaha avavulukile ngwenyi, Vatu.*
3 Alama atwamine myaka 130, kaha asemene mwana walunga wakulifwana nenyi, wakutambula kuli ikiye, kaha amulukile ngwenyi, Sete.+
4 Omu Alama alingile hanaseme lyehi Sete, atwamine nawa myaka 800. Hamyaka kaneyi asemene vana vamalunga navava vamapwevo.
5 Ngocho makumbi osena aze ayoyele Alama ahetele mumyaka 930, kaha afwile.+
6 Sete atwamine myaka 105, kaha asemene Enoshe.+
7 Omu Sete alingile hanaseme lyehi Enoshe, atwamine nawa myaka 807. Hamyaka kaneyi asemene vana vamalunga navava vamapwevo.
8 Ngocho makumbi osena aze ayoyele Sete ahetele mumyaka 912, kaha afwile.
9 Enoshe atwamine myaka 90, kaha asemene Kenane.
10 Omu Enoshe alingile hanaseme lyehi Kenane, atwamine nawa myaka 815. Hamyaka kaneyi asemene vana vamalunga navava vamapwevo.
11 Ngocho makumbi osena aze ayoyele Enoshe ahetele mumyaka 905, kaha afwile.
12 Kenane atwamine myaka 70, kaha asemene Mahalalele.+
13 Omu Kenane alingile hanaseme lyehi Mahalalele, atwamine nawa myaka 840. Hamyaka kaneyi asemene vana vamalunga navava vamapwevo.
14 Ngocho makumbi osena aze ayoyele Kenane ahetele mumyaka 910, kaha afwile.
15 Mahalalele atwamine myaka 65, kaha asemene Yalete.+
16 Omu Mahalalele alingile hanaseme lyehi Yalete, atwamine nawa myaka 830. Hamyaka kaneyi asemene vana vamalunga navava vamapwevo.
17 Ngocho makumbi osena aze ayoyele Mahalalele ahetele mumyaka 895, kaha afwile.
18 Yalete atwamine myaka 162, kaha asemene Enoke.+
19 Omu Yalete alingile hanaseme lyehi Enoke, atwamine nawa myaka 800. Hamyaka kaneyi asemene vana vamalunga navava vamapwevo.
20 Ngocho makumbi osena aze ayoyele Yalete ahetele mumyaka 962, kaha afwile.
21 Enoke atwamine myaka 65, kaha asemene Metusela.+
22 Omu Enoke alingile hanaseme lyehi Metusela, atambukilenga lika naKalunga wamuchano hamyaka 300. Hamyaka kaneyi asemene vana vamalunga navava vamapwevo.
23 Ngocho makumbi osena aze ayoyele Enoke ahetele mumyaka 365.
24 Enoke atambukilenga lika naKalunga wamuchano.+ Jino kavamumwene cheka kumutuko, mwomwo Kalunga amumbachile.+
25 Metusela atwamine myaka 187, kaha asemene Lameke.+
26 Omu Metusela alingile hanaseme lyehi Lameke, atwamine nawa myaka 782. Hamyaka kaneyi asemene vana vamalunga navava vamapwevo.
27 Ngocho makumbi osena aze ayoyele Metusela ahetele mumyaka 969, kaha afwile.
28 Lameke atwamine myaka 182, kaha asemene mwana walunga.
29 Amulukile ngwenyi, Nowa,*+ nakwamba ngwenyi: “Ou ikiye mwakatuvendejeka* kumilimo yetu nakukukilikita chamavoko etu mwomwo yamavu aze vangwile+ kuli Yehova.”
30 Omu Lameke alingile hanaseme lyehi Nowa, atwamine nawa myaka 595. Hamyaka kaneyi asemene vana vamalunga navava vamapwevo.
31 Ngocho makumbi osena aze ayoyele Lameke ahetele mumyaka 777, kaha afwile.
32 Omu Nowa ahetele myaka yakusemuka 500, asemene Sheme,+ naHame,+ naYafwete.+
Kwinyikila Chamwishi
^ Chipwe “Alama; Mutu.”
^ Pamo kulumbununa, “Kunoka; Kuvendejeka.”
^ Chipwe “mwakatusokola.”
